មេនឆេស្ទ័រ៖ លោក Pep Guardiola (Pep) និយាយថា របួសរបស់ Fernandinho ចុងម៉ោងក្នុងប្រកួត ដែលក្រុម Manchester City (City) វាយបកឈ្នះក្រុម Porto ៣-១ សម្រាប់ការចាប់ផ្ដើមយុទ្ធនាការ Champions League នឹងក្លាយជាដំណឹងអាក្រក់មួយ ដោយសារក្រុមត្រូវឆ្លងកាត់កាលវិភាគប្រកួតញឹកស្អេក។
ក្រុម City ប្រឈមនឹងចំនួនប្រកួត ១៧ លើក ក្នុងឆ្នាំ ២០២០ ដោយក្នុងនោះ ៦ ប្រកួត ក្នុងវគ្គចែកពូល នៅ Champions League ដែលប្រើពេល ៧ សប្ដាហ៍ ខណៈកូនក្រុមរបស់លោក Pep ព្យាយាមចាប់ផ្ដើមរដូវកាលថ្មីជាមួយបញ្ហាជាច្រើន ដូចជាការមានពេលវេលាត្រៀមខ្លួនមិនគ្រប់គ្រាន់ការឆ្លងវីរុសកូរ៉ូណា និងកីឡាកររបួសច្រើន។
យប់ថ្ងៃពុធនោះ ក្រុម City អត់មានវត្តមានរបស់ Kevin De Bruyne ឡើយ ដោយសាររបួស តែអាចវាយបកដណ្ដើមបានជ័យជម្នះដំបូងរបស់ខ្លួននៅ Champions League នេះ ក្រោយត្រូវក្រុមភ្ញៀវ Porto នាំមុខ ដោយការស៊ុតយ៉ាងស្អាតពីខ្សែប្រយុទ្ធ Luis Diaz។
ខ្សែប្រយុទ្ធ Sergio Aguero ជួយម្ចាស់ផ្ទះតាមស្មើវិញ មុនចប់វគ្គទី១ ដោយការស៊ុតបាល់ពិន័យ ១១ ម៉ែត្រ ហើយចូលដល់វគ្គទី ២ Ilkay Gundogan ទម្លុះសំណាញ់ទី ដោយការទាត់ហ្វ្រ៊ីឃីកយ៉ាងល្អឥតខ្ចោះឱ្យក្រុមនាំមុខវិញម្ដង មុននឹងកីឡាករចំណូលថ្មី Ferran Torres បន្ថែមគ្រាប់ជ័យជម្នះចុងក្រោយ រុញក្រុម City ឱ្យឈរនៅទីកំពូលក្នុងពូល C។
លោក Pep ថ្លែងថា៖ «វាជាការចាប់ផ្ដើមដ៏ល្អសម្រាប់ពួកយើង។ យើងដឹងថា ការប្រកួតនៅផ្ទះ ចាំបាច់ត្រូវឈ្នះឱ្យបាន។ សម្រាប់ Fernandinho គឺជាដំណឹងអាក្រក់។ គេមានបញ្ហាសាច់ដុំ ដូច្នេះ គេអាចនឹងមានរបួសធ្ងន់។ អំឡុងពេលនេះ យើងត្រូវការគ្រប់គ្នា ជាមួយនឹងកាលវិភាគនេះ តែវាកើតឡើងនូវបញ្ហា ដែលយើងមិនចង់ជួប»។
លោក Pep បានសារភាព កាលពីថ្ងៃអង្គារថា នៅតែមានអារម្មណ៍ខុស ក្នុងការដាក់កីឡាករ និងទម្រង់ថ្មី ដែលនាំឱ្យក្រុម City ធ្លាក់ពី Champions League ក្នុងវគ្គ ៨ ក្រុម ក្នុងខែសីហា ដោយសារក្រុម Lyon។
បុរសវ័យ ៤៩ ឆ្នាំ ស្ថិតក្នុងឆ្នាំចុងក្រោយនៃកិច្ចសន្យារបស់ខ្លួនជាមួយក្រុម ហេតុដូច្នេះ នេះជាលទ្ធភាពចុងក្រោយរបស់គាត់ ក្នុងការជួយដណ្ដើមពានដ៏មានតម្លៃ ដែលក្រុមនៅ Premier League ចង់បានបំផុត តាំងពីនាំយកគាត់មកកាន់ក្រុមក្នុងឆ្នាំ ២០១៦៕ AFP/VN