ក្រុងរ៉ូម: ក្រុមសេះបង្កង់ Juventus នឹងត្រូវបង្ខំឱ្យចេញពីក្របខ័ណ្ឌ Serie A ប្រសិនបើពួកគេមិនព្រមដកខ្លួនជាផ្លូវការពីគម្រោងការ European Super League (UCL) ទេនោះ។ នេះបើយោងតាមប្រធានសហព័ន្ធបាល់ទាត់អ៊ីតាលី (FIGC) កាលពីថ្ងៃចន្ទ។
បណ្ដាញសារព័ត៌មាននៅអ៊ីតាលី បានធ្វើសេចក្ដីរាយការណ៍តាមប្រសាសន៍របស់ប្រធាន FIGC លោក Gabriele Gravina ដែលប្រាប់ថា៖ «ប្រសិនបើក្រុម Juventus មិនគោរពច្បាប់ទេនោះ ពួកគេនឹងត្រូវដកចេញ។ ក្នុងអំឡុងពេលនៃការចុះបញ្ជីឈ្មោះសម្រាប់ Serie A រដូវកាលក្រោយ ពួកគេនឹងត្រូវដកឈ្មោះចេញ ប្រសិនបើមិនមានការដកខ្លួនពី Super League ទេនោះ»។
នៅចុងខែមេសា កន្លងមក បន្ទាប់ពីមានការប៉ុនប៉ងបង្កើតលីគដាច់ដោយឡែក UCL ដែលរួមមានទាំងក្រុមយក្សអ៊ីតាលីទាំង ៣ AC Milan, Inter Milan និង Juve ផងដែរនោះ FIGC បានអនុវត្តច្បាប់ ដើម្បីដកក្លិបទាំងឡាយណា ដែលចូលរួមក្នុងការប្រកួតប្រជែង ដែលមិនទទួលបានការអនុម័តយល់ព្រមដោយស្ថាប័នគ្រប់គ្រង UEFA ឬក៏ FIFA។
ក្រុម Milan និងក្រុម Inter ដែលជាជើងឯកថ្មីថ្មោង នៅ Serie A បានដកខ្លួនតាំងពីពេលនោះពីគម្រោងការនេះ ដោយចូលរួមជាមួយ ៧ ក្លិបផ្សេងទៀត ដែលនៅប្រទេសអង់គ្លេស និងអេស្ប៉ាញ។
កាលពីថ្ងៃសុក្រ អាជា្ញធរបាល់ទាត់អឺរ៉ុប UEFA បានប្រកាសពីការដាក់ទណ្ឌកម្មរបស់ខ្លួនក្នុងនោះរួមទាំងការពិន័យជាប្រាក់ផងដែរ ចំពោះក្រុមទាំង ៩ នោះ ក្រោយពួកគេបានធ្វើការសុំទោស និងទទួលស្គាល់កំហុសរបស់ខ្លួន។
តែកាលពីថ្ងៃសៅរ៍ ក្រុម Juve រួមជាមួយក្រុមយក្សអេស្ប៉ាញទាំង ២ Barcelona និង Real Madrid បាននិយាយការពារកម្មវិធីប្រកួតប្រជែងដែលដួលរលំហើយ ហើយប្រាប់ថា ពួកគេទទួលបានការគំរាម ដែលមិនអាចទទួលយកបានពី UEFA និង FIFA។
ថ្លែងទៅកាន់ប្រព័ន្ធផ្សព្វផ្សាយរបស់រដ្ឋ Rai កាលពីថ្ងៃចន្ទ លោក Gravina ក៏បានប្រាប់ដែរថា លោកនឹងរីករាយក្នុងការដើរតួជាអ្នកសម្រុះសម្រួលរវាងក្រុម Juve និងស្ថាប័នគ្រប់គ្រងរបស់ទ្វីប។
លោកប្រាប់ថា៖ «ជម្លោះរវាងក្លិប និង UEFA គឺមិនផ្ដល់ផលល្អឡើយ សម្រាប់វិស័យបាល់ទាត់អ៊ីតាលី ឬក៏សម្រាប់ក្រុម Juventus»៕ VN