ភ្នំពេញ៖ ក្រុមហ៊ុនស្ថានីយទូរទស្សន៍ CBS និងម្ចាស់ឧបត្ថម្ភក្រុមហ៊ុនស្រាបៀរ Ganzberg នៅតែបានសហការគ្នាយ៉ាងស្អិតល្មួត ដើម្បីបន្តរៀបចំឱ្យមានការប្រកួតបាល់ទាត់ហ៊្វុតសាលដណ្តើមពានរង្វាន់ Ganzberg Cup 2020 រដូវកាលទី៥ ទៅតាមគម្រោង បើទោះបីជាបានជួបឧបសគ្គ និងវិបត្តិនៃការរីករាលដាលជំងឺកូវីដ ១៩ ជាលក្ខណៈសកលលោក និងនៅកម្ពុជាក្នុងឆ្នាំនេះក៏ដោយ។
តាមរយៈការព្យាយាមរួមគ្នានេះ CBS និង Ganzberg បានបញ្ចប់ការប្រកួតជម្រុះនៅតាមមណ្ឌលរាជធានីភ្នំពេញ កំពត ប៉ោយប៉ែត សៀមរាប បាត់ដំបង និងកំពង់ចាម រួចហើយ ដើម្បីយកក្រុមខ្លាំងៗ ឡើងមកប្រកួតនៅវគ្គ ៣២ ក្រុមចុងក្រោយ ដោយមានការផ្សាយផ្ទាល់តាមទូរទស្សន៍ MYTV ហើយរកក្រុមម្ចាស់ជើងឯករដូវកាលនេះ នឹងបានប្រាក់រង្វាន់ចំនួន ១៥ ០០០ ដុល្លារ។
លោក តែ រតនៈ ប្រធានទីផ្សារ និងជាតំណាងអគ្គនាយកស្ថានីយទូរទស្សន៍ MYTV បានថ្លែងនៅក្នុងសន្និសីទកាសែតកាលពីថ្ងៃចន្ទថា៖ «ការប្រកួតរដូវកាលទី៥ នេះ មានការខុសប្លែកពីឆ្នាំមុនៗ ដោយខ្ញុំសង្កេតឃើញមានក្រុមប្លែកៗជាច្រើនបានឡើងមកលេងនៅវគ្គ ៣២ ក្រុមនេះ ដែលបញ្ជាក់ឱ្យឃើញ ពីការរីកចម្រើននៃវិស័យបាល់ទាត់ក្នុងប្រទេសកម្ពុជា យើង បើទោះជាយើងកំពុងស្ថិតនៅក្នុងគ្រាលំបាក ពីការរាតត្បាតដោយជំងឺកូវីដ ១៩ ក៏ដោយ»។
លោកបន្ថែមថា៖ «ទម្រាំតែធ្វើឱ្យកម្មវិធីមួយនេះ សម្រេចឆ្ពោះទៅមុខបាន គឺ MYTV និងក្រុមហ៊ុន Ganzberg បានសហការគ្នាយ៉ាងស្អិតល្មួតក្រោមការជួយជ្រោមជ្រែងពីសហព័ន្ធកីឡាបាល់ទាត់កម្ពុជា ដើម្បីពុះពារឧបសគ្គ និងខិតខំកែច្នៃឱ្យការប្រកួតនេះ អាចជ្រើសរើសបានក្រុមជើងឯក ដែលពោរពេញដោយសមត្ថភាព»។
ចំណែកលោក ថោង ប្រសើរ តំណាងប្រធានផ្នែកកីឡារបស់ CBS បាននិយាយថា៖ «ដោយឈរលើការអភិវឌ្ឍ យើងបានធ្វើការកែប្រែការប្រកួតឱ្យកាន់តែស្វិតស្វាញពី ១ រដូវកាល ទៅ ១ រដូវកាល ខណៈដែល Ganzberg ក៏មានប្រាក់រង្វាន់របស់ខ្លួនយ៉ាងធំសម្បើម ដើម្បីស្វែងរកក្រុមជើងឯកដ៏ខ្លាំងមួយ ដែលមានសមត្ថភាពមិនចាញ់ក្រុមកីឡាកររបស់បណ្តាប្រទេសនៅក្នុងតំបន់ និងក្នុងពិភពលោក»។
យ៉ាងណាក៏ដោយ ដើម្បីចូលរួមទប់ស្កាត់ការរីករាលដាលនៃជំងឺកូវីដ ១៩ តាមការណែនាំរបស់ក្រសួងសុខាភិបាលក៏ដូចជាក្រសួងអប់រំ យុវជន និងកីឡា គឺការប្រកួតជុំចុងក្រោយ នៅលើទីលាន T-Soccer នេះ នឹងមិនអនុញ្ញាតឱ្យមានអ្នកគាំទ្រចូលរួមទស្សនាផ្ទាល់នោះទេ ចំណែកក្រុមទាំង ៣២ ដែលនឹងត្រូវប្រកួតប្រជែងគ្នានៅជុំនេះ បានចាប់ឆ្នោតរួចរាល់ហើយ ហើយគ្រប់គូទាំងអស់នឹងត្រូវលេងនៅរៀងរាល់ថ្ងៃសៅរ៍ ចាប់ពីម៉ោង ៨ យប់តទៅ។
យ៉ាងណាក៏ដោយ សម្រាប់ការប្រកួតបើកឆាកដែលដំបូងឡើងត្រូវធ្វើនៅថ្ងៃទី ៥ ខែធ្នូ នេះ គឺត្រូវបានពន្យារពេល ២ សប្តាហ៍ ទៅតាមការប្រកាសរបស់ក្រសួងកាលពីថ្ងៃចន្ទ ដោយកំណត់ឱ្យផ្អាករាល់ការហាត់ប្រាណ និងលេងកីឡា ដែលមានលក្ខណៈប្រមូលផ្តុំ រយៈពេល ១៥ ថ្ងៃ ដើម្បីចូលរួមទប់ស្កាត់ការរីករាលជំងឺកូវីដចូលក្នុងសហគមន៍នាព្រឹត្តិការណ៍ ២៨ វិច្ឆិកា៕