.jpg)
លោក សៅ សុខា (ស្តាំ) បានចាប់ដៃស្វាគមន៍ Keisuke Honda នៅក្នុងសន្និសីទកាសែត។ ស្រេង ម៉េងស្រ៊ុន
ភ្នំពេញៈ ខ្សែប្រយុទ្ធអន្តរជាតិរបស់ជប៉ុន Keisuke Honda បានសុំឲ្យសហព័ន្ធកីឡាបាល់ទាត់កម្ពុជា (FFC) រួមទាំងបណ្តាក្លិបលេងនៅលីកកំពូលកម្ពុជា និងភាគីពាក់ព័ន្ធរួមគ្នា ដើម្បីអភិវឌ្ឍបាល់ទាត់កម្ពុជា និងក្រុមជម្រើសជាតិកម្ពុជាឲ្យមានការរីកចម្រើន ពិសេសមានគុណភាពលេងពិតប្រាកដ ទៅតាមទម្រង់លេងរបស់ខ្លួនមួយ។
Keisuke Honda ដែលត្រូវបានលោក សៅ សុខា ប្រធានសហព័ន្ធកីឡាបាល់ទាត់កម្ពុជាប្រកាសតែងតាំងឲ្យធ្វើជាអ្នកដឹកនាំក្រុមជម្រើសជាតិកម្ពុជា រយៈពេល ២ ឆ្នាំ ក្នុងនាមជាអ្នកស្ម័គ្រចិត្ត មិនយកប្រាក់ខែនោះ មានទស្សនវិស័យ ចង់បង្កើតឲ្យមានទម្រង់លេងច្បាស់លាស់មួយសម្រាប់ក្រុមកម្ពុជា ហើយ Honda បានសន្យាថា នឹងធ្វើឲ្យអ្នកគាំទ្រ មានអារម្មណ៍ភ្ញាក់ផ្អើលជាមួយការរីកចម្រើនរបស់ក្រុមជម្រើសជាតិកម្ពុជា។
«អ្វីដែលខ្ញុំចង់ជួយបាល់ទាត់កម្ពុជានោះបានក្លាយជាការពិតហើយ ព្រោះខ្ញុំបានចុះកុងត្រាជាមួយ FFC រួចហើយក្នុងការជួយអភិវឌ្ឍបាល់ទាត់កម្ពុជា។ ខ្ញុំប្រហែលជាមិនអាចចុះជាប់ជាមួយក្រុមកម្ពុជាទេ ព្រោះខ្ញុំត្រូវលេងបាល់ទាត់រាល់សប្តាហ៍ដែរ ប៉ុន្តែអ្វីដែលខ្ញុំអាចជួយបាន ខ្ញុំនឹងជួយឲ្យអស់ពីសមត្ថភាព។ ខ្ញុំចង់បង្កើតទម្រង់លេងពិតប្រាកដមួយសម្រាប់ក្រុមកម្ពុជា ដែលធ្វើម៉េចត្រូវចាប់ផ្តើមចេញពីសហព័ន្ធទៅ បន្ទាប់មកឈានទៅកាន់ក្លិប និងក្រុមថ្នាលកម្ពុជាផងដែរ»។
Honda បានបន្ថែមថា៖ «យើងធ្វើយ៉ាងណា ឲ្យមានទម្រង់លេងបែបស្តង់ដារមួយសម្រាប់ក្រុមកម្ពុជា ព្រោះការលេងបាល់ បើយើងមិនធ្វើវាឲ្យទៅជាគោលដៅតែមួយទេ គឺបាល់ទាត់ មិនអាចអភិវឌ្ឍបានត្រឹមត្រូវនោះទេ។ យើងត្រូវបង្កើតគោលដៅមួយឲ្យច្បាស់លាស់ បន្ទាប់មកយើងត្រូវតែធ្វើវាដោយអត់ធ្មត់ និងពុះពារបំផុត ទើបយើងបានសម្រេច ហើយនេះជាការងាររបស់ខ្ញុំ នៅប្រទេសកម្ពុជា»។
កីឡាករវ័យ ៣២ ឆ្នាំ Honda ដែលបានហៅខ្លួនឯងថា ជាគ្រូបង្វឹកមិនផ្ទាល់នោះ បានបន្តថា៖ «ក្នុង ១ សប្តាហ៍ ខ្ញុំនឹងធ្វើការតាមវីដេអូ conference ចំនួន ២ ដងជាមួយក្រុមការងាររបស់ខ្ញុំនៅកម្ពុជា។ ខ្ញុំនឹងព្យាយាមរកដំណោះស្រាយ បំពេញភាពខ្វះខាតបាល់ទាត់នៅកម្ពុជា។ ខ្ញុំនឹងធ្វើឲ្យទស្សនិកជន និងអ្នកគាំទ្រនៅកម្ពុជាទាំងអស់ឃើញថា បាល់ទាត់នៅកម្ពុជា មានការផ្លាស់ប្តូរហើយ បាល់ទាត់នៅកម្ពុជា មានការរីកចម្រើនហើយ គឺខ្ញុំនឹងធ្វើឲ្យពួកគាត់ មានចំណាប់អារម្មណ៍បែបនេះ»។
កីឡាករទើបចុះកុងត្រាលេងឲ្យក្លិប Melbourne Victory របស់អូស្ត្រាលី រូបនេះបានបញ្ជាក់ថា៖ «គោលបំណងរបស់ខ្ញុំ គឺខ្ញុំនឹងធ្វើឲ្យពិភពបាល់ទាត់ខ្មែរ កាន់តែអ៊ូអរជាងនេះថែមទៀត ហើយខ្ញុំគិតថា ការអភិវឌ្ឍបាល់ទាត់ ជាការអភិវឌ្ឍមួយ ដែលធ្វើឲ្យកម្ពុជា កាន់តែមានការទទួលស្គាល់ពីប្រទេសផ្សេងៗទៀត។ គម្រោងនេះ ជាគម្រោងនៃការអភិវឌ្ឍដ៏អស្ចារ្យ ហើយខ្ញុំរំពឹងថា យើងនឹងសម្រេចគោលដៅរួមរបស់យើង ដើម្បីជួយឲ្យបាល់ទាត់កម្ពុជារីកចម្រើន ដូច្នេះខ្ញុំសង្ឃឹមថា នឹងមានការចូលរួមសហការពីអ្នកទាំងអស់គ្នា»។
ចំណែក លោក សៅ សុខា បានថ្លែងថា៖ «ខ្ញុំគិតថា វត្តមានរបស់លោក Honda នៅពេលនេះ គឺបានរួមចំណែកបន្ថែមទៀត ដើម្បីគាំទ្រទៅដល់គម្រោងយុទ្ធសាស្ត្រអភិវឌ្ឍបាល់ទាត់នៅកម្ពុជា ហើយវត្តមានកីឡាករអន្តរជាតិ ដែលមានបទពិសោធរូបនេះនឹងធ្វើឲ្យបច្ចេកទេសនៃការលេងបាល់ទាត់ និងលទ្ធផលនៃការលេងរបស់ក្រុមជម្រើសជាតិកម្ពុជា នឹងទទួលបានលទ្ធផលល្អ ក្នុងពេលខាងមុខនេះ អ៊ីចឹងហើយ ខ្ញុំផ្តល់ជំនឿទៅលើគ្រូបង្វឹក និងកីឡាកររបស់យើងថា ពិតជារួមគ្នា ដើម្បីធ្វើឲ្យក្រុមកម្ពុជាមានគុណភាពលេងខ្លាំង»៕
