.jpg)
កីឡាករ Kairat Akhmetov (ស្តាំ) ទាត់ចំផ្ទៃមុខរបស់ Geje Eustaquio ក្នុងជំនួបកន្លងមក។ រូប សហការី
ក្រុងម៉ានីល: កីឡាករគុនចម្រុះ (MMA) Kairat “The Kazakh” Akhmetov ដែលជាម្ចាស់ខ្សែក្រវាត់ពិភពលោកក្នុងទម្ងន់ ៦១,២ គីឡូក្រាមពីស្ថាប័ន ONE នឹងមានឱកាសក្នុងការបញ្ចប់ការសង្ស័យផ្សេងៗ និងកសាងកេរិ៍្តឈ្មោះឡើងវិញ ខណៈដែលរូបគេនឹងត្រូវធ្វើការប្រកួតជាមួយគូប្រកួតចាស់នៅចុងសប្តាហ៍នេះ។
Akhmetov នឹងធ្វើដំណើរទៅប្រកួតជាមួយកីឡាករហ្វីលីពីន Geje “Gravity” Eustaquio ក្នុងគូឯកនៃព្រឹត្តិការណ៍ GLOBAL SUPERHEROES ដែលនឹងប្រព្រឹត្តទៅនៅសង្វៀន SM Mall of Asia Arena ក្នុងទីក្រុងម៉ានីល ប្រទេសហ្វីលីពីន នាថ្ងៃសុក្រ ទី ២៦ ខែមករា។
នេះគឺជាការប្រកួតសងសឹកមួយរវាងកីឡាករទាំង ២ ក្រោយពីពួកគេបានជួបប្រកួតគ្នារួចជាស្រេចក្នុងព្រឹត្តិការណ៍ ONE: TOTAL VICTORY កាលពីខែកញ្ញា ឆ្នាំមុន ខណៈដែល Akhmetov បានយកឈ្នះលើ Eustaquio វ័យ ២៨ ឆ្នាំ ទាំងប្រផិតប្រផើយដោយពិន្ទុមិនឯកច្ឆន្ទ។ អ្វីដែលកាន់តែគួរឲ្យចាប់អារម្មណ៍នោះគឺថា ការជួបគ្នាជាលើកទី ២ របស់ពួកគេនៅពេលនេះ គឺការប្រកួតដើម្បីដណ្តើមខ្សែក្រវាត់ពិភពលោកបណ្តោះអាសន្នក្នុងទម្ងន់ ៦១,២ គីឡូក្រាម របស់ស្ថាប័ន ONE។
Akhmetov បានទទួលស្គាល់ថា រូបគេពិតជាមានការភ្ញាក់ផ្អើល នៅពេលដែលរូបគេទទួលព័ត៌មានដំបូងថា គេនឹងត្រូវដាក់ឲ្យប្រកួតសងសឹកក្នុងព្រឹត្តិការណ៍ ONE: GLOBAL SUPERHEROES ដែលជាកម្មវិធីប្រកួតជាលើកទី ១២ របស់ ONE នៅលើទឹកដីហ្វីលីពីន។
ក្រោយពីបានផ្តួល Eustaquio កាលពី ២ ខែមុន Akhmetov បានរំពឹងទុកថា គេនឹងត្រូវដាក់ឲ្យធ្វើការប្រកួតសងសឹកជាមួយនឹងម្ចាស់ការពារខ្សែក្រវាត់ពិភពលោករបស់ ONE គឺ Adriano “Mikinho” Moraes ដែលជាអ្នកបានបញ្ចប់កំណត់ត្រាដ៏ល្អរបស់គេក្នុងការជួបគ្នាជាលើកទី ២ របស់ពួកគេ កាលពីខែសីហា ឆ្នាំមុន។
កីឡាករកាហ្សាក់ស្ថានរូបនេះ ដែលមានកំណត់ត្រាឈ្នះ ២១ លើក និងចាញ់ ១ លើកនោះ បានឲ្យដឹងថា៖ «ខ្ញុំពិតជាភ្ញាក់ផ្អើល។ ប៉ុន្តែ ខ្ញុំគោរពការសម្រេចចិត្តរបស់ ONE Championship។ ខ្ញុំត្រៀមខ្លួនរួចរាល់សម្រាប់អ្នកដែលអបអរប្រឆាំងនឹងខ្ញុំ។ ខ្ញុំត្រៀមរួចហើយសម្រាប់ការប្រកួតនេះ»។
Akhmetov បានបន្ថែមទៀតថា៖ «ខ្ញុំនឹងឈានទៅកាន់ការប្រកួតជាមួយនឹងការត្រៀមស្មារតីរួចរាល់ ហើយក្នុងឆ្នាំ ២០១៨ ខ្ញុំកំពុងតែសម្លឹងឆ្ពោះទៅកាន់ការសម្រេចក្តីសុបិនក្នុងការទទួលបានឱកាសក្នុងការជួបជាមួយនឹង Adriano Moraes ជាលើកទី ៣ ហេតុនេះ ខ្ញុំត្រូវតែផ្តួល Geje ដើម្បីសម្រេចក្តីសុបិននោះ»។
ជាមួយគ្នានេះ Eustaquio ជឿជាក់ថា ទេពកោសល្យនៃការការពារខ្លួនរបស់គេ គួរតែភាពខ្លាំងគ្រប់គ្រាន់ក្នុងការរារាំងស្នៀតចំបាប់របស់ Akhmetov។
កីឡាកររូបនេះ ដែលមានកំណត់ត្រាឈ្នះ ៩ លើក និងស្មើ ៦ លើក បានឲ្យដឹងថា៖ «ផែនការមួយក្នុងចំណោមផែនការប្រកួតរបស់ខ្ញុំ គឺក្បាច់ការពារបោកផ្តួលរបស់ខ្ញុំ។ ជារៀងរាល់ថ្ងៃ យើងធ្វើការហ្វឹកហាត់យ៉ាងលំបាក។ យើងធ្វើការដើម្បីបង្កើនស្នៀតប្រកួត និងក្បាច់ការពារបោកផ្តួលរបស់យើង ហេតុនេះ យើងអាចប្រើប្រាស់ក្បាច់វ៉ូស៊ូរបស់យើង»។
Eustaquio ដែលក៏ចាញ់ក្រោមស្នាដៃ Moraes ដែរនោះ បានឲ្យដឹងថា៖ «ខ្ញុំរំពឹងទុកថា វានឹងក្លាយជាការប្រកួតដ៏ស្វិតស្វាញមួយទៀត។ ប៉ុន្តែ ខ្ញុំត្រៀមលក្ខណៈបានយ៉ាងល្អ»។
បើទោះបីធ្លាប់ចាញ់ Akhmetov ក្នុងការជួបគ្នាកាលពីមុនក្នុងប្រទេសឥណ្ឌូនេស៊ីក៏ដោយ ប៉ុន្តែ Eustaquio នៅតែមានសុទិដ្ឋិនិយមថា រូបគេនឹងចាកចេញពីសង្វៀន ដោយមានខ្សែក្រវាត់ពិភពលោករបស់ ONE លើចង្កេះរបស់គេ៕IS
