ភ្នំពេញៈ ក្រុមម្ចាស់ជើងឯករង២ជំនាន់ Khmer United បានបង្កើនការជឿជាក់កាន់តែខ្លាំង ក្នុងការជម្នះការលំបាក ដើម្បីឆ្ពោះទៅដណ្តើមតំណែងជើងឯក ការប្រកួតលីកខ្មែររៀលអ៊ីស្ទេត ឆ្នាំ ២០១៨ បន្ទាប់ពីក្រុមមួយនេះ បានយកឈ្នះក្រុមម្ចាស់ពានឆ្នាំ២០១៧ Bayon Wanderers នៅក្រោមតំណក់ទឹកភ្លៀង ដើម្បីបំពេញការសងសឹកពីអតីតកាល កាលពីថ្ងៃអាទិត្យ ម្សិលមិញ។
បើទោះបីជាការប្រកួត នៅលើទីលានដំរី កាលពីថ្ងៃអាទិត្យនោះ មានភាពស្វិតស្វាញខ្លាំង និងមានការលំបាក ព្រោះត្រូវលេងក្រោមតំណក់ទឹកភ្លើង ប៉ុន្តែក្រុម Khmer United បានយកឈ្នះក្រុម Bayon រហូតដល់ ៣-០ ហើយដ៏លទ្ធផលដ៏ល្អនេះ វាមិនត្រឹមតែជួយឲ្យពួកគេ បានបន្តឈរនៅលេខរៀងទី ២ ជាមួយការឈ្នះទាំង ៥ ប្រកួតប៉ុណ្ណោះទេ ប៉ុន្តែវាបានក្លាយជាការសងសឹកមួយទៅលើក្រុម Bayon ដែលពួកគេធ្លាប់ចាញ់ ៣-១ ក្នុងការប្រកួតផ្តាច់ព្រ័ត្រ កាលពីឆ្នាំ ២០១៧។
លោក គង់ សៀន គ្រូបង្វឹកក្រុម Khmer United បានចាត់ទុកការឈ្នះក្រុម Bayon ៣-០ លើកនេះ ជាការត្រូសត្រាយផ្លូវមួយយ៉ាងសំខាន់ ក្នុងការជួយឲ្យក្រុមរបស់លោក មានទំនុកចិត្តកាន់តែខ្លាំង ក្នុងការឆ្ពោះទៅរកតំណែងជើងឯក។
លោកបានប្រាប់មុននេះបន្តិចថា៖ «នេះជាលទ្ធផលដ៏ល្អ ព្រោះយើងបានឈ្នះក្រុមម្ចាស់ជើងឯក ហើយ Bayon ជាឧបសគ្គយ៉ាងធំមួយសម្រាប់យើង អ៊ីចឹងជ័យជម្នះនេះ បានធ្វើឲ្យខ្ញុំ និងកីឡាករទាំងអស់ ប្តេជ្ញាចិត្ត នឹងខំប្រឹងយកពានមួយនេះឲ្យបាន តែលទ្ធផលទទួលបានយ៉ាងណានោះ យើងនៅមិនទាន់ដឹងទេ គ្រាន់តែថា ក្តីសង្ឃឹម និងការស្រមើស្រម័យរបស់យើង គឺត្រូវដណ្តើមយកពាននេះឲ្យបាន»។
ជាមួយគ្នានេះដែរ លោក គង់ សៀន ក៏បានបង្ហើបដែរថា ការយកឈ្នះក្រុម Bayon លើកនេះ ដោយសារលោកបានប្តូរប្រព័ន្ធលេង។
លោកបាននិយាយថា៖ «កាលចាញ់ក្រុម Bayon ៣-១ ក្នុងវគ្គផ្តាច់ព្រ័ត្រ កាលពីឆ្នាំមុន យើងបានប្រើប្រព័ន្ធលេង ៤-២-៤ ដែលធ្វើឲ្យមានចន្លោះប្រហោងសម្រាប់គូប្រកួត ប៉ុន្តែលើកនេះយើងបានប្រើប្រព័ន្ធលេង ៤-៣-៣ ដែលប្រព័ន្ធថ្មីនេះ យើងលេងបានល្អ ស៊ីចង្វាក់គ្នា និងទទួលបានលទ្ធផលល្អ»។
យ៉ាងណាក៏ដោយ គ្រូបង្វឹករូបនេះ គ្រោងនឹងធ្វើការផ្លាស់ប្តូរប្រព័ន្ធលេងទៅតាមស្ថានភាពជាក់ស្តែង និងតាមសមត្ថភាពគូប្រកួត ដែលពួកគេត្រូវជួបជាបន្តទៀត ខណៈក្រុម Blue Dragon អាណាចក្រទួលគោក និង Riel PP ត្រូវបានលោក គង់ សៀន ចាត់ទុកថា ជាក្រុមខ្លាំងដែល Khmer United ត្រូវតែមានការប្រុងប្រយ័ត្នឲ្យបានខ្លាំង។
សម្រាប់ការប្រកួតប្រចាំសប្តាហ៍ទី ៥ កាលពីថ្ងៃសៅរ៍ និងថ្ងៃអាទិត្យ នោះដែរ ក្រុម Blue Dragon បានយកឈ្នះក្រុមយុវជនតាំងគោក ៤-២ ដើម្បីបន្តឈរនៅលើកំពូលតារាង ដោយមាន ១៥ ពិន្ទុស្មើជាមួយក្រុម Khmer United។ រីឯក្រុមអាណាចក្រទួលគោក បានយកឈ្នះក្រុម V.Train ៤-១ ដើម្បីហក់ពីលេខ ៩ មកឈរនៅលេខ ៣ ដែលជាទីតាំងចាស់របស់ក្រុមមាន ៩ ពិន្ទុ Bayon។
ចំណែកក្រុម Riel PP បានយកឈ្នះក្រុមចម្រុះដោយបរទេស Anvaya FC ៣-០ ដើម្បីបន្តឈរនៅលេខរៀងទី ៤ ដោយមាន ១២ ពិន្ទុ ស្មើជាមួយក្រុមអាណាចក្រទួលគោក ហើយ Avatar បានលត់ក្រុមយុវជនវត្តកោះ ៦-២ ដើម្បីឈរនៅលេខ ៥ ដដែល មាន ១២ ពិន្ទុដែរ ប៉ុន្តែក្រុមយុវជនកំពង់ចាម បានត្រឹមស្មើ ២-២ ជាមួយក្រុមទន្សោងអេហ្វស៊ី។
ផ្ទុយពីនេះក្រុមយុវជនច្បាប់ និង RFL រកបាន៣ពិន្ទុបន្ថែមដូចគ្នា ដោយក្នុងនោះ យុវជនច្បាប់ បានឈ្នះក្រុម Mambo PP ៥-២ ហើយ RFL បានលត់ក្រុម HHK ៥-១ ខណៈក្រុមកូនខ្មែរ បានបំបាក់ក្រុមយុវជនស្នោរ ៤-០ ដើម្បីទទួលបាន ៣ ពិន្ទុ ជាលើកដំបូង ប៉ុន្តែជំនួបរវាងក្រុមបាសាក់ និង Gaint FT កាលពីថ្ងៃអាទិត្យនោះដែរ ត្រូវបានផ្អាកត្រឹមតង់ទី ១ និងត្រូវលើកពេលប្រកួត ដោយសារភ្លៀងខ្លាំងពេក មិនអាចបន្តការប្រកួតទៀតបាន៕