.jpg)
កីឡាករឃីម ឌីម៉ា (ស្តាំ) របស់កម្ពុជានឹងត្រូវប្រកួតក្នុងកម្មវិធី Khmer Fight នៅថ្ងៃចន្ទ។ ស្រេង ម៉េងស្រ៊ុន
ភ្នំពេញ: កម្មវិធីប្រកួតប្រដាល់ដែលមានឈ្មោះថា Khmer Fight ទទួលបានសិទ្ធិផ្តាច់មុខពីស្ថាប័នគ្រប់គ្រងកីឡា ដែលមានគណៈកម្មាធិការជាតិអូឡាំពិកកម្ពុជា (NOCC) និងសហព័ន្ធកីឡាគុនខ្មែរអន្តរជាតិ ដើម្បីរៀបចំព្រឹត្តិការណ៍របស់ខ្លួនក្នុងកម្មវិធីសម្ពោធវិមានឈ្នះឈ្នះ និងខួបលើកទី ២០ ឆ្នាំរបស់ទិវានយោបាយឈ្នះឈ្នះរបស់រដ្ឋាភិបាល នៅដើមសប្តាហ៍ក្រោយ។
Khmer Fight នឹងកើតឡើងនៅថ្ងៃចុងក្រោយនៃកម្មវិធី ពោលគឺថ្ងៃទី ៣១ ខែធ្នូ ឆ្នាំ ២០១៨ ស្របពេលប្រដាល់គុនខ្មែរ នឹងត្រូវប្រព្រឹត្តទៅរយៈពេល ៣ ថ្ងៃដំបូង ចាប់ពីថ្ងៃនេះតទៅ ដោយមានការបែងចែកការគ្រប់គ្រង និងការចំណាយពីប្រភពផ្សេងពីគ្នា ហើយកម្មវិធីប្រកួតទាំង ២ នឹងផ្សាយផ្ទាល់នៅលើកញ្ចក់ទូរទស្សន៍ប៉ុស្តិ៍ លេខ ៥។
ប្រសិនបើការប្រកួតទទួលបានការគាំទ្រខ្លាំង រលូន និងមានការសហការបានល្អនោះ Khmer Fight អាចនឹងបន្តសិទិ្ធទៅឆ្នាំក្រោយៗទៀត ប៉ុន្តែបើការប្រកួតស្ថិតក្នុងរបៀបចាស់គំរឹល មិនកែសម្រួល ឬអភិវឌ្ឍ មិនមានការសហការល្អនោះ ឆ្នាំបន្តបន្ទាប់នឹងរកដៃគូថ្មីវិញ។ នេះបើតាមការឲ្យដឹងពីមន្ត្រីជាន់ខ្ពស់គ្រប់គ្រងកីឡា។
សម្រាប់សមាសភាពអ្នកប្រដាល់ខ្លាំងៗរបស់កម្ពុជាចំនួន ៦ នាក់ ដែលត្រៀមប៉ះជាមួយកីឡាករមកពីបរទេស អ្នកគ្រប់គ្រងកម្មវិធីប្រដាល់ប្រចាំសង្វៀនប៉ុស្តិ៍ លេខ ៥ ហាក់បីដូចលាក់បាំង មិនបើកទូលាយ ឬផ្សព្វផ្សាយដល់បណ្តាញព័ត៌មានឲ្យបានទូលំទូលាយឡើយ។
សង្វៀនប៉ុស្តិ៍លេខ ៥ ហាក់មានការរើសអើង និងរបៀបធ្វើការតាមរបៀបចាស់គំរិល ដោយចង់ឲ្យតែគេសរសើរអួតខុសការពិត ខណៈគិតមកដល់ពេលនេះ សង្វៀនមួយនេះត្រូវបានម្ចាស់ភាគហ៊ុន ក៏ដូចថ្នាក់ដឹកនាំជាន់ខ្ពស់ប្រឹងប្រែងចំណាយធនធានយ៉ាងច្រើន ប៉ុន្តែនៅតែមានចំណាត់ថ្នាក់ផ្នែកប្រកួតប្រដាល់នេះ ស្ថិតនៅបាតតារាង ឬចុងក្រោយគេ ក្នុងចំណោមស្ថានីយទូរទស្សន៍ឯកជនដែលបង្កើតព្រឹត្តិការណ៍ប្រដាល់រាល់ចុងសប្តាហ៍។
គិតមកត្រឹមថ្ងៃម្សិលមិញ ភ្នំពេញ ប៉ុស្តិ៍មិនអាចទាក់ទងសុំសមាសភាព និងប្រវត្តិប្រកួតរបស់កីឡាករបរទេសបានទេ ពិសេសអ្នកប្រដាល់ក្នុងកម្មវិធី Khmer Fight ប៉ុស្តិ៍ លេខ ៥ បានបង្ហាញបានត្រឹមកីឡាករខ្មែរប៉ុណ្ណោះ។ យ៉ាងណាក៏ដោយ មន្ត្រីបច្ចេកទេសសហព័ន្ធ បានបង្ហើបឲ្យដឹងថា មានអ្នកប្រដាល់ខ្លាំងៗចំនួន ៦ នាក់នឹងប្រកួតជាមួយកីឡាករមកពីអន្តរជាតិ ៦ រូបនាថ្ងៃទី ៣១ ខែធ្នូ ឆ្នាំ ២០១៨។
ភ្នំពេញ ប៉ុស្តិ៍ មិនអាចទាក់ទងលោកសេង កដិកា ដែលជាអ្នកគ្រប់គ្រងសង្វៀនប៉ុស្តិ៍លេខ ៥ មានវ័យចាស់វស្សា និងជាអ្នកបង្កើតកម្មវិធីប្រដាល់មុនគេ បានឡើយ ខណៈដែលបច្ចុប្បន្ន សង្វៀនប្រដាល់នេះមានប្រិយភាពគាំទ្រធ្លាក់ចុះជាងមុន។
អ្នកនាង រស់ ម៉ាឡែន ប្រធានគ្រប់គ្រងផ្នែកទីផ្សារស្ថានីយទូរទស្សន៍ប៉ុស្តិ៍លេខ ៥ បានឲ្យដឹងថា៖ «សង្វៀនប៉ុស្តិ៍លេខ ៥ ផ្សាយផ្ទាល់ពីការប្រកួតប្រដាល់ផ្តាច់មុខចំនួន ៤ ថ្ងៃចាប់ពីមោង ៥ ល្ងាចតទៅ។ ជាមួយគ្នានោះដែរ ថ្ងៃទី ៣១ ខែធ្នូ ឆ្នាំ ២០១៨ ជាថ្ងៃចុងក្រោយ នឹងមានកម្មវិធីប្រដាល់ Khmer Fight ដើម្បីអភិរក្ស និងថែរក្សាមរតកសិល្បៈការតស៊ូរបស់ខ្មែរ ដែលមានតាំងពីបុរាណកាលមកឲ្យនៅគង់វង្ស និងផូរផង់ក្នុងដែនដីកម្ពុជា»។
លោកតែម ម៉ឺន ប្រធានសហព័ន្ធកីឡាប្រដាល់គុនខ្មែរ និងជាអគ្គលេខាធិការរងនៃ NOCC បានឲ្យដឹងថា៖ «Khmer Fight នឹងមានកីឡាករអន្តរជាតិ ៦ នាក់ពីប្រទេសថៃ ២ រូប មកពីប្រទេសទុយនីស៊ី ២ រូប និងមកពីម៉ារ៉ុក ២ រូប»។
ប្រភពពីមន្ត្រីបច្ចេកទេសសហព័ន្ធកីឡាគុនខ្មែរ បានឲ្យដឹងថា កីឡាករឆ្នើមខាងកម្ពុជាចំនួន ៦ នាក់នោះមានកីឡាករធឿន ធារ៉ា, ឡៅ ចិត្រា, ឡៅ ចន្ទ្រា, ឃីម ឌីម៉ា, ពេជ្រ ម្ទេសខ្មាំង និងឡុង សំណាង មកពីក្លិបឡុងសាលវ័ន្តនៃសមាគមប្រដាល់ក្រសួងមហាផ្ទៃ។
លោកហ៊ ង៉ែត ប្រធានផ្នែកកីឡា និងជាអ្នកអត្ថាធិប្បាយកីឡាប្រចាំសង្វៀនប៉ុស្តិ៍លេខ ៥ បាននិយាយថា៖ «សកម្មភាពកីឡាប្រដាល់ទាំង ៤ ថ្ងៃនេះ មានការផ្សាយផ្ទាល់មួយចប់ ហើយសមាសភាពកីឡាករប្រដាល់ ខ្ញុំមាននៅក្នុងដៃ ប៉ុន្តែខ្ញុំគ្មានសិទ្ធិ ឬតួនាទីប្រាប់ទៅផ្នែកសារព័ត៌មានទេ ពិសេសលក្ខខណ្ឌឬបទបញ្ជាផ្ទៃក្នុងការងារ មានខាងមេៗទទួលបន្ទុកផ្នែកនេះ»៕
