ក្រុង Madrid៖ ខ្សែប្រយុទ្ធ Eden Hazard កំពុងចាប់ផ្ដើមបង្ហាញទម្រង់លេងល្អបំផុតរបស់ខ្លួន ហើយវាមិនអាចកើតឡើងភ្លាមៗសម្រាប់ក្រុម Real Madrid នៅឡើយទេ។
ក្លិប Real នឹងប្រកួតនៅក្នុងទឹកដីរបស់ខ្លួនឯងជាមួយក្រុម Galatasaray ក្នុងក្របខ័ណ្ឌ Champions League នៅថ្ងៃពុធនេះ ហើយប្រសិនបើពួកគេទទួលជោគជ័យ ពួកគេនឹងមានឱកាសឡើងទៅវគ្គបន្តនៅក្នុងពូល A។
កីឡាករ Hazard បានស៊ូទ្រាំនឹងការចាប់ផ្តើមដ៏ខកចិត្តនៅប្រទេស អេស្ប៉ាញ ជាទីដែលមានការរំពឹងទុកយ៉ាងខ្លាំងក្រោយពីរូបគេបានរង់ចាំការដោះដូរក្នុងតម្លៃខ្លួនចំនួន ១០០ លានអឺរ៉ូ ប្រហែលជាង ១១១ លានដុល្លារអាមេរិក មកពីក្លិប Chelsea កាលពីខែមិថុនា។
រយៈពេល ១ សប្តាហ៍ ក្រោយមកក្រុមអ្នកគាំទ្រ ៥០ ០០០ នាក់ បានសម្រុកចូលទស្សនានៅក្នុងកីឡដ្ឋាន Santiago Bernabeu ដើម្បីឃើញកីឡាករ Hazard ពាក់អាវរបស់ក្លិបនេះ ខណៈអ្នកខ្លះថែមទាំងរត់ទៅជិតច្រកចូល ដើម្បីដណ្តើមកន្លែងល្អទៀតផង។
នៅពេលអ្នកគាំទ្រចេញពីកីឡដ្ឋានវិញ កីឡាករ Hazard បានធ្វើសន្និសីទកាសែតលើកដំបូងរបស់ខ្លួននៅកីឡដ្ឋាននេះ ដោយប្រាប់អ្នកកាសែតថា រូបគាត់ចង់ក្លាយជាកីឡាករឆ្នើមម្នាក់នៅក្នុងក្រុម Real Madrid នៅពេលអនាគត។
កីឡាករ Hazard បាននិយាយថា៖ «ខ្ញុំមិនទាន់ជាកីឡាករឆ្នើមម្នាក់នៅឡើយទេ ប៉ុន្តែខ្ញុំសង្ឃឹមថា ខ្ញុំនឹងក្លាយជាបែបនោះនៅថ្ងៃណាមួយ»។
ប៉ុន្តែការប្រកួតបើកឆាករបស់កីឡាកររូបនេះបានធ្វើឲ្យមានការស្រងាកចិត្តយ៉ាងខ្លាំងដោយសាររូបគេលេងមិនបានល្អដូចអ្វីដែលក្រុមអ្នកគាំទ្ររំពឹងទុកពីមុនមក និងបានធ្វើឲ្យអ្នកគាំទ្រ និងអ្នកកាសែតរិះគន់យ៉ាងខ្លាំងផងដែរ។
ហើយនៅថ្ងៃមុនមានការប្រកួតដំបូងរបស់ក្លិប Real នៅរដូវកាលនេះនៅក្រៅទឹកដីជាមួយក្លិប Celta Vigo នោះ កីឡាករ Hazard បានប្រឹងប្រែងហ្វឹកហាត់យ៉ាងខ្លាំង ដើម្បីបង្កើតភាពខ្លាំង និងអស្ចារ្យសម្រាប់ក្លិបនេះ។
កីឡាកររូបនេះបានអង្គុយមើលការប្រកួត ៣ លើកមុនពេលចាប់ផ្តើមការប្រកួតលើកដំបូងរបស់ខ្លួនជាមួយក្រុម Paris Saint-Germain (PSG) ប៉ុន្តែវាហាក់ដូចជារាត្រីមួយដែលមិនអាចបំភ្លេចបាននៅពេលក្លិប Real ត្រូវបានបំបាក់ដោយលទ្ធផល ៣-០។
កីឡាករ Hazard បានចូលលេងនៅពេលប្រកួតជាមួយក្លិប Osasuna ចំពេលមានរបាយការណ៍ថា រូបគាត់អាចមានប្រៀប ហើយបន្ទាប់មករូបគេរកបានគ្រាប់បាល់ដំបូងរបស់ខ្លួននៅពេលប្រកួតជាមួយនឹងក្លិប Granada ជាការបញ្ចប់ដ៏រីករាយតាមការសន្យារបស់ខ្លួនថា នឹងបង្ហាញទម្រង់លេងឲ្យបានល្អបំផុត។
លោក Zinedine Zidane បាននិយាយកាលពីខែកញ្ញាថា៖ «យើងដឹងពីគុណភាពរបស់កីឡាករដែលយើងមាន ហើយយើងដឹងថា គាត់នឹងទៅជាយ៉ាងណានៅពេលខាងមុខ»។
គ្រូបង្វឹករូបនេះបានបន្ថែមថា៖ «គ្រប់គ្នារំពឹងខ្លាំងពីគាត់ ហើយគាត់ដឹងពីរឿងនោះ ប៉ុន្តែយើងគាំទ្រគាត់ ហើយនៅពេលឆ្លងកាត់ការប្រកួត ខ្ញុំប្រាកដថា គាត់នឹងក្លាយជាកីឡាករដែលយើងចង់បានគាត់លេងនៅក្លិប Real Madrid នេះ»។
លោក Zidane បាននិយាយពីសប្ដាហ៍មុនថា៖ «គ្រប់គ្នាចង់ឃើញ Hazard លេងឲ្យកាន់តែល្អ ប៉ុន្តែខ្ញុំឃើញគាត់រីកចម្រើនកាន់តែខ្លាំងឡើងៗជារៀងរាល់ថ្ងៃ ហើយនៅទីបំផុតគាត់នឹងឈានដល់កម្រិតនោះជាមិនខានឡើយ»៕ AFP/SN