.jpg)
ឡូសអេនជឺលេស៖ លោក Michael Jordan ឲ្យដឹងកាលពីថ្ងៃសុក្រចុងសប្ដាហ៍ថា ខ្លួនធ្វើការបរិច្ចាគជាកំណត់ត្រាមួយ ដោយការផ្ដល់ទឹកប្រាក់ចំនួន $១០០ លាន ដល់អង្គការនានា ដែលតស៊ូឲ្យមានភាពស្មើគ្នា ខាងជាតិសាសន៍ និងយុត្តិធម៌សង្គម ចំពេលមានការតវ៉ាជាបន្តបន្ទាប់ទូទាំងសហរដ្ឋអាមេរិក។
អតីតកីឡាករឆ្នើមរបស់ក្របខ័ណ្ឌបាល់បោះអាជីព NBA រូបនេះ ឲ្យដឹងនៅក្នុងសេចក្តីថ្លែងការណ៍មួយថា គាត់ និងផលិតផលម៉ាក Jordan Brand របស់គាត់នឹងបរិច្ចាគប្រាក់ក្នុងរយៈពេលជាង ១០ ឆ្នាំដល់អង្គការផ្សេងៗ ក្នុងគោលបំណងគាំទ្រលុបបំបាត់ការរើសអើងជាតិសាសន៍៍។ ការសន្យានេះ ត្រូវគេជឿថា ជាការចូលរួមវិភាគទានហិរញ្ញវត្ថុធំបំផុតដល់ក្រុមមិនស្វែងរកប្រាក់ចំណេញ ដែលត្រូវធ្វើឡើងដោយបុគ្គលដ៏ល្បី ១ រូបពីពិភពកីឡា។
សេចក្ដីថ្លែងការណ៍រួម ដែលធ្វើឡើងរវាងលោក Jordan ហើយនិងផលិតផលម៉ាក Jordan Brand ឲ្យដឹងថា៖ «វាជាឆ្នាំ ២០២០ ហើយក្រុមគ្រួសាររបស់យើងរួមទាំងអ្នកគ្រប់គ្នាដែលជាកម្លាំងចិត្តដល់ការរស់នៅរបស់យើង។ បើទោះជាមានរឿងច្រើន ផ្លាស់ប្តូរប៉ុនណាក៏ដោយ តែអ្វីដែលអាក្រក់បំផុតនៅដដែល។ ជីវិតរបស់មនុស្សស្បែកខ្មៅ គឺមានតម្លៃណាស់។ នេះមិនមែនសារចម្រូងចម្រាសនោះទេ។ ដរាបណាការរើសអើងពូជសាសន៍ នៅតែមិនទាន់រលាយបាត់ទាំងស្រុងទេនោះ យើងនឹងនៅតែបន្តប្ដេជ្ញាការពារ និងលើកកម្ពស់គុណភាពជីវិតសម្រាប់ជនជាតិស្បែកខ្មៅ»។
សេចក្ដីថ្លែងការណ៍នោះ បន្តថា៖ «ថ្ងៃនេះ យើងកំពុងប្រកាសប្រាប់ឲ្យគ្រប់គ្នាដឹងថា Michael Jordan និងផលិតផលម៉ាក Jordan Brand នឹងបរិច្ចាគទឹកប្រាក់ចំនួន $១០០ លាន រយៈពេលជាង ១០ ឆ្នាំទៅមុខ ឲ្យដល់អង្គការនានា ដែលបូជាខ្លួនទាមទារធានាឲ្យបានសមធម៌ខាងពូជសាសន៍ យុត្តិធម៌សង្គម និងសិទ្ធិទទួលបានការអប់រំប្រសើរជាងមុន»៕ AFP/VN
