.jpg)
រថយន្តរបស់ Hamilton កំពុងនាំមុខ សម្រាប់ការប្រណាំង កាលពីថ្ងៃអាទិត្យ។ AFP
ប៉ារីស៖ កីឡាករសញ្ជាតិអង់គ្លេស Lewis Hamilton បានព្យាយាមទប់ទឹកភ្នែករបស់ខ្លួន ពេលដែលអាចឈ្នះជើងឯកពិភពលោកផ្នែកកីឡាប្រណាំងរថយន្ត Formula One ស្មើនឹងកំណត់ត្រាចំនួន ៧ ដង របស់អតីតកីឡាករ Michael Schumacher កាលពីថ្ងៃអាទិត្យ ដែលបានធ្វើឱ្យរូបគេក្លាយជាអ្នកប្រណាំងអាជីពដ៏ជោគជ័យបំផុតក្នុងប្រវត្តិសាស្ត្ររបស់កីឡានេះ។
កីឡាករដែលជាសន្លឹកអាត់របស់ក្រុម Mercedes រូបនេះ បានបង្ហាញពីជំនាញដ៏ប៉ិនប្រសប់សម្រាប់ការប្រណាំងក្នុងស្ថានភាពសើម ហើយរអិលរហូតអាចដណ្ដើមបាននូវជ័យជម្នះលើកទី៩៤ នៅឯទីលានប្រណាំងកម្មវិធី Turkish Grand Prix ហើយបានធានាឱ្យគេនូវជើងឯកពិភពលោករដូវកាលនេះ ទាំងដែលការប្រណាំងនៅសល់ ៣ ដំណាក់កាលទៀត។
មានតែ Schumacher ទេ ដែលឈ្នះជើងឯកពិភពលោក ៧ ដងនេះ ពោលគឺជាតួលេខដែលធ្លាប់ត្រូវគេគិតថា ទំនងជាមិនមានអ្នកណាធ្វើបានស្មើឡើយ តែគ្រប់កំណត់ត្រាខ្ពស់បំផុតរបស់អតីតអ្នកប្រណាំងសញ្ជាតិអាល្លឺម៉ង់ ត្រូវបានផ្ទេរឱ្យ Hamilton ហើយ។
ជាមួយគ្នានេះ កំណត់ត្រាដែល Hamilton ធ្វើបានមានដូចជាឈ្នះការប្រណាំងច្រើនជាងគេ ដណ្ដើមទីតាំងចេញដំណើរច្រើនជាងគេ និងបញ្ចប់ការប្រណាំងដោយការបានឡើងទៅឈរលើវេទិកាជយលាភីបានច្រើនជាងគេ។
ការប្រណាំងដំណាក់កាលទី ១៤ នៅប្រទេសតួកគី ដែលធ្វើឡើងដោយបិទទ្វារ (គ្មានទស្សនិកជន) នេះ Hamilton បានបញ្ជាយានយន្តរបស់ខ្លួនឱ្យទៅដល់ទីព្រ័ត្រមុនកីឡាករដទៃៗទៀតជាមួយនឹងថិរវេលា ១:៤២:១៩.៣១៣ ម៉ោង ពោលគឺមុនកីឡាករម៉ិកស៊ិក Sergio Perez របស់ក្រុម Racing Point-BWT Mercedes ចំនួន ៣១.៦៦៣ វិនាទី និងកីឡាករ Sebastian Vettel របស់ក្រុម Ferrari ចំនួន ៣១.៩៦០ វិនាទី។
«អរគុណច្រើនទាំងអស់គ្នា។ នេះគឺសម្រាប់ក្មេងៗទាំងអស់ នៅកន្លែងដទៃ ដែលគិតថាវាមិនអាចទៅរួច។ អ្នកអាចធ្វើវាបានដូចគ្នា។ ខ្ញុំជឿនលើអ្នកទាំងអស់គ្នា»។ នេះជាអ្វីដែល Hamilton បានស្រែកតាមវិទ្យុ ក្រោយកាន់ទង់តំណាងកីឡាប្រណាំងរថយន្តនេះ។
កីឡាកររូបនេះ បន្តថា៖ «៧ ដង គ្រាន់តែជារឿងនឹកស្មានមិនដល់ តែនៅពេលអ្នកបានធ្វើការងារជាមួយក្រុមមនុស្សដ៏អស្ចារ្យបែបនេះ ហើយអ្នកពិតជាមានជំនឿជាក់ចំពោះគ្នាទៅវិញទៅមកនោះ វាគ្មានអ្វីដែលយើងមិនអាចសម្រេចជាមួយគ្នាបាននោះឡើយ។ ខ្ញុំមានអារម្មណ៍ ដូចទើបតែចាប់ផ្ដើមដំបូងអ៊ីចឹង»។
ក្នុងតារាងពិន្ទុសរុបក្រោយការប្រណាំងបញ្ចប់បាន ១៤ ដំណាក់កាល Hamilton មានពិន្ទុរួម ៣០៧ ពិន្ទុ នៅលេខ ១ ខណៈមិត្តរួមក្រុមរបស់ខ្លួន Valtteri Bottas នៅលេខ ២ មាន ១៩៧ ពិន្ទុ ហើយអ្នកលេខ ៣ Max Verstappen របស់ក្រុម Red Bull មាន ១៧០ ពិន្ទុ៕ AFP/VN
