.jpg)
វង្ស ណយ បានព្យាយាមទប់ការទាត់របស់កីឡាករអីុរ៉ង់ ក្នុងការប្រកួត Khmer Fight ពីថ្ងៃអាទិត្យ។ សហការី
ភ្នំពេញ៖ ការប្រកួតប្រដាល់ Khmer Fight លើកទី ៣ ដែលសង្វៀនប៉ុស្តិ៍លេខ ៥ បានសហការរៀបចំជាមួយសហភាពសហព័ន្ធយុវជនកម្ពុជា និងអាជ្ញាធរខេត្តកំពង់ស្ពឺ នៅលើទីលានបាល់ទាត់ខេត្ត កាលពីយប់ថ្ងៃអាទិត្យ មានមហាជនចូលរួមទស្សនាជិតមួយម៉ឺននាក់ ទោះជាការប្រកួតនេះ ធ្វើឡើងក្រោមតំណក់ទឹកភ្លៀងជោកជាំក៏ដោយ ខណៈលទ្ធផលប្រកួតក្នុងចំណោមកីឡាករកម្ពុជាទាំង ៦ នាក់ គឺយើងឈ្នះ ៤ ចាញ់ ១ និងស្មើ ១ នាក់។
កីឡាករថៃ បារាំង អ៊ីរ៉ង់ និងអាល់ហ្សេរី ដែលយកមកប្រកួតលើកនេះ សុទ្ធតែមានសមត្ថភាពខ្លាំងៗ និងល្អៗ ប៉ុន្តែផ្នែកបច្ចេកទេសកាត់សេចក្តីពីសំណាក់គណៈកម្មការរៀបចំប្រកួតត្រូវបានគេមើលឃើញថា ទំនងមានចេតនាជួយកីឡាករខ្មែរ ឲ្យមានប្រៀបឈ្នះ ទោះការប្រកួតគូខ្លះចាញ់ប្រៀបកីឡាករបរទេសក៏ដោយ ប៉ុន្តែប្រធានសហព័ន្ធកីឡាប្រដាល់គុនខ្មែរបានអះអាងថា លទ្ធផលប្រកួតនេះល្អ អាចទទួលយកបានដោយគ្មានភាគីណាតវ៉ាទេ។
លោក ហ៊ ង៉ែត អ្នកសម្របសម្រួលកម្មវិធី និងជាអ្នកអត្ថាធិប្បាយនិយាយថា៖ «ថ្នាក់នាំប្រមុខសហភាពសហព័ន្ធយុវជនកម្ពុជា និងអាជ្ញាធរខេត្តកំពង់ស្ពឺ ព្រមទាំងមហាជនប្រមាណ ១ ម៉ឺននាក់ មានការអបអរសាទរខ្លាំងណាស់ ចំពោះព្រឹត្តិការណ៍ប្រកួតដ៏អស្ចារ្យនេះ ហើយឯកឧត្តម ហ៊ុន ម៉ានី លោកអភិបាលខេត្តកំពង់ស្ពឺ ព្រមទាំងមន្ត្រីទូតម្ចាស់ស្ថានីយទូរទស្សន៍ ថ្នាក់ដឹកនាំជាន់ខ្ពស់គ្រប់ជាន់ថ្នាក់ និងមហាជន មានវត្តមាននៅទីលានប្រកួតក្រោមតំណក់ទឹកភ្លៀងទាំងអស់គ្នា គ្មាននរណាមានដំបូលជ្រកទេ គឺនៅទស្សនាដល់ចប់ ៦ គូតែម្តង»។
ទាក់ទងទៅនឹងមតិលើកឡើងរបស់អ្នកទស្សនាមួយចំនួនរិះគន់ថា គណៈកម្មការត្រូវបានគេរៀបចំផ្តល់ពិន្ទុ មានលក្ខណៈយឹតយោងកីឡាករខ្មែរច្រើនជាងកីឡាករបរទេសនោះ លោក ហ៊ ង៉ែត បញ្ជាក់ថា៖ «ខ្ញុំមិនអាចឆ្លើយតបបានទេ ព្រោះនេះជាភារកិច្ចមន្ត្រីបច្ចេកទេសរបស់សហព័ន្ធកីឡាប្រដាល់គុនខ្មែរទាំងស្រុង»។
សម្រាប់ការប្រកួត ដែលមានត្រឹម ៣ ទឹក កីឡាករកម្ពុជា បាង កាយ៉ាក បានឈ្នះអ្នកប្រដាល់អាល់ហ្សេរី Laimine Benkerou នៅមុនស្នូរជួងបញ្ចប់ទឹកទី ៣ ដោយប្រើជើងទាត់ចំកញ្ចឹងក ប៉ុន្តែ ចាន់ សំអាត ប្រកួតចាញ់អ្នកប្រដាល់ថៃ Sattranphup ដោយពិន្ទុដាច់ ខណៈដែលចៅក្រមមិនអាចយឹតយោងជួយបាន ហើយ ម៉ឺន សុភា បានប្រើកណ្ដាប់ដៃផ្ដួលអ្នកប្រដាល់អ៊ីរ៉ង់ Abdul Lash ឲ្យសន្លប់ត្រឹមទឹកទី ២។
ជាមួយគ្នានេះ វង្ស ណយ ប្រកួតចាញ់ប្រៀបអ្នកប្រដាល់អ៊ីរ៉ង់ Amed Soleymony ប៉ុន្តែត្រូវបានយឹតយោងឲ្យស្មើគ្នា។ វង្ស ណយ បានបែក ២ កន្លែង តាំងពីទឹកទី ១ ហើយត្រូវបានដៃគូវ៉ៃឲ្យរាប់នៅទឹកទី ១ តែនៅទឹកទី ៣ វង្ស ណយ វ៉ៃឲ្យអាជ្ញាកណ្តាលរាប់កីឡាករអ៊ីរ៉ង់វិញ។ រីឯ ព្រំ សំណាង ឈ្នះថៃ Chhan Chhai ដោយពិន្ទុទាំងវេទនា ខណៈដែលអ្នកទស្សនាភាគច្រើនបានមើលឃើញថា ព្រំ សំណាង បានចាញ់ថៃ ហើយ រឿង សោភ័ណ្ឌ ឈ្នះពិន្ទុបារាំង Abdel Karim Baennala ដោយពិន្ទុទាំងលំបាកលំបិន និងវេទនាខ្លួន។
ជុំវិញការកាត់ក្តីនេះ លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ ដែលមានវត្តមានផ្ទាល់នៅទីនោះ បានថ្លែងថា៖ «លទ្ធផលបានប៉ុណ្ណឹងល្អហើយ ដោយទទួលយកបានគ្រប់ភាគី គឺគ្មាននរណាតវ៉ានោះឡើយ។ ចំពោះគូ វង្ស ណយ ឲ្យស្មើគ្នានោះ គឺសមរម្យ ព្រោះការតស៊ូដូចគ្នា វ៉ៃលើសខ្វះគ្នាបន្តិចបន្តួច ហើយក៏ជាកម្មវិធីមិត្តភាពផង។
ចំពោះគូ ព្រំ សំណាង គឺកីឡាករថៃវ៉ៃល្អ តែក្នុងទឹកទី ១ ហើយ ២ ទឹកចុងក្រោយ ថៃមិនសូវវ៉ៃ ខណៈ ព្រំ សំណាង ព្យាយាមបានល្អដោយវាយសម្រុករហូត គឺអាចទទួលយកបាន ព្រោះបើយើងខ្លាំងពូកែ មិនព្រមវ៉ៃចេញច្រើនគឺចាញ់សមហើយ»៕
