ប៉ារីស៖ ការប្រកួតប្រជែងវាយកូនបាល់អាជីព (តិន្នីស) ក្នុងកម្មវិធី French Open 2021 នឹងត្រូវពន្យារពេល ១ សប្ដាហ៍។ នេះបើតាមប្រភពដែលស្និទ្ធនឹងគណៈកម្មការរៀបចំព្រឹត្តិការណ៍នេះ កាលពីថ្ងៃពុធ។
ការប្រកួតប្រជែងដណ្ដើមពានកម្រិត Grand Slam ប្រចាំឆ្នាំ ដែលត្រូវធ្វើឡើងលើទីលានដីឥដ្ឋនេះ ត្រៀមនឹងចាប់ផ្ដើម នៅថ្ងៃទី ២៣ ខែឧសភា តែឥឡូវនេះ នឹងដំណើការនៅថ្ងៃទី ៣០ ខែឧសភាវិញ ដោយសង្ឃឹមថា នឹងមានអ្នកទស្សនាបន្ថែមទៀត ដែលអាចចូលរួមការប្រកួត Roland Garros។
កម្មវិធី French Open ឆ្នាំមុនត្រូវផ្អាក ៤ ខែ ហើយត្រូវបានធ្វើក្នុងខែកញ្ញា និងតុលា ជំនួសឱ្យកាលវិភាគពីយូរយារមកហើយ ក្នុងខែឧសភា-មិថុនា។ ចំនួនអ្នកទស្សនាត្រូវបានកម្រិតត្រឹមតែ ១ ០០០ នាក់ប៉ុណ្ណោះ ក្នុង ១ ថ្ងៃ សម្រាប់ការប្រកួតឆ្នាំនេះ។
ការរឹតបន្តឹង ដើម្បីទប់ស្កាត់ការរាតត្បាតនៃវីរុសកូរ៉ូណា ត្រូវបានអនុវត្តយ៉ាងតឹងតែងនៅទូទាំងប្រទេសបារាំង កាលពីថ្ងៃពុធសប្ដាហ៍មុន ក៏ការប្រកួតប្រជែងកីឡាអាជីពទាំងអស់ កំពុងបន្តប្រព្រឹត្តទៅធម្មតា ទោះធ្វើដោយបិទទ្វារកីឡដ្ឋានក៏ដោយ។
កាលពីថ្ងៃអង្គារ ក្រសួងកីឡាបារាំងបានប្រាប់ AFP ឱ្យដឹងថា រដ្ឋាភិបាលកំពុងធ្វើការពិភាក្សាពីការពន្យារពេល ដែលអាចមានចំនួន ២-៣ ថ្ងៃ។
កីឡាការិនីសញ្ជាតិបារាំង Alize Cornet បានធ្វើការរិះគន់ចំពោះរដ្ឋមន្ត្រីកីឡា លោកស្រី Roxana Maracineanu និងរដ្ឋាភិបាលរបស់លោក Macron ជុំវិញការពន្យារពេលនេះ។
កីឡាការិនី Cornet ប្រាប់ថា៖ «ខ្ញុំសុំទោស ខ្ញុំមិនមានអ្វីប្រឆាំងជាមួយគាត់ (រដ្ឋមន្រី្តកីឡា) នោះទេ គ្រាន់តែគាត់បានធ្វើការសម្រេចចិត្តមិនល្អចំពោះវិស័យកីឡា ដូចជាគាត់់មិនខ្វល់។ ខ្ញុំដឹងថា ចេញមកពីរដ្ឋាភិបាល»។
កីឡាការិនីវ័យ ៣១ ឆ្នាំ បន្តថា៖ «វាប្រហែលចេញមកពីអ្នករៀបចំផងដែរ ព្រោះខ្ញុំឮមកថា ព្រឹត្តិការណ៍នេះទំនងជាទទួលបានអ្នកទស្សនាបន្ថែមទៀត បើពួកគេពន្យារពេល ១ សប្ដាហ៍។ តែយ៉ាងណា និយាយដោយត្រង់ខ្ញុំយល់ថា វាជាការសម្រេចចិត្តអាត្មានិយមបន្តិច ព្រោះកាលវិភាគប្រកួត នឹងប៉ះពាល់ពីការពន្យាពេលនេះ»។
ខែមុន លោក Gilles Moretton ប្រធានថ្មីនៃសហព័ន្ធកីឡាតិន្នីសបារាំង (FFT) ឱ្យដឹងថា គាត់មិនហ៊ានគិតដល់ការពន្យារទាំងស្រុងនោះទេ។
លោក Moretton ថ្លែងថា៖ «បើយើងឈានដល់ការបិទប្រទេស ២ ខែ នោះ យើងនឹងត្រូវមានវិធានការ ដែលកាន់តែអាក្រក់បំផុតនោះ គឺការផ្អាកទាំងស្រុងតែម្ដង តែខ្ញុំមិនហ៊ានស្រមៃដល់រូបភាពនោះទេ»៕ AFP/VN