ក្រុងមីឡេន: ជើងឯកក្របខ័ណ្ឌ Serie A ក្រុមសេះបង្កង់ Juventus (Juve) បានព្រមព្រៀងផ្ទេរយកកីឡាករឆ្នើម Federico Chiesa ពីក្រុមគូប្រជែងមិនសូវខ្លាំងរបស់ខ្លួន Fiorentina ក្នុងតម្លៃ ៥០ លានអឺរ៉ូ ($៥៩ លាន) កាលពីថ្ងៃចន្ទ ពោលគឺ ១ ម៉ោង មុនទីផ្សារដោះដូរកីឡាករបិទទ្វារ។
កីឡាករវ័យ ២២ ឆ្នាំ បានធំធាត់ឡើងនៅក្រុម Fiorentina ហើយជាកូនប្រុសអតីតកីឡាករ Enrico Chiesa ដែលមានឈ្មោះក្នុងក្រុម Fiorentina ពេលឈ្នះពានដ៏ធំចុងក្រោយ Coppa Italia កាលពីឆ្នាំ ២០០១។
កីឡាករ Chiesa បានធ្វើការបង្ហាញខ្លួនលក្ខណៈអាជីពឱ្យក្រុម Fiorentina ក្នុងឆ្នាំ ២០១៦ ហើយបន្តលេងរហូតដល់បាន ១៥៣ លើក ក្នុងនោះស៊ុតបញ្ចូលទីបាន ៣៤ គ្រាប់ បើទោះជារូបគេបានក្លាយជាប្រធានបទនៃពាក្យចចាមអារ៉ាម ក្នុងផ្លាស់ប្ដូរក្លិប យ៉ាងហោចណាស់ក៏ ២ ឆ្នាំដែរ។ ជាមួយក្រុមជម្រើសជាតិអ៊ីតាលី គេចូលលេងបាន ១៩ លើក និងបំប៉ោងសំណាញ់ទីបាន ១ គ្រាប់។
ក្រុម Juve បានឱ្យដឹងថា កិច្ចព្រមព្រៀងនេះ រួមមានទាំងលក្ខខណ្ឌខ្ចីជើង ២ រដូវកាល តម្លៃ ១០ លានអឺរ៉ូ (ជិត $១២ លាន) អមដោយជម្រើសទិញផ្ដាច់ ជាមួយនឹងតម្លៃ ៤០ លានអឺរ៉ូ ($៤៧ លាន) និងបូកបន្ថែម ១០ លានអឺរ៉ូ (ជិត $១២ លាន) ទៀត អាស្រ័យលើទម្រង់លេងជាក់ស្ដែងរបស់កីឡាករ។
ទោះបីជាគេ គឺជាកីឡាករសំខាន់នៅឯក្រុមចាស់របស់ខ្លួនក៏ដោយ ក៏ Chiesa នឹងត្រូវប្រជែងយកទីតាំងរបស់ខ្លួន នៅក្រុម Juve ដែលពេលនេះ ត្រូវបានឈរជើងដោយ Cristiano Ronaldo, Paulo Dybala, Alvaro Morata និង Federico Bernardeschi ដែលជាអតីតកីឡាកររបស់ក្រុម Fiorentina ១ រូបផ្សេងទៀត។
កាលពីព្រឹកថ្ងៃចន្ទ ក្រុម Juve ដែលកំពុងប្រជែងឱ្យបានលើកពាន Serie A ១០ រដូវកាលជាប់ៗគ្នា បានដោះលេងកីឡាករ ២ រូបទៅក្រុមផ្សេង ក្នុងលក្ខខណ្ឌខ្ចីជើង ដូចជាខ្សែបម្រើស្លាប Douglas Costa ទៅក្រុម Bayern Munich និងខ្សែការពារស្លាប Mattia De Sciglio ទៅក្រុម Olympique Lyonnais។
សម្រាប់កីឡាករសំខាន់ៗ ដែលក្រុមសេះបង្កង់ទិញបានរដូវកាលនេះ មានដូចជានាំយកខ្សែបម្រើសញ្ជាតិប្រេស៊ីល Arthur ពីក្រុម Barcelona ផ្ទេរយកខ្សែប្រយុទ្ធ Morata ពីក្រុម Atletico Madrid និងព្រមព្រៀងជាមួយក្រុម Schalke 04 ទិញយកខ្សែបម្រើអាមេរិក Weston McKennie៕ AFP/VN