ក្រុងម៉ាឌ្រីដ: Andres Iniesta ហាក់ដូចជាកំពុងតែត្រៀមលក្ខណៈរួចរាល់ ដើម្បីចូលរួមជាមួយនឹងក្លិបជប៉ុន Vissel Kobe ក្រោយពីបង្ហើបនៅលើបណ្តាញសង្គម Twitter កាលពីថ្ងៃចន្ទថា រូបគេនឹងធ្វើដំណើរទៅកាន់ «ផ្ទះថ្មី» របស់គេ ជាមួយនឹង «មិត្តភ័ក្តិ» របស់គេគឺលោក Hiroshi Mikitani ដែលជាម្ចាស់ក្លិបក្របខ័ណ្ឌ J-League មួយនេះ។
អតីតខ្សែបម្រើរបស់ក្លិប Barcelona វ័យ៣៤ឆ្នាំរូបនេះ បានបង្ហោះរូបថតរបស់គេផ្ទាល់ និងលោក Mikitani នៅលើយន្តឯកជន១គ្រឿង រួមជាមួយនឹងទង់ជាតិរបស់ជប៉ុន និងបាល់ទាត់។
Iniesta ដែលបានរកគ្រាប់បាល់ឈ្នះឲ្យក្រុមជម្រើសជាតិអេស្ប៉ាញ នៅពេលប្រកួតជាមួយនឹងក្រុមជម្រើសជាតិហូឡង់ ក្នុងការប្រកួតព្រឹត្តិការណ៍ World Cup វគ្គផ្តាច់ព្រ័ត្រឆ្នាំ២០១០ បានស្ថិតក្នុងបញ្ជីឈ្មោះនាំមុខគេក្នុងបញ្ជីកីឡាករដែលលោក Mikitani ចង់បាន។
ពាណិជ្ជករជាមហាសេដ្ឋីរូបនេះ ក៏ជាស្ថាបនិក និងជានាយកប្រតិបត្តិរបស់ក្រុមហ៊ុន Rakuten ដែលជាម្ចាស់ឧបត្ថម្ភធំរបស់ក្លិប Barcelona និងបានទាក់ទងជាឯកជនដើម្បីនាំយក Iniesta ទៅក្លិបរបស់ខ្លួន៕ IS