.jpg)
ខ្សែប្រយុទ្ធរបស់ជប៉ុន Keisuke Honda (ឆ្វេង) បានសម្រេចចាកចេញពីក្លិប Melbourne Victory។ AFP
ទីក្រុង Melbourne: កំពូលតារាបាល់ទាត់របស់ជប៉ុន Keisuke Honda ហើយក៏ជាអ្នកចាត់ការទូទៅក្រុមជម្រើសជាតិកម្ពុជាផងនោះ បានប្រកាសពីថ្ងៃអង្គារថាខ្លួននឹងចាកចេញពីក្លិប Melbourne Victory នៅសប្ដាហ៍នេះ ក្រោយពីចូលរួមជាមួយក្លិបរបស់អូស្ត្រាលីមួយនេះបាន ១ រដូវកាលដោយសារខ្សែប្រយុទ្ធរូបនេះចង់បានបទពិសោធថ្មីៗទៀត។
អតីតខ្សែប្រយុទ្ធក្រុម AC Milan ដ៏ល្បីឈ្មោះក្នុងវិស័យបាល់ទាត់នៅអាស៊ី Keisuke Honda មានការចាប់អារម្មណ៍យ៉ាងខ្លាំងពីក្រុមអ្នកគាំទ្រចំពោះទម្រង់លេងដ៏ល្អរបស់គេនៅដើមរដូវកាលនេះ។ ទោះយ៉ាងណាការរងរបួសគន្លាក់ជើងបានធ្វើឲ្យកីឡាកររូបនេះមិនបានចូលរួមការប្រកួតចំនួន ៩ លើកនៅពាក់កណ្ដាលរដូវកាលនេះទេ។
កីឡាករ Honda បាននិយាយក្នុងរបាយការណ៍ថា៖ «ខ្ញុំមានមោទនភាពខ្លាំងណាស់ដែលបានចូលរួមជាមួយក្លិប Melbourne Victory និងសូមអរគុណចំពោះការអនុញ្ញាតឲ្យខ្ញុំមានឱកាសលេងនៅក្នុងប្រទេសអូស្ត្រាលីបែបនេះ»។
អតីតខ្សែប្រយុទ្ធរូបនេះបានបន្តថា៖ «ឥឡូវខ្ញុំត្រូវចាកចេញហើយ ដើម្បីរកបទពិសោធថែមទៀត ប៉ុន្តែខ្ញុំនឹងមិនបំភ្លេចគ្រាកាលនៅក្លិបនេះទេ ហើយខ្ញុំសូមបួងសួងឲ្យក្លិបនេះមានសំណាងល្អទទួលបានជ័យជម្នះជាបន្តទៀត នៅពេលអនាគត»។
កីឡាករ Honda បានលេង ២៣ ប្រកួតក្នុងចំណោមការប្រកួតទាំងអស់ដោយរូបគេរកបានចំនួន ៨ គ្រាប់ ហើយការប្រកួតចុងក្រោយ Honda សម្រាប់ក្លិប Victory នេះគឺនៅក្នុងការប្រកួតក្របខ័ណ្ឌ AFC Champions League ដែលប៉ះជាមួយក្រុម Sanfrecce Hiroshima នៅប្រទេសជប៉ុនកាលពីថ្ងៃពុធ។ ចំណែកការប្រកាសចាកចេញរបស់ Honda នេះបានធ្វើឡើងរយៈពេល ១ ថ្ងៃ បន្ទាប់ពីគ្រូបង្គោលក្រុម Victory លោក Kevin Muscat បានលាលែងពីតំណែង។
ប្រធានប្រតិបត្តិក្លិប Melbourne Victory លោក Trent Jacobs បាននិយាយថា៖ «ខ្សែប្រយុទ្ធ Honda គឺជាកីឡាករជំនាញម្នាក់នៅគ្រប់ដំណាក់កាលទាំងអស់ ហើយយើងសំណាងដែលមានគាត់នៅជាមួយយើងនៅក្លិប Melbourne Victory នៅរដូវកាលនេះ»។
លោក Jacobs បានបន្តថា៖ «ជាការពិតគាត់គឺជាអ្នកមានទេពកោសល្យដ៏អស្ចារ្យមួយនៅលើទីលានប្រកួត ហើយអ្វីៗដែលគាត់បានជួយក្លិបយើងកន្លងមកនេះបានជួយឲ្យយើងរីកចម្រើននៅរដូវកាលនេះ»។
កីឡាករឆ្នើមវ័យ ៣២ ឆ្នាំ Honda បានចូលនិវត្តន៍ពីបាល់ទាត់អន្តរជាតិក្រោយពីព្រឹត្តិការណ៍ World Cup នៅប្រទេសរុស្ស៊ីកាលពីឆ្នាំមុន ហើយបានចូលរួមក្លិប Victory សម្រាប់រដូវកាលឆ្នាំ ២០១៨-២០១៩ ក្នុងនាមជាកីឡាករមិនយកប្រាក់កម្រៃ ក្រោយពីចាកចេញពីក្លិប Pachuca របស់ប្រទេសម៉ិកស៊ិក។
កីឡាករដែលត្រូវបានគេចំណាំតាមរយៈសក់ប៉ះ និងពណ៌ទង់ដែង Honda បានចំណាយពេល ៤ រដូវកាលនៅក្លិប AC Milan ហើយរូបគេក៏ធ្លាប់លេងឲ្យក្លិប WV-Venlo នៅហូឡង់ និងក្លិប CSKA Moscow ផងដែរ។ បន្ថែមលើនេះក្នុងពេលស្នាក់នៅក្នុងទីក្រុង Melbourne ប្រទេសអូស្ត្រាលីនោះ Honda ក៏មានភារកិច្ចជាអ្នកចាត់ការទូទៅនៃក្រុមជម្រើសជាតិកម្ពុជាផងដែរ៕ SN
