ក្រុងឡុងដ៍៖ ខ្សែប្រយុទ្ធឆ្នើម Harry Kane បានបង្ហើបថា រូបគេបានចំណាយពេល «២-៣ ម៉ោង» ស្ថិតនៅជាមួយលោក Mauricio Pochettino ក្រោយពីក្លិប Tottenham បានបណ្ដេញគាត់ចេញពីតំណែងជាគ្រូបង្វឹក។
លោក Pochettino ត្រូវបានបណ្ដេញកាលពីថ្ងៃអង្គារ និងជំនួសដោយលោក Jose Mourinho ដែលបានដឹកនាំឲ្យក្រុម Spurs ទទួលបានជ័យជម្នះ ៣-២ ទៅលើក្រុម West Ham ក្នុងការប្រកួតលើកដំបូងក្នុងការដឹកនាំរបស់គាត់ពីថ្ងៃសៅរ៍។
ខ្សែប្រយុទ្ធ Kane ដែលរកបានគ្រាប់បាល់នៅកីឡដ្ឋាន London នោះបានទៅជួបលោក Pochettino នៅរយៈពេល ១ ថ្ងៃ បន្ទាប់ពីគ្រូបង្វឹកវ័យ ៤៧ ឆ្នាំរូបនេះត្រូវបានបណ្ដេញ ហើយតារាខ្សែប្រយុទ្ធរូបនេះបានប្រាប់កាសែត UK ថា៖ «ខ្ញុំបានទៅជួបគាត់ ហើយខ្ញុំបានដើរជុំវិញផ្ទះរបស់គាត់ និងបានទៅសួរសុខទុក្ខនៅថ្ងៃបន្ទាប់មកទៀតផងដែរ។ វាជាការសោកស្ដាយមួយសម្រាប់អ្នករាល់គ្នាដូច្នេះខ្ញុំចង់ទៅជួបគាត់ ហើយយើងបានជជែកគ្នា ២-៣ ម៉ោង។ វាល្អណាស់ដែលបានធ្វើបែបនេះនៅមុនពេលអ្នកគ្រប់គ្រងថ្មីចូលមកដឹកនាំបន្ត»។
ខ្សែប្រយុទ្ធ Kane បានបន្ថែមថា៖ «វាមានរយៈពេលមួយសប្តាហ៍ដែលខ្ញុំពិតជាមិនធ្លាប់មាននៅក្នុងអាជីពរបស់ខ្ញុំពីមុនមកដែលនោះ គឺជាការសោកស្ដាយដ៏ធំមួយនៅយប់ថ្ងៃអង្គារសម្រាប់អ្នករាល់គ្នារួមទាំងកីឡាករផងដែរ។ បន្ទាប់មកវាជាការផ្លាស់ប្តូរយ៉ាងរហ័សមួយនៅពេលយើងទទួលបានអ្នកគ្រប់គ្រងថ្មីម្នាក់ក្នុងចំណោមអ្នកគ្រប់គ្រងល្អបំផុតនៅទីនោះ»។
លោក Mourinho គឺជាអ្នកទទួលបានជ័យជម្នះជាច្រើន ហើយកីឡាករ Kane សង្ឃឹមថា គ្រូបង្វឹកព័រទុយហ្គាល់រូបនេះអាចដឹកនាំក្លិប Spurs ឲ្យបានពានរង្វាន់មួយចំនួនដែលរូបគាត់ចង់បានកន្លងមក។
កីឡាកររូបនេះបាននិយាយថា៖ «តាមពិតយើងកំពុងសម្លឹងឃើញពានរង្វាន់ Champions League និងពានរង្វាន់ FA Cup។ យើងនឹងឃើញថា តើវាទៅជាយ៉ាងណា ហើយតាមទស្សនៈខ្ញុំ ខ្ញុំនឹងបន្តធ្វើអ្វីដែលខ្ញុំកំពុងធ្វើ និងបន្តប្រយុទ្ធសម្រាប់ក្លិបនេះនៅលើទីលាន»៕ AFP/SN