ក្រុងប៉ារីស៖ ប្រធានសហព័ន្ធបាល់ទាត់អន្តរជាតិ (FIFA) លោក Gianni Infantino បាននិយាយកាលពីថ្ងៃអង្គារថា កីឡាករបាល់ទាត់នៅប្រទេសអាល្លឺម៉ង់ ដែលអំពាវនាវឲ្យមានយុត្តិធម៌សម្រាប់ George Floyd អំឡុងការប្រកួតស័ក្ដិសមទទួលបានការសរសើរជាជាងត្រូវបានដាក់ពិន័យ។
សហព័ន្ធបាល់ទាត់អាល្លឺម៉ង់ (DFB) កំពុងតែធ្វើការស៊ើបអង្កេតលើទង្វើរបស់កីឡាករ ៣ ទៅ ៤ រូប ដូចជាខ្សែបម្រើ Jadon Sancho និងខ្សែការពារ Achraf Hakimi របស់ក្រុម Dortmund, ខ្សែបម្រើសញ្ជាតិអាមេរិក Weston McKennie ដែលលេងឲ្យក្រុម Schalke និងកីឡាកររបស់ក្រុម Moenchengladbach គឺខ្សែប្រយុទ្ធសញ្ជាតិបារាំង Marcus Thuram ដែលពួកគេទាំងអស់នោះបានធ្វើការគោរពដល់វិញ្ញាណក្ខន្ធរបស់ Floyd ពេលស៊ុតបញ្ចូលទីបាន កាលពីចុងសប្ដាហ៍កន្លងទៅថ្មីៗនេះ។
បុរសស្បែកខ្មៅ Floyd ស្លាប់កាលពីសប្ដាហ៍មុន ក្រោយប៉ូលិសស្បែកស ១ រូប នៅក្រុង Minneapolis រដ្ឋ Minnesota សហរដ្ឋអាមេរិក បានសង្កត់ករបស់គេដោយជង្គង់ជាច្រើននាទី ហើយបន្ទាប់ពីហេតុការណ៍នោះក៏ចាប់ផ្ដើមកើតមានការតវ៉ាដោយហិង្សាជាបន្តបន្ទាប់ទូទាំងប្រទេសមហាអំណាចមួយនេះ។
តែសម្រាប់លោក Infantino បានបញ្ចេញការយល់ឃើញ តាមរយៈសេចក្ដីប្រកាសរបស់ FIFA ថា៖ «ដើម្បីចៀសវាងការសង្ស័យមិនច្បាស់លាស់ ជាការយល់ឃើញផ្ទុយរបស់ FIFA គឺថា ការតវ៉ារបស់កីឡាករ អំឡុងការប្រកួតក្របខ័ណ្ឌ Bundesliga ស័ក្តិសមទទួលបានការសរសើរ មិនមែនការដាក់ពិន័យទេ។ យើងត្រូវតែពោលពាក្យថា ទេចំពោះការប្រកាន់ពូជសាសន៍ និងគ្រប់ទម្រង់នៃការរើសអើង។ យើងត្រូវនិយាយពាក្យថា ទេចំពោះអំពើហិង្សាគ្រប់រូបភាពទាំងអស់»។
មុនហ្នឹង FIFA បានស្នើឲ្យលីកបាល់ទាត់អាជីពទាំងអស់មានសុភវិនិច្ឆ័យ ពេលសម្រេចថា តើនឹងដាក់ពិន័យចំពោះកីឡាករ ដែលបានបង្ហាញសារពាក់ព័ន្ធនឹងនយោបាយ ឬអត់ ដោយស្ថាប័នគ្រប់គ្រងបាល់ទាត់អន្តរជាតិមួយនេះ បានបន្ថែមក្នុងសេចក្ដីប្រកាសនោះថា៖ « FIFA យល់ច្បាស់ពីជម្រៅចិត្ត និងក្ដីបារម្ភ ដែលកីឡាករទាំងនោះ បានបង្ហាញចេញពាក់ព័ន្ធនឹងហេតុការណ៍ដ៏សោកសៅនៃករណីរបស់ George Floyd នេះ»។
ក្រុមប្រឹក្សាសមាគមបាល់ទាត់អន្តរជាតិ (IFAB) ដែលជាអ្នកច្បាប់របស់កីឡានេះ ហាមឃាត់រាល់កីឡាករទាំងអស់ មិនឲ្យធ្វើការបង្ហាញណាមួយ ទាក់ទងដល់នយោបាយ ជំនឿសាសនា ឬពាក្យស្លោកផ្ទាល់ខ្លួន សេចក្ដីថ្លែងការណ៍ ឬរូបភាពផ្សេងៗ ប៉ុន្តែដើម្បីបញ្ជាក់ពីយុទ្ធនាការប្រឆាំងនឹងការរើសអើងពូជសាសន៍របស់ខ្លួន FIFA បានលើកឡើងថា គ្មានវិធានការអ្វីទាំងអស់ ចំពោះកីឡាករ Sancho, Hakimi ឬក៏ McKennie។
តែយ៉ាងណា DFB ក៏នៅតែស៊ើបអង្កេតពីទង្វើនៃកីឡាករទាំងនោះ តាមច្បាប់ IFAB ទោះជាប្រធានសហព័ន្ធ លោក Fritz Keller ប្រាប់ថា គាត់យល់ចំពោះការប្រព្រឹត្តរបស់កីឡាករគ្រប់រូប ដោយលោកថ្លែងថា៖ «ប្រសិនបើមនុស្សត្រូវបានប្រកាន់ ព្រោះតែសម្បុរស្បែករបស់ពួកគេ វាជារឿងដែលមិនអាចទ្រាំបានទេ។ បើសិនជាពួកគេ បាត់បង់ជីវិត ដោយសារតែសម្បុរស្បែករបស់ពួកគេ ខ្ញុំពិតជាសោកស្ដាយខ្លាំងណាស់។ ជនរងគ្រោះនៃការរើសអើងទាំងនោះ ត្រូវការការរួបរួមគ្នារបស់ពួកយើង»៕ AFP/VN