ក្រុងមីឡេន: Zlatan Ibrahimovic ម៉ៅផ្ដាច់ ២ គ្រាប់ម្នាក់ឯង អំឡុងការប្រកួត ដែលក្រុម AC Milan ឈ្នះ Cagliari ២-០ ក្រៅផ្ទះ កាលពីថ្ងៃចន្ទ ខណៈលទ្ធផលនេះ ជួយឱ្យបានឈរពីលើក្រុមគូប្រជែងរួមក្រុង Inter Milan នៅទីកំពូលនៃតារាងក្របខ័ណ្ឌ Serie A អ៊ីតាលី។
២ គ្រាប់ របស់ខ្សែប្រយុទ្ធ Ibrahimovic វ័យ ៣៩ ឆ្នាំ ដែលទើបលេងលើកដំបូង ក្រោយអវត្តមាន ២ ខែ ដោយសាររបួស គ្រាប់ទី១ កើតឡើងនៅនាទីទី៧ ដោយសារស៊ុតបាល់ពិន័យ ១១ ម៉ែត្រ ខណៈគ្រាប់ទី២ ធ្វើបានសម្រេចនៅនាទីទី៥២។
ក្រុម Milan ដែលដាក់គោលដៅឈ្នះពានលីគកំពូលជាលើកដំបូង គិតតាំងពីឆ្នាំ ២០១១ ពេល Ibrahimovic លេងរដូវកាលចុងក្រោយជាមួយក្រុម កំពុងនាំមុខដាច់ ៣ ពិន្ទុលើ Inter ដែលបានយកឈ្នះក្រុមជើងឯកចាស់ Juventus ២-០ នៅកីឡដ្ឋាន San Siro កាលពីថ្ងៃអាទិត្យ។
គ្រូបង្វឹករបស់ក្រុម Milan លោក Stefano Pioli បានថ្លែងថា៖ «ជ័យជម្នះនេះ គឺជាសញ្ញាមួយយ៉ាងពិសេស ក្នុងការបង្ហាញពីខ្លួនពួកយើងថា ល្អជាង Inter។ យើងទាំងអស់គ្នាមានបំណងចង់នាំក្រុម Milan ត្រឡប់មកទីកំពូលវិញ។ ក្រុមទាំងមូល នឹងធ្វើគ្រប់យ៉ាង តាំងពីដើមដល់ទីបញ្ចប់»។
លោក Pioli បានបន្តថា៖ «ឥឡូវនេះ យើងមានការប្រកួតដ៏សំខាន់មួយទល់នឹងក្រុម Atalanta (ថ្ងៃសៅរ៍) ដូច្នេះ យើងត្រូវផ្ដោតចំពោះការប្រកួតនោះ ហើយបន្ទាប់មក ក្នុងខែមីនា និងមេសា យើងនឹងឃើញថា តើយើងឈរនៅទីតាំងណា?»។
កីឡាករ Ibrahimovic បានបង្ហាញឱ្យឃើញថា រូបគេបានត្រឡប់ទៅរកទម្រង់លេងដ៏ល្អបំផុតរបស់ខ្លួនហើយ ក្រោយសះស្បើយពីរបួស ខណៈក្លិបកំពុងត្រៀមយក Mario Mandzukic អតីតខ្សែប្រយុទ្ធរបស់ Juventus និង Bayern Munich ដើម្បីជាជំនួយជួយឱ្យការប្រជែងពានរឹតតែមានសង្ឃឹមខ្ពស់។
ពេលនេះ ក្រុម Milan និង Inter នៅលេខ ១ និងលេខ ២ ដោយមាន ៤៣ ពិន្ទុ និង ៤០ពិន្ទុ ក្រោយក្រុមរួមក្រុងទាំង ២ បញ្ចប់ការប្រកួតសប្ដាហ៍ទី១៨ ខណៈក្រុម Napoli (៣៤ ពិន្ទុ) និង Juventus (៣៣ ពិន្ទុ) ដែលសល់ ១ ប្រកួតក្នុងដៃដូចគ្នា ឈរនៅពីលើ និងពីក្រោមក្រុម Roma (៣៤ ពិន្ទុ) ដែលឈរនៅចំណាត់ថ្នាក់ទី៤៕ AFP/VN