ក្រុងណឺនប៊ឺក: កីឡាករ Lewis Hamilton បានសរសើរចំពោះអតីតកីឡាការ Michael Schumacher សម្រាប់ការបើកផ្លូវ ក្នុងវិស័យប្រណាំងរថយន្ត Formula One ហើយធ្វើការអរគុណចំពោះក្រុម Mercedes សម្រាប់ការប្រថុយផ្ដល់ទំនុកចិត្តលើក្មេងប្រុសស្បែកខ្មៅ ១ រូប ក្រោយតាមស្មើកំណត់ត្រាឈ្នះ ៩១ លើក សម្រាប់ការប្រណាំងកម្មវិធី Grand Prix កាលពីថ្ងៃអាទិត្យ។
និយាយនៅឯសន្និសីទកាសែតសិប្បនិមិត្ត ក្រោយឈ្នះការប្រណាំងដំណាក់កាលទី ១១ កម្មវិធី Eifel Grand Prix នៅអាល្លឺម៉ង់ ដែលជាជ័យជម្នះទី ៧ របស់ខ្លួននៃរដូវកាលនេះ កីឡាកររបស់ចក្រភពអង់គ្លេស ដែលមកំពុងមានពិន្ទុនាំមុខដាច់ឆ្ងាយបាននិយាយសរសើរ និងគោរពចំពោះអតីតកីឡាករសញ្ជាតិអាល្លឺម៉ង់ Schumacher ដែលកំពុងគ្រប់គ្រងកំណត់ត្រាជើងឯកពិភពលោក ៧ សម័យកាល។
Hamilton ដែលត្រូវការជើងឯកតែម្ដងទៀត ដើម្បីតាមទាន់កំណត់ត្រាខាងលើបាននិយាយថា៖ «លេខ ៩១ នោះ ឆ្ងាយណាស់ ហើយពេលវានៅឆ្ងាយពេក វាជារឿងពិបាកណាស់សម្រាប់គ្រប់គ្នា ក្នុងការយល់ឱ្យបានពេញលេញថា តើវាលំបាកយ៉ាងដូចម្ដេច ដើម្បីដណ្ដើមបានជ័យជម្នះ ៩១ ដងនោះ»។
កីឡាករវ័យ ៣៥ ឆ្នាំ បានបន្តថា៖ «ខ្ញុំគ្រាន់តែចង់អរគុណដល់ក្រុម Mercedes សម្រាប់ការផ្ដល់ឱកាសឱ្យក្មេងស្បែកខ្មៅម្នាក់ ពេលខ្ញុំមានអាយុ ១៣ ឆ្នាំ ហើយធ្វើការគាំទ្រខ្ញុំរហូតមក»។
មុនពេល រូបគេមកស្នងតំណែងរបស់ Schumacher នៅក្រុមប្រណាំង Mercedes ក្នុងឆ្នាំ ២០១៣ កីឡាករ Hamilton ជាជើងឯកពិភពលោកម្ដងរួចទៅហើយ ដែលជាជយលាភីដំបូងរបស់គេ កាលនៅបើកបរឱ្យក្រុម McLaren ក្នុងឆ្នាំ ២០០៨។
សម្រាប់ការប្រណាំងកាលពីថ្ងៃអាទិត្យ នាប្រទេសអាល្លឺម៉ង់នោះ រថយន្ដលេខ ៤៤ របស់ Hamilton បានទៅដល់ទីព្រ័ត្រមុនកីឡាករដទៃជាមួយនឹងថិរវេលា ១:៣៥:៤៩.៦៤១ ម៉ោង ពោលគឺនាំមុខអ្នកមកដល់បន្ទាប់ Max Verstappen របស់ក្រុមគូប្រជែង Red Bull Racing-Honda ៤.៤៧០ វិនាទី។
សរុបការប្រណាំងទាំង ១១ដំណាក់កន្លងមក កីឡាករ Hamilton ឈរទី១ ក្នុងតារាងពិន្ទុរួម ដោយមាន ២៣០ ពិន្ទុ តាមដោយមិត្តរួមក្រុម Valtteri Bottas មាន ១៦១ ពិន្ទុ ខណៈ Verstappen លេខ ៣ មាន ១៤៧ ពិន្ទុ៕ AFP/VN