ភ្នំពេញ: ក្រុមម្ចាស់ជើងឯករង ២ សម័យកាល Khmer United A បាននឹងកំពុងថមថយនូវឱកាសសម្រាប់ឆ្ពោះទៅរកការឈ្នះពានពាក់កណ្តាលអាជីព Keller Williams Cambodia League 2019 ជាលើកដំបូងរបស់ខ្លួន បន្ទាប់ពីក្រុមមិនទាន់ស្គាល់ការចាញ់មួយនេះរកបានត្រឹម ១ ពិន្ទុសម្រាប់ការវិលមកជួបក្រុមខ្លាំងចំណូលថ្មី ISI Group United កាលពីថ្ងៃអាទិត្យ។
ការវិលមកជួបគ្នារវាងក្រុម Khmer United A និងក្រុម ISI នៅកីឡដ្ឋានវេស្ទើន សម្រាប់ការប្រកួតប្រចាំសប្តាហ៍ទី ៦ នេះ វាបានក្លាយជាការប្រកួតដ៏សំខាន់បំផុតព្រោះ ៥ ប្រកួតកន្លងមកនេះក្រុមទាំង ២ នេះបានឈ្នះគ្រប់ការប្រកួតដូចគ្នាហេតុនេះក្រុមដែលទទួលបាន ៣ ពិន្ទុលើកនេះនឹងមានភាគរយកាន់តែច្រើនក្នុងការឆ្ពោះទៅរកការឈ្នះពាន ប៉ុន្តែមិនមានក្រុមណាឈ្នះបាន ៣ ពិន្ទុនោះទេ។
នៅក្នុងការប្រកួតយ៉ាងស្វិតស្វាញនោះខ្សែការពាររបស់ក្រុម Khmer United A បានបង្កើតឲ្យមានកំហុសដោយបានធ្វើឲ្យខ្សែប្រយុទ្ធរបស់ក្រុម ISI ដួលនៅក្នុងប្រអប់ទីខ្លួនឯង។ លោកអាជ្ញាកណ្តាលបានសម្រេចផ្តល់បាល់ពិន័យឲ្យ ISI ហើយពួកគេស៊ុតបានសម្រេចនៅនាទីទី ៣២ ដើម្បីនាំមុខ ១-០ មុន។
ប៉ុន្តែនៅចុងតង់ទី ១ នេះកីឡាករបរទេសពាក់លេខ ៦៣ របស់ក្រុម ISI បានយកដៃទៅប៉ះបាល់នៅតំបន់គ្រោះថ្នាក់គឺនៅពេលរូបគេបានព្យាយាមពាំងបាល់ដែលស៊ុតដោយក្រុម Khmer United A ។ កំហុសនេះលោកអាជ្ញាកណ្តាលបានផ្តល់ពិន័យ ១១ ម៉ែត្រទៅឲ្យ Khmer United A ហើយខ្សែប្រយុទ្ធ រស់ រតនៈ ជាអ្នកស៊ុតបានបាល់នោះបានសម្រេចនៅនាទីទី ៤៤។
ចំណែកការប្រកួតនៅតង់ទី ២ Khmer United A និង ISI មិនអាចរកបានគ្រាប់បាល់ថែមដូចគ្នា ហើយការស្មើគ្នា ១-១ នេះវាបានបើកផ្លូវឲ្យក្រុមធ្លាប់ឈរនៅលេខ ២ Riel Phnom Penh ឡើងទៅឈរនៅលេខ ១ វិញព្រោះពួកគេបានលត់ក្រុម Sen Sok Empire FT ១២-០ កាលពីថ្ងៃអាទិត្យនោះដែរដើម្បីមាន ១៨ ពិន្ទុពេញ។ ឯក្រុម Khmer United A ធ្លាក់មកឈរនៅលេខ ២ វិញហើយក្រុម ISI បន្តឈរនៅលេខ ៣ ដដែលដោយមាន ១៦ ពិន្ទុស្មើគ្នា។
ចំណែកក្រុមម្ចាស់ជើងឯកឆ្នាំ ២០១៨ Avatar FC បានយកឈ្នះក្រុមម្ចាស់ជើងឯកឆ្នាំ ២០១៧ Bayon Wanderers ៣-១ ដើម្បីបន្តឈរនៅលេខ ៤ មាន ១៥ ពិន្ទុហើយ Bayon ឈរនៅលេខ ៥ មាន ១២ ពិន្ទុស្មើជាមួយក្រុមបាសាក់ ដែលបានចាញ់ក្រុម Manbo PP ៣-២ នៅសប្តាហ៍នេះដែរ។
ដោយឡែកក្រុម Khmer United U22 បានលត់ក្រុមគ្រួសារកីឡាករតាំងគោក ៥-០ ដើម្បីឈរនៅលេខ ៧ មាន ១០ ពិន្ទុលើសក្រុម Mambo PP និងក្រុម ATK ១ ពិន្ទុ ព្រោះ ATK បានចាញ់ក្រុម Sniper FC រហូតដល់ ៦-១ ប៉ុន្តែ Khmer United B បានលត់ក្រុមចម្រុះដោយបរទេស Anvaya ៩-០ ដើម្បីមាន ៩ ពិន្ទុដែរ។
យ៉ាងណាក៏ដោយដើម្បីធ្វើឲ្យការប្រកួតនេះកាន់តែមានភាពស្វិតស្វាញ គណៈកម្មការរៀបចំការប្រកួត KW Cambodia League 2019 បានសម្រេចឲ្យក្រុមទាំង ១៦ អាចធ្វើការដោះដូរកីឡាករបាន ៥ នាក់ ហើយការសម្រេចនេះត្រូវអនុវត្តចាប់ពីការប្រកួតសប្តាហ៍ទី ៧ គឺពីថ្ងៃទី ២៩ ខែមេសារហូតដល់ថ្ងៃទី ២ ខែឧសភា៕