.jpg)
ក្រុងឡុងដ៍៖ ក្រុមដែលកំពុងលេងនៅក្របខ័ណ្ឌ Premier League របស់ប្រទេសអង់គ្លេស គឺ Southampton បានប្រកាសឲ្យដឹងកាលពីថ្ងៃអង្គារថា គ្រូបង្វឹកបច្ចុប្បន្ន លោក Ralph Hasenhuttl យល់ព្រមបន្តកិច្ចសន្យាថ្មីរយៈពេល ៤ ឆ្នាំទៀត។
លោក Hasenhuttl វ័យ ៥២ ឆ្នាំ ត្រូវបានតែងតាំងជាអ្នកចាត់ការរបស់ក្រុមនៅទឹកដី St Mary មួយនេះ កាលពីខែធ្នូ ឆ្នាំ ២០១៨ ហើយលោកទទួលបានមេរៀនដ៏ជូរចត់ទាំងមិនគួរឲ្យជឿ ដោយសារបរាជ័យយ៉ាងធ្ងន់ធ្ងរនៅផ្ទះខ្លួនឯង ក្រោមថ្វីជើងរបស់ក្រុម Leicester City ក្នុងលទ្ធផល ០-៩ កាលពីខែតុលា ឆ្នាំមុន។
មុនការប្រកួតប្រជែងនៅលីកកំពូលរបស់អង់គ្លេស ត្រូវបានផ្អាកក្នុងខែមីនា ដោយសារតែការកើតមាននូវជំងឺផ្លូវដង្ហើមថ្មីកូវីដ ១៩ ក្រុម Southampton ឈរនៅចំណាត់ថ្នាក់ទី ១៤ ពោលគឺមាន ៧ ពិន្ទុពីលើក្រុមដែលត្រូវធ្លាក់ទៅលីកលំដាប់ទី២ ហើយក្រោយពីបានចុះកុងត្រាថ្មីនេះ លោក Hasenhuttl និយាយថា លោកគ្មានការរារែកចិត្តក្នុងការបន្តកិច្ចសន្យា ដែលអាចឲ្យគាត់នៅជាមួយក្លិបរហូតដល់ឆ្នាំ ២០២៤ នោះឡើយ។
បុរសសញ្ជាតិអូទ្រីសបានប្រាប់ថា៖ «សម្រាប់ខ្ញុំ គឺជាការសម្រេចចិត្តងាយៗ។ ងាយព្រោះទំនាក់ទំនង ដែលខ្ញុំបានបង្កើតជាមួយក្លិប កីឡាករ និងអ្នកគាំទ្រ ហើយក៏ព្រោះទំនាក់ទំនង ដែលពួកគេមានជាមួយខ្ញុំដូចគ្នាដែរ។ ខ្ញុំបាននិយាយ ពេលខ្ញុំមកដល់ក្លិបនេះថា ពួកយើងកំពុងចាប់ផ្ដើមលើដំណើរផ្លូវដ៏វែងឆ្ងាយ ហើយនិយាយដែរថា ដំណើរដ៏វែងឆ្ងាយនោះ នឹងនាំមកនូវភាពរីករាយ និងក្ដីសង្ឃឹម»។
សម្រាប់នាយកប្រតិបត្តិក្លិប លោក Martin Semmens បានថ្លែងពាក់ព័ន្ធនឹងលោកគ្រូ-បង្វឹកម្នាក់នេះថា៖ «តាំងពីថ្ងៃដំបូង លោក Hasenhuttl ចាប់-ផ្ដើមមានឥទ្ធិពលវិជ្ជមានលើក្លិប មនុស្សក្នុងក្លិប និងអ្នកគាំទ្ររបស់យើង។ គាត់បានមកចូលរួមជាមួយក្រុម ចំពេលដែលក្លិបកំពុងត្រូវការអ្នកដឹកនាំដ៏ពូកែម្នាក់ ហើយគាត់បានផ្ដល់ឲ្យពួកយើងនូវអ្វីដែលយើងកំពុងចង់បាននោះ»៕ AFP/VN
