.jpg)
សេះកម្រិតស្តង់ដារអន្តរជាតិ ឈរនៅពូលA ដែលត្រូវបានដាក់ឲ្យប្រណាំងគ្នា នៅលើទីលាន SCT Sport Complex នាពេលកន្លងមក។ រូប សហការី
ភ្នំពេញៈ វត្តមានរបស់សេះ ដែលទើបមានអាយុបាន ២ ឆ្នាំ ឈ្មោះ KK បានញ៉ាំងឲ្យព្រឹត្តិការណ៍ប្រកួតកីឡាប្រណាំងសេះ ដណ្ដើមពានរង្វាន់ Smart Land Home Champion 2018 ប្រចាំខែមីនា នៅលើទឹកដីវិហារសួគ៌ កាលពីថ្ងៃអាទិត្យ ម្សិលមិញ បានដំណើរទៅ ជាមួយអ្នកគាំទ្រខ្លួន កាន់តែច្រើន។
ការកើនឡើងនៃចំនួនអ្នកទស្សនាផ្ទាល់នេះ ដោយសារតែមានអ្នកភូមិជាង ១០០ នាក់ ដែលជាអ្នកគាំទ្រផ្ទាល់ទៅលើសេះឈ្មោះ KK សុទ្ធតែបានមកទស្សនាដោយផ្ទាល់ ចំពោះការប្រណាំងសេះ ប្រចាំខែនេះ ព្រោះពួកគាត់ ចង់ឃើញពីល្បឿននៃការត់របស់ KK ម្តងទៀត ខណៈការចូលរួមលើកមុន KK ទទួលបានចំណាត់ថ្នាក់លេខ ៣។
ប៉ុន្តែ KK ដែលមានកម្ពស់ ១,៤៧ ម៉ែត្រ និងមានបទពិសោធនូវខ្ចីនោះ បានត្រឹមទទួលចំណាត់ថ្នាក់លេខ ៤ ក្នុងចំណោមសេះចូលរួមសរុប ១៨ ក្បាល ក្នុងការប្រកួតពូល C ប្រចាំខែមីនានេះ ខណៈសេះឈ្មោះ Man Do Za ទទួលបានលេខ ១ ឯលេខ ២ បានទៅសេះឈ្មោះ Pal SO និងលេខ ៣ បានទៅសេះឈ្មោះ អាចាន់សម័យ។
យ៉ាងណាក៏ដោយ អ្នកគាំទ្រផ្ទាល់របស់ KK នៅតែចង់ឃើញពីការបង្ហាញសមត្ថភាពរបស់សេះមួយក្បាលនេះ សម្រាប់ការប្រកួតប្រចាំខែក្រោយៗទៀត ហើយម្ចាស់របស់សេះមួយក្បាលនេះ ក៏មានមហិច្ឆតាធំផងដែរ ដោយចង់ដាក់ឲ្យ KK ចូលរួមប្រកួតប្រជែងជាមួយសេះកម្រិតស្តង់ដារអន្តរជាតិ ក្នុងពូល A នាពេលអនាគត។
ជាមួយនឹងដំណឹងនេះ លោក អឿន សុផល អ្នកមើលការខុសត្រូវក្នុងកសិដ្ឋានចិញ្ចឹមសេះរបស់ 7NG បានបញ្ជាក់ថា វាអាចទៅរួច ក្នុងការដាក់សេះឈ្មោះ KK ឲ្យចូលរួមការប្រកួតនៅពូលA នាពេលអនាគត ព្រោះសេះនេះ នៅមានអាយុក្មេងខ្ចីនៅឡើយ អ៊ីចឹងបើសិនសេះ និងម្ចាស់សេះ KK មានការព្យាយាមហ្វឹកហាត់បន្ថែមទៀត គឺសមត្ថភាពរបស់សេះមួយនេះ នឹងមានការរីកចម្រើនជាងនេះ។
សម្រាប់ការប្រកួត នៅលើទីលាន SCT Sport Complex របស់ 7NG ប្រចាំខែមីនា កាលពីថ្ងៃអាទិត្យ នោះ ក៏មានការប្រកួតប្រជែងរវាងសេះឈរនៅពូល D ចំនួន ១៨ ក្បាលទៀត ផងដែរ ហើយជាលទ្ធផល សេះឈ្មោះ អាផ្កាយ ទទួលបានចំណាត់ថ្នាក់លេខ ១ សេះឈ្មោះ អារ៉េ បានលេខ ២ និងសេះឈ្មោះ អាសប្បាយ ទទួលបានចំណាត់ថ្នាក់លេខ ៣។
ប៉ុន្តែ ចំពោះសេះកម្រិតស្តង់ដារអន្តរជាតិ ឈរនៅពូល A នៅតែមិនទាន់ដាក់ឲ្យមានការប្រកួតប្រជែង នៅក្នុងខែមីនានេះដដែល។
យ៉ាងណាក៏ដោយ អ្នករៀបចំការប្រកួតនេះ បានឲ្យដឹងថា សេះឈរនៅពូល A ត្រូវបានឲ្យឈប់សម្រាក ដើម្បីត្រៀមកម្លាំងចូលរួមការប្រកួតផ្តាច់ព្រ័ត្រ យកពានធំ Smart Land Home Champion និងប្រាក់រង្វាន់ ២៥០០០ ដុល្លារ ជាមួយសេះមកពីក្រៅប្រទេស ដែលគ្រោងនឹងធ្វើនៅថ្ងៃទី ៧ ខែមេសា ឆ្នាំ ២០១៨ ខាងមុខនេះ៕
