The Phnom Penh Post Search

Search form




Logo of Phnom Penh Post newspaper Phnom Penh Post - Gomez ២ គ្រាប់ ជួយ​ Atalanta ​បំបាក់ Lazio រីឯ Inter ឈ្នះក្រុមចំណូល​ថ្មី




Gomez ២ គ្រាប់ ជួយ​ Atalanta ​បំបាក់ Lazio រីឯ Inter ឈ្នះក្រុមចំណូល​ថ្មី

Content image - Phnom Penh Post
Gomez យារ​ជើង​ស៊ុត​បាល់​បញ្ចូល​ទី​ឱ្យ​ក្រុម Atalanta នាំ​មុខ Lazio ៣-០ អំឡុង​ការ​ប្រកួត Serie A អ៊ីតាលី។​

Gomez ២ គ្រាប់ ជួយ​ Atalanta ​បំបាក់ Lazio រីឯ Inter ឈ្នះក្រុមចំណូល​ថ្មី

ក្រុង​មីឡេន​: ខ្សែ​ប្រយុទ្ធ Papu Gomez ស៊ុត​បញ្ចូល​ទី ២​ គ្រាប់ ខណៈ​ក្រុម​ Atalanta បំបាក់​ក្រុម​ម្ចាស់​ផ្ទះ Lazio ៤-១ អំឡុង​ការ​ប្រកួត​នៅ​ក្រុង​រ៉ូម ស្រប​ពេល​ក្រុម​គូ​ប្រជែង​ពាន​ក្រប​ខ័ណ្ឌ Serie A គឺ​ Inter Milan លត់​ក្រុម​ចំណូល​ថ្មី​ Benevento ដល់​ផ្ទះ ៥-២ កាល​ពី​ថ្ងៃ​ពុធ​។

កាល​វិភាគ​នៃ​ការ​ប្រកួត​បើ​រដូវ​កាល ២ ​លើក​ដំបូង ត្រូវ​បាន​ពន្យារ​ពេលដោយ​សារ​ក្រុម Atalanta និង Inter ជាប់​ភារកិច្ច​ប្រកួត​កម្ម​វិធី​ដណ្ដើម​ពាននៅ​តំបន់​អឺរ៉ុប ក្នុង​ខែ​សីហា​។

ក្រោយ​ចប់​ការ​ប្រកួត​នេះ ក្រុម​គូ​ប្រជែង នៅ​ភាគ​ខាង​ជើង​ទាំង ២ បាន​បង្ហាញ​ឱ្យ​ឃើញ​ពី​កម្លាំង​របស់​ពួក​គេ ដែល​សង្ឃឹម​ថា នឹង​រា​រាំង​ក្រុម Juventus មិន​ឱ្យ​ឈ្នះ​ពាន Serie A ជា​លើក​ទី ១០ ជាប់​ៗ​គ្នា​ ខណៈ​​ក្រុម​ជើង​ឯក​មួយ​នេះ ​ដណ្ដើម​បាន​តែ​ ១ ​ពិន្ទុ នៅឯ​ផ្ទះ Roma កាល​ពី​ថ្ងៃ​អាទិត្យ​។

ពេល​នេះ ក្រុម Atalanta និង Inter កំពុង​ឈរ​នៅ​ទី​កំពូល​តារាង​ពិន្ទុ Serie A រួម​ជាមួយ​ក្រុម​​ Napoli, Hellas Verona និង AC Milan​ ដោយ​ការ​យក​បាន ៦ ​ពិន្ទុ​ពេញ ពី​ការ​ប្រកួត​បើក​ឆាក ២​លើក​ដំបូង​នេះ​ ខណៈ​ក្រុម Juve មាន ៤ ពិន្ទុ មុន​ពួក​គេ បើក​ទ្វារ​ផ្ទះ​ស្វាគមន៍​ក្រុម​ Napoli នៅ​ថ្ងៃ​អាទិត្យ​នេះ​។

ក្រុម​ Atalanta មាន​ ៣ គ្រាប់ នាំ​មុខ​ នៅ​វគ្គ​ទី១ ដោយ​មាន​កីឡាករ Robin Gosens, Hans Hateboer និង Gomez មាន​ចំណែក​រួម ម្នាក់​ ១ គ្រាប់ ហើយ​ពួក​គេ ក្នុង​នាម​ជា​ក្រុម​ភ្ញៀវ បាន​គេច​ផុត​ពី​ការ​ភ្លាត់​នា​រដូវកាល​មុន ដែល​ក្រុម Lazio ត្រូវ​នាំ​មុខ ៣-០ តែ​តាម​ស្មើ​បាន​វិញ ៣-៣​។​

ខ្សែ​ការ​ពារ​សញ្ជាតិហូឡង់ Hateboer បាន​និយាយ​ថា​៖ «យើង​ទាំង​អស់​គ្នាបាន​ដឹង​ពី​អ្វី ដែល​បាន​កើត​ឡើងកាល​ពី​ពេល​កន្លង​ទៅ ហើយ​យើង​បាន​និយាយ​គ្នា​ពី​រឿង​នេះ ពេល​ចប់​វគ្គ​ទី​១​។ យើង​ដឹង​ថា ពេល​ពួក​គេធ្វើ​បាន​សម្រេច ១ គ្រាប់ នោះ​គ្រាប់​ដទៃ អាច​កើត​មាន​ទៀត តែ​ពេល​ពួកគេ ស៊ុត​បញ្ចូល​ទីរួច យើង​បាន​បន្ថែម​គ្រប់​ទី៤ ហើយ​គ្រប់​យ៉ាង​ចប់​»​។

កីឡាករ Felipe Caicedo ជា​អ្នក​ជួយ​ឱ្យ​ក្រុម Lazio តាម ៣-១ នៅ​នាទីទី​៥៧ តែ​ Gomez មាន​ឱកាស​ស៊ុត​បញ្ចូល​ទីគ្រាប់​ទី២ ដែល​មាន​គម្លាត​រយៈ​ពេល​ ១ ​ម៉ោងពីគ្រាប់​ទី១​​។

Content image - Phnom Penh Post
Lukaku ស៊ុត​បញ្ចូលទី​គ្រាប់​ទី២ របស់​ខ្លួន ឱ្យក្រុម Inter នាំ​មុខ Benevento បណ្ដោះ​អាសន្ន ៣-០ អំឡុង​ការ​ប្រកួត Serie A អ៊ីតាលី។ ​

ចំណែក​ក្រុម​ជើង​ឯករង​រដូវកាល​មុន Inter ក្រោយ​ឈ្នះ​ Fiorentina នៅ​ប្រកួត​ដំបូង​ទាំង​ប្រផិត​ប្រផើយ ៤-៣ កាល​ពី​សប្ដាហ៍​មុន ក្រុម​របស់​លោក​​ Antonio Conte ក៏​សម្រេច​បាន​ជោគ​ជ័យ​ដ៏​ធំ​ ១ ​ទៀត ដោយ​ការ​ការ​បំបាក់​ក្រុម​ម្ចាស់​ផ្ទះ Benevento ដែល​សប្ដាហ៍​មុន​ បាន​ធ្វើ​ដំណើរ​ទៅ​យក ៣​ ពិន្ទុ​ពី​ក្រុម Sampdoria បាន​សម្រេច​ទាំង​មិន​គួរ​ឱ្យ​ជឿ ជាមួយ​នឹង​ជ័យ​ជម្នះ ៣-២។​

ខ្សែ​ប្រយុទ្ធ Romelu Lukaku របស់ Inter ទម្លុះ​សំណាញ់​ទី​បាន ២ គ្រាប់ ដែល​គ្រាប់​ដំបូង ធ្វើ​បាន ពេល​ប្រកួត​ដំណើរ​ការ​ក្នុង​រង្វង់ ៣០​ វិនាទី នៃ​តង់​ទី ១ ហើយ​ខ្សែ​បម្រើ​​ Achraf Hakimi ទទួល​បាន​ការ​ចាប់​អារម្មណ៍​នៅ​ថ្ងៃ​បង្ហាញ​ខ្លួន​ដំបូង ដោយការ​រួម​ចំណែក​ ១ គ្រាប់​ដែរ​។ ២ គ្រាប់​ផ្សេង​ទៀត បាន​មក​ដោយសារ​កីឡាករ Roberto Gagliardini និង Lautaro Martinez ម្នាក់ ១ ​គ្រាប់​។​

គ្រូបង្វឹក​ក្រុម Inter លោក Conte បាន​និយាយ​សរសើរ​ក្រុម​ខ្លួន​ថា​៖ «​ខ្ញុំ​ចូល​ចិត្ត​មើល​ក្រុម​លេង​ដូច​យប់​មិញ ដោយ​ការ​ផ្លាស់​ប្ដូរ​តំបន់​ប្រយុទ្ធ​យ៉ាង​មុត​ស្រួច​។ ការ​​ពេញ​ចិត្ត​ពេញ​ថ្លើម​ពិត​ប្រាកដ​របស់​គ្រូបង្វឹក ១ ​រូប គឺ​ការ​ឃើញនូវ​ការ​លេង​របៀប​ហ្នឹង មិន​ថាអ្នក​ណា​កំពុង​ឈរ​នៅ​ទី​តាំង​នោះក៏​ដោយ ក៏​យុទ្ធ​សាស្ត្រនៃ​ការ​លេងនៅ​ដដែល​»​។​

លោក Conte បន្ត​ទៀត​ថា​៖ «​យើង​មាន​ជម្រើស​ច្រើន​ជាង​មុន ហើយ​យើង​ជា​ក្រុម​មួយ ដែល​ចូល​ចិត្ត​ការ​លេង​ប្រយុទ្ធ និង​បង្កើត​ឱកាស​ឱ្យ​បាន​ច្រើន​។ យើង​ត្រូវ​ធ្វើ​ការ​បន្ថែម​ទៀត​ ដើម្បី​ឱ្យ​ក្រុម​មាន​តុល្យ​ភាពព្រោះ​ថា ថ្ងៃ​នេះ យើងមាន​របូត ២ គ្រាប់​ដែរ។ តែ​ប្រហែល​ជា​កីឡាករ​ចំណូល​ថ្មី សម្រប​ខ្លួន​បាន​លឿន​នឹង​ប្រព័ន្ធ​លេង​របស់​ក្រុម​យើង ដែល​មាន​មក​តាំង​ពី​រដូវកាល​មុន​»​៕ AFP/VN

អត្ថបទគួរចាប់អារម្មណ៍

  • ភ្នំពេញ: អស់​រយៈពេល​ជិត​ ១១ ​ខែ បន្ទាប់ពី​ការដាក់​លក់​ដំណាក់កាល​ទី​ ១ ​ប្រកប​ដោយ​ជោគជ័យ​កាលពី​ខែធ្នូ​ឆ្នាំមុន Forest Harmony ជា​ក្រុមហ៊ុន​វិនិយោគ​រួម​រវាង​វិនិយោគិន​ក្នុង​ស្រុក និង​វិនិយោគិន​ជនជាតិ​បារាំង​កាលពី​ថ្ងៃ​សៅរ៍ បាន​ប្រកាស​បើក​ដំណើរការ​គម្រោង​អភិវឌ្ឍន៍​ដំណាក់កាល​ទី​ ២ ​របស់ខ្លួន​មាន​ឈ្មោះ​ថា Golf Harmony រួមមាន ទីលាន​វាយ​កូនហ្គោល និង​គម្រោង​អគារ​ខុនដូ​។

  • ភ្នំពេញ៖ បន្ទាប់​ពី​​​ការ​​ប្រឡង​​ប្រណាំង​​​ថត​វីដេអូ ​​ដើម្បី​ផ្សព្វផ្សាយ​​ពី​សក្តានុពល​នៃ​តំបន់​សហគមន៍​​​​ទេសចរណ៍ និង​​​​​អេកូ​ទេសចរណ៍​ ​បាន​រៀបចំ​​ ២ រដូវកាល​មក​​ហើយ​​ ខណៈ​​ការ​ប្រឡង​ប្រណាំង​រដូវកាល​ទី​៣ ​​​ឆ្នាំ ​២០២០​ ក៏​បាន​មក​​ដល់​​​។

  • ភ្នំពេញៈ រដ្ឋមន្ត្រីក្រសួង​អប់រំ​យុវជន និង​កីឡា​លោក​ ហង់ជួន ណារ៉ុន បានអនុញ្ញាត​ជា​​គោលការណ៍​ឱ្យ​គ្រឹះស្ថានសិក្សា​ឯកជន​ទាំងអស់​អាច​ដំណើរការឡើង​វិញ​នូវ​សេវា​រថយន្ត​ដឹក​សិស្ស សេវា​បណ្ណាល័យ សកម្មភាព​អប់រំ​កាយ និង​កីឡា និង​សេវា​អាហារដ្ឋាន ប៉ុន្តែ​ត្រូវអនុវត្ត​នូវ​គោលការណ៍​ប្រតិបត្តិ​ស្តងដា​ (SOP) ​ឱ្យ​ម៉ឺងម៉ាត់​។

  • តាកែវៈ មន្ត្រី​ការពារ​ទេសភាព​បឹង​ព្រែកល្ពៅ​ឱ្យ​ដឹងថា សម្បុក​សត្វ​ចង្កៀលខ្យង​ជាង​ ២ ០០០ ​សម្បុក​ បានបង្ហាញ​វត្តមាន​ជា​លើកដំបូង​ក្នុង​រយៈពេល​ជាង​ ១៥ ​ឆ្នាំ​ ដែល​នេះ​ជា​កំណត់ត្រា​ថ្មី​ដែល​ពុំ​ធ្លាប់មាន​នៅក្នុង​តំបន់​ការពារ​ទេសភាព​បឹង​ព្រែកល្ពៅ​ ស្ថិត​ក្នុងស្រុក​បុរីជលសា និង​ស្រុក​កោះអណ្តែត ខេត្តតាកែវ​។

  • ស្ទឹងត្រែង/ភ្នំពេញៈ គ្រឿងញៀន​ប្រភេទ​មេតំហ្វេតាមីន​ (ice) ​ចំនួន​ ៤១ ​គីឡូក្រាម​ត្រូវ​បាន​មន្ត្រី​អាវុធហត្ថ​ខេត្ត​ស្ទឹងត្រែង​បញ្ជូន​ទៅ​សាលាដំបូង​ខេត្ត​នាថ្ងៃទី​ ២៤ តុលា បន្ទាប់ពី​បង្ក្រាប​នៅ​ស្រុក​បុរី​ឣូរស្វាយសែនជ័យ​ពី​ថ្ងៃ​ទី​ ២៣ តុលា ខណៈ​ម្ចាស់​កំពុង​រត់គេច​ខ្លួន​។

  • ភ្នំពេញៈ ក្រសួង​អប់រំ យុវជន​ និង​កីឡា​កំពុង​សហការ​ជាមួយ​ក្រសួង​ប្រៃសណីយ៍ និង​ទូរគមនាគមន៍ ព្រមទាំង​ដៃគូ​អភិវឌ្ឍន៍ និង​វិស័យ​ឯកជន ដើម្បី​រៀបចំ​តភ្ជាប់​ប្រព័ន្ធ​អ៊ីនធឺណិត​ដល់​គ្រឹះស្ថានសិក្សា​សាធារណៈ​​ក្នុង​រយៈពេល​ ៤ ​ឆ្នាំ​ (​ឆ្នាំ​ ២០២០-២០២៣) ​ដើម្បី​ផ្ដល់​ការរៀន​ និង​ការបង្រៀន​តាមបែប​ឌីជីថល​​ដែល​ការអនុវត្ត​ត្រូវធ្វើ​ឡើងជា​ជំហានៗ​ចាប់ពី​ចុងឆ្នាំ​នេះ​ទៅ​។