ទីក្រុងឡុងដ៍ៈ កីឡាករ Serge Gnabry បានជួយឲ្យក្រុម Bayern Munich ឡើងជិតដល់វគ្គ ៨ ក្រុមចុងក្រោយក្របខ័ណ្ឌ Champions League ខណៈដែលការរកបាន ២ គ្រាប់របស់កីឡាករអាល្លឺម៉ង់រូបនេះបានរួមចំណែកក្នុងជ័យជម្នះ ៣-០ នៅកីឡដ្ឋាន Stamford Bridge របស់ក្រុម Chelsea នៅជើងទី ១ នៃវគ្គ ១៦ ក្រុមកាលពីរាត្រីថ្ងៃអង្គារ។
កីឡាករ Gnabry បានលត់ក្រុម Tottenham Hotspur ជាមួយការរកបាន ៤ គ្រាប់ក្នុងជ័យជម្នះរបស់ក្រុម Bayern ៧-២ នៅទីក្រុងឡុងដ៍នៅដើមរដូវកាលនេះ ហើយអតីតខ្សែបម្រើក្រុម Arsenal រូបនេះបានត្រឡប់ទៅកាន់ទីក្រុងប្រទេសអង់គ្លេសវិញដើម្បីរុញក្រុម Chelsea ឲ្យខិតទៅរកការធ្លាក់ពីការប្រកួតនេះ។
ពេលវេលានៅជាមួយក្រុម Arsenal របស់កីឡាករអាយុ ២៤ ឆ្នាំរូបនេះមានការខកចិត្តច្រើន ហើយរូបគេថែមទាំងបានធ្លាក់ចុះទម្រង់លេងនៅអំឡុងពេលខ្ចីជើងនៅក្លិប West Bromwich Albion ផងដែរ។
ប៉ុន្តែកីឡាកររូបនេះបានរះឡើងវិញនៅពេលលេងនៅក្រុម Bayern ហើយគ្រាប់បាល់ ២ គ្រាប់របស់រូបគេក្នុងចន្លោះពេលតែ ៣ នាទីនោះបានធ្វើឲ្យក្រុមរបស់លោក Hansi Flick ស្ថិតនៅលើផ្លូវឆ្ពោះទៅកាន់វគ្គ ៨ ក្រុមចុងក្រោយនៃព្រឹត្តិការណ៍នេះ។
កីឡាករ Robert Lewandowski រកបានគ្រាប់បាល់ទី ៣ សម្រាប់ក្រុម Bayern មុនពេលខ្សែការពារ Marcos Alonso របស់ក្លិប Chelsea ត្រូវបានបណ្ដេញចេញនៅនាទីទី ៨៣។
ក្រុម Chelsea នឹងត្រូវស្វែងភាពអស្ចារ្យមួយនៅក្នុងទីក្រុង Munich ក្នុងជើងទី ២ នៅថ្ងៃទី ១៨ ខែមីនាដើម្បីកែប្រែបរាជ័យនេះនៅកីឡដ្ឋាន Allianz Arena ជាទីដែលពួកគេធ្លាប់បានឈ្នះយ៉ាងអស្ចារ្យទៅលើក្រុមអាល្លឺម៉ង់មួយនេះនៅវគ្គផ្ដាច់ព្រ័ត្រក្របខ័ណ្ឌ Champions League កាលពីឆ្នាំ ២០១២។
កីឡាករ Gnabry បានប្រាប់ BT Sport ពីការរកបានគ្រាប់បាល់នៅក្នុងទីក្រុងឡុងដ៍នេះថា៖ «ខ្ញុំមានមិត្តភក្តិជាច្រើននៅទីនេះ ហើយពួកគេភាគច្រើនបានចូលរួមទស្សនាដែលធ្វើឲ្យខ្ញុំគិតថា ពួកគេកំពុងផ្ដល់កម្លាំងចិត្តដល់ខ្ញុំ»។
កីឡាកររូបនេះបានបន្ថែមថា៖ «គ្រាប់បាល់ ៣ គ្រាប់គួរតែបានផ្ដល់ឲ្យយើងនូវទំនុកចិត្តជាច្រើនមែនហើយ ប៉ុន្តែយើងត្រូវតែត្រៀមខ្លួនសម្រាប់ជើងទី ២ ថែមទៀត ហើយយើងមិនអាចគិតថា វាគ្រប់គ្រាន់បាននោះទេ»។
កីឡាករ Gnabry បានបន្ថែមទៀតថា៖ «យើងបានឃើញរដូវកាលមុនរួចហើយដែលក្រុម Liverpool បានយកឈ្នះក្រុម Barcelona វិញដូច្នេះយើងត្រូវតែប្រុងប្រយ័ត្ន និងផ្តោតលើការប្រកួតនេះឲ្យបានហ្មត់ចត់»។
ចំណែកគ្រូបង្វឹកក្រុម Chelsea លោក Frank Lampard វិញបានទទួលស្គាល់ថា ក្រុមយុវជនរបស់គាត់បានរត់ដេញតាមក្រុមជើងចាស់របស់ក្រុម Bayern យ៉ាងខ្លាំង ហើយការព្យាកររបស់គាត់នៅមុនការប្រកួតនេះបានបង្ហាញពីការពិបាកនឹងទទួលបានជ័យជម្នះ។
លោក Lampard បាននិយាយថា៖ «ទម្រង់លេងនេះគឺអន់ខ្លាំងណាស់ ហើយពេលខ្លះអ្នកត្រូវតែធ្វើដោយស្មោះត្រង់បំផុតពីព្រោះពួកគេបានបង្ហាញទម្រង់លេងល្អជាងយើងគ្រប់ផ្នែកទាំងអស់ដែលបានធ្វើឲ្យយើងមានការព្រួយបារម្ភបំផុត»។
គ្រូបង្វឹករូបនេះបានបន្ថែមថា៖ «ខ្ញុំមានការខកចិត្តដែលយើងមិនអាចខំប្រឹងប្រែងយកឈ្នះពួកគេ។ យើងត្រូវតែយកចិត្តទុកដាក់ និងខំធ្វើការថែមទៀតឆ្ពោះទៅរកកម្រិតមួយដែលយើងចង់បានបំផុត»៕ SN