.jpg)
រឿង សោភ័ណ្ឌ ចង់ផ្តួលកីឡាករបារាំងម្នាក់នេះឲ្យសន្លប់ក្នុងរង្វង់៣ទឹក សម្រាប់ការជួបគ្នានៅ Khmer Fight។ រូបថត សហការី
ភ្នំពេញ៖ កីឡាករជើងខ្លាំងរបស់កម្ពុជាជាច្រើនរូបត្រូវបានផ្គូរផ្គងឲ្យប្រកួតជាមួយអ្នកប្រយុទ្ធមកពី ៤ ប្រទេស មានថៃ អ៊ីរ៉ង់ អាល់ហ្សេរី និងបារាំង នៅក្នុងព្រឹត្តិការណ៍ Khmer Fight ដែលត្រូវបានរៀបចំឡើងដោយទូរទស្សន៍ប៉ុស្តិ៍លេខ ៥ សហការជាមួយសហព័ន្ធកីឡាប្រដាល់គុនខ្មែរ និងសហភាពសហព័ន្ធយុវជនកម្ពុជាខេត្តកំពង់ស្ពឺ ដើម្បីអបអរសាទរពិធីបុណ្យអុំទូក ខេត្តកំពង់ស្ពឺ នាថ្ងៃទី ២ ដល់ទី ៣ ខែ វិច្ឆិកា ឆ្នាំ ២០១៩ ហើយអ្នកប្រដាល់មានឈ្មោះបោះសំឡេងរបស់កម្ពុជាមួយចំនួន ក៏ត្រូវបានដាក់ឲ្យប្រកួតគ្នា ដណ្តើមពានផងដែរ គឺ ២ ថ្ងៃនោះមានការប្រកួតរហូតដល់ ១២ គូ។
លោក សេង កដិកា នាយកគ្រប់គ្រងកម្មវិធីបានឲ្យដឹងថា៖ «នៅថ្ងៃដំបូង មានការប្រកួតដណ្តើមពានរង្វាន់ជើងឯកខេត្តកំពង់ស្ពឺ ៣ គូ ក្នុងនោះកីឡាករ លាភ រដ្ឋា ប៉ះ ម៉ន សាម៉េត, គង់ សំបូរ ជួប ឡុង សំណាង, យុគ យក្សផ្លែ ប្រកួតនឹង អេលីត សាន់ ព្រមទាំងអមដោយគូមិត្តភាពខ្មែរ និងខ្មែរ ៣ គូទៀត ហើយអ្វីដែលកាន់តែអស្ចារ្យ និងកក្រើកសង្វៀនខេត្តកំពង់ស្ពឺនោះ គឺការប្រឈមមុខដាក់គ្នារវាងជើងខ្លាំងទាំង ៦ នាក់ របស់កម្ពុជាយើង ជាមួយអ្នកប្រដាល់ ថៃ អ៊ីរ៉ង់ អាល់ហ្សេរី និងបារាំង សម្រាប់ការប្រកួតថ្ងៃទី ២»។
ជាមួយគ្នានេះ ការវិលមកជួបគ្នារវាង លាភ រដ្ឋា និង ម៉ន សាម៉េត បានក្លាយជាការប្រកួតសងសឹក ព្រោះ រដ្ឋា ទើបតែបានចាញ់ សាម៉េត ក្នុងការប្រកួតជើងឯកថ្នាក់ជាតិ ក្នុងលក្ខណៈតឹងតែងកាលពីពេលថ្មីៗ។ ម៉ន សាម៉េត ដែលទើបតែចាញ់ក្បាច់កែង និងជង្គង់របស់ អេលីត ចំរើន កាលពីសប្តាហ៍មុននេះ បាននិយាយថា៖ «លាភ រដ្ឋា ជាកីឡាករវាយកំពូលសម្រុកដែរ អ៊ីចឹងខ្ញុំមានការលំបាកណាស់ ក្នុងការយកឈ្នះ»។ ចំណែក លាភ រដ្ឋា ដែលទើបចាញ់ ព្រឿង សុជាតិទាំងវេទនាភ្នែកនោះ និយាយថា៖ «ការជួប ម៉ន សាម៉េត ម្តងនេះ គឺពិតជាចង់ឈ្នះ ប៉ុន្តែមិនដឹងថា ធ្វើបានល្អឬយ៉ាងណាទេ»។
ដោយឡែកសម្រាប់ការផ្គូរផ្គង ការប្រកួតថ្ងៃទី ២ ត្រូវនឹងថ្ងៃអាទិត្យ ទី ៣ ខែវិច្ឆិកា គឺរឿង សោភ័ណ្ឌ ត្រូវប៉ះបារាំង ABD Karim Bennala ក្នុងទម្ងន់ ៧១ គីឡូក្រាម ឯ ម៉ឺន សុភា ជួបកីឡាករអ៊ីរ៉ង់ Abdolash Anizh ក្នុងទម្ងន់ ៧១ គីឡូក្រាម ចំណែក វង្ស ណយ ត្រូវប៉ះអ៊ីរ៉ង់ Hamed Soleimani ក្នុងទម្ងន់ ៧១ គីឡូក្រាមដែរ ហើយ ព្រំ សំណាង ជួបថៃ Chhan Chhai ក្នុងទម្ងន់ ៧៦ គីឡូក្រាម ខណៈកីឡាករ ចាន់ សំអាត ប្រកួតនឹងថៃ Sattanpop ក្នុងទម្ងន់ ៦០ គ.ក្រ និង បឹង កាយ៉ាក ប៉ះកីឡាករមកពីអាល់ហ្សេរី Laimine Benkerou ក្នុងទម្ងន់ ៦០ គីឡូក្រាម។
សម្រាប់ការជួប ABD Karim Bennala លើកនេះ រឿង សោភ័ណ្ឌ បាននិយាយថា៖ «ខ្ញុំមិនធ្លាប់ដឹងពីសមត្ថភាពរបស់ដៃគូទេ ប៉ុន្តែពួកអឺរ៉ុបភាគច្រើន មិនអាចឆ្លងផុតដល់ ៥ ទឹកទេ គឺអាចនឹងសន្លប់ត្រឹមទឹកទី ៣ យ៉ាងយូរ ប៉ុន្តែបើសិនខ្ញុំផ្តួលគេមិនបាន គឺឈានចូលទឹកទី ៤ និងទឹកទី ៥ ខ្ញុំក៏លំបាកផ្នែកកម្លាំងដែរ»។
តាមប្រវត្តិអ្នកប្រដាល់បារាំង ABD Karim Bennala ធ្លាប់ប្រកួតទើបបាន ៤៥ ដង ឈ្នះ ៣៨ លើក និងចាញ់ ៧ ដង ខណៈដែល រឿង សោភ័ណ្ឌ មានប្រវត្តិប្រកួតចំនួន ១៦០ ដង ឈ្នះ ១៤០ លើក ចាញ់ ១៥ និងស្មើ ៥ ដង ហើយធ្លាប់ផ្តួលគូប្រកួតឲ្យសន្លប់បានចំនួន ៦៥ ដង។
យ៉ាងណាក៏ដោយ មហាជននៅតែរង់ចាំមើលថា តើ រឿង សោភ័ណ្ឌ និង ABD Karim Bennala នរណាអ្នកឈ្នះ? ព្រោះការប្រកួតរបស់ រឿង សោភ័ណ្ឌ ប៉ុន្មានលើកចុងក្រោយ ហាក់មានការធ្លាក់ចុះបន្តិច។ ចំណែកការប្រកួតរបស់ វង្ស ណយ, ម៉ឺន សុភា, ព្រំ សំណាង, បឹង កាយ៉ាក និង ចាន់ សំអាត សុទ្ធតែស្ថិតក្នុងការចាប់អារម្មណ៍ ប៉ុន្តែប្រភពពីអ្នកតាមដានកម្មវិធី Khmer Fight តែងតែមានជំនឿថា កីឡាករមកពីបរទេសភាគច្រើន មកប្រកួតគម្រប់កិច្ច ហើយការឈ្នះចាញ់ គឺអ្នករៀបចំដឹងមុនបាត់ ព្រោះគេមិនយកកីឡាករខ្លាំងៗមកឲ្យឈ្នះកីឡាករខ្មែរនោះទេ៕
