អង់គ្លេសៈ ប្រធានក្រុម និងជាខ្សែប្រយុទ្ធឆ្នើម Hurry Kane បានបង្ហាញពីសុទិដ្ឋិនិយមខ្ពស់ទៅលើក្រុមជម្រើសជាតិអង់គ្លេសថាក្រុមមួយនេះនឹងចាប់យកឱកាសដ៏ពិសេស ដើម្បីបង្ហាញភាពខ្លាំងនៅក្នុងការប្រកួត Euro 2020 ខណៈព្រឹត្តិការណ៍នេះភាគច្រើនត្រូវធ្វើនៅលើទឹកដីប្រទេសអង់គ្លេសនោះ។
ក្រុមតោកំណាចទាំង ៣ របស់អង់គ្លេសនឹងបើកយុទ្ធនាការប្រកួតជម្រុះសម្រាប់ព្រឹត្តិការណ៍ Euro 2020 នៅលើទឹកដីរបស់ខ្លួនដោយត្រូវប៉ះជាមួយក្រុមមកពីសាធារណរដ្ឋឆែកនៅថ្ងៃសុក្រ ក្រោយពីពួកគេបានឡើងទៅវគ្គ ៤ ក្រុមចុងក្រោយនៃការប្រកួត World Cup កាលពីរដូវកាលមុន ហើយក្រុមនេះនឹងឡើងទៅប្រកួតក្នុងវគ្គ ១/៣ ផ្តាច់ព្រ័ត្រក្នុងព្រឹត្តិការណ៍ Nations League នៅខែមិថុនាឆ្នាំនេះផងដែរ។
ខ្សែប្រយុទ្ធ Kane បាននិយាយកាលពីថ្ងៃអង្គារថា៖ «យើងមានអារម្មណ៍ថា ពេលនេះប្រជាពលរដ្ឋកំពុងរំពឹងថាពួកយើងនឹងធ្វើបានល្អ។ នៅមុនពេល World Cup មកដល់យើងមិនទាន់មានការរំពឹងចង់បានអ្វីច្រើននោះទេ ប៉ុន្តែឥឡូវនេះវាជាពេលមួយត្រឹមត្រូវក្នុងការកែប្រែគំនិតបែបនោះ»។
«ខ្ញុំគិតថាយើងដោះស្រាយរឿងនេះបានល្អហើយតាំងពីរដូវកាល World Cup ។ យើងជាក្រុមតែមួយគត់ដែលបានឡើងដល់វគ្គ ១/២ ផ្តាច់ព្រ័ត្រនៅ World Cup និងបានឡើងទៅវគ្គ ១/២ ផ្ដាច់ព្រ័ត្រ Nations League ហើយយើងក៏ប្រហែលជាក្រុមដែលគេពិបាកនឹងយកឈ្នះបំផុតមួយផងដែរ»។
ប្រធានក្រុម Tottenham Hotspur រូបនេះបានបន្ថែមថា៖ «ខ្ញុំគិតថាវាជារឿងធំសម្រាប់យើង ដែលត្រូវបង្ហាញគ្រប់គ្នាឲ្យដឹងថាឱកាសល្អបែបនេះវាមិនបានកើតឡើងចំពោះក្រុមយើងតែម្ដងនោះទេ គឺក្រុមយើងពិតជានឹងបង្កើតអ្វីមួយពិសេសនៅពេលអនាគតទៀត»។
ក្រុមជម្រើសជាតិអង់គ្លេសបានទទួលលទ្ធផលល្អនៅក្នុងព្រឹត្តិការណ៍ដ៏សំខាន់នេះបានតែម្តងគត់ចាប់តែពីឆ្នាំ ១៩៦៦ មកហើយនៅឆ្នាំក្រោយ ពួកគេនឹងត្រូវខិតខំលេងបន្ថែមទៀតតាមរយៈការប្រកួតសំខាន់ៗរបស់ខ្លួននៅកីឡដ្ឋាន Wembley ព្រោះទាំងការប្រកួតវគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រនឹងត្រូវរៀបចំធ្វើនៅក្នុងទឹកដីរបស់អង់គ្លេស ហើយយ៉ាងហោចក្រុមរបស់អង់គ្លេស ២ ក្រុមនឹងត្រូវជម្រុះចេញពីការប្រកួត។
Kane បាននិយាយថា៖ «យើងដឹងថាឱកាសលេងក្នុងព្រឹត្តិការណ៍ Euro ដែលនឹងត្រូវប្រកួតភាគច្រើននៅលើទឹកដីប្រទេសអង់គ្លេសនោះគឺជាឱកាសដ៏អស្ចារ្យមួយហើយឱកាសល្អបែបនេះជាធម្មតាអ្នកផ្សេងមិនធ្លាប់មានក្នុងអាជីពកីឡានោះទេ ដូច្នេះយើងនឹងព្យាយាមទទួលផលពីឱកាសនេះឲ្យបានច្រើនបំផុត»។
បើទោះបីជាទម្រង់លេងរបស់ក្រុម Spur មិនសូវល្អក៏ដោយ ប៉ុន្តែ Kane ដែលជាប្រធានក្រុមអាចរកបាន ៤ គ្រាប់ក្នុង ៥ ប្រកួតចាប់តាំងពីរូបគេត្រឡប់ចូលលេងវិញក្រោយពីអវត្តមាន ៥ សប្ដាហ៍ដោយសាររបួសកជើង។
ជើងឯកស្បែកជើងមាស World Cup រូបនេះគិតថា រូបគេកំពុងស្ថិតក្នុងតំបន់នៅមុខគោលដៅរយៈពេល ៣ ខែមុនសម្រាប់ក្លិប និងប្រទេសស្របពេលក្រុម Spur នឹងត្រូវជួបក្រុម Manchester City ក្នុងវគ្គពាក់កណ្តាលផ្តាច់ព្រ័ត្រនៃក្របខ័ណ្ឌ Champions League ហើយស្ថិតនៅក្នុងសមរភូមិនៃក្រុមកំពូលតារាងទាំង ៤ សម្រាប់ក្របខ័ណ្ឌ Premier League។
ជុំវិញបញ្ហារបួសកជើងនេះ Hurry Kane បានបញ្ជាក់ថា៖ «ខ្ញុំមិនចង់មានរបួសនោះទេ ប៉ុន្តែធ្វើម៉េចបើខ្ញុំត្រូវរបួសកជើងទៅហើយ ទោះយ៉ាងណាខ្ញុំបានប្រើបញ្ហានោះ ដើម្បីបង្ហាញថាខ្ញុំបានជាហើយឥឡូវនេះ។ តាំងពីខ្ញុំត្រឡប់មកពីព្យាបាលរបួសវិញ ខ្ញុំមានអារម្មណ៍ថា ខ្ញុំមានកម្លាំងរឹងមាំ ហើយនោះជាពេលមួយដែលខ្ញុំមានអារម្មណ៍ថា ខ្ញុំនឹងលេងឲ្យអស់ពីសមត្ថភាព»។
ការស៊ុតបាល់បញ្ចូលទីចុងក្រោយបំផុតរបស់ Kane ពេលចាញ់ក្រុម Southampton ២-១ គឺជាគ្រាប់បាល់ទី ២០០ របស់គេ ប៉ុន្តែនៅអាយុត្រឹម ២៥ ឆ្នាំ Kane សង្ឃឹមថាគាត់អាចធ្វើតាមគំរូ Cristiano Ronaldo និង Lionel Messi តាមរយៈការប្រឹងស៊ុតបញ្ចូលទីបន្ថែមទៀតក្នុងវ័យខ្ទង់ ២០ ឆ្នាំនេះ។
កីឡាកររូបនេះបញ្ជាក់ថា៖ «សព្វថ្ងៃនេះអ្វីៗគ្រប់យ៉ាងវាពាក់ព័ន្ធនឹងវិទ្យាសាស្ត្រកីឡា ហើយខ្ញុំគិតថាពេលវេលាដ៏អស្ចារ្យអាចនឹងកើតមានឡើងក្នុងពេលមិនយូរទេ។ ប្រហែលជាអាយុខ្ទង់ ២៨ ទៅ ៣០ ឆ្នាំនោះប្រហែលជាពេលវេលាដ៏អស្ចារ្យរបស់អ្នក ប្រសិនអ្នកខិតខំលេងឲ្យបានល្អដូច Ronaldo និង Messi ប៉ុន្តែខ្ញុំនៅមានពេលបន្តិចទៀតដើម្បីឈានដល់ចំណុចនេះ»៕