.jpg)
Salah ស៊ុតបាល់ក្នុងការប្រកួតពានអឺរ៉ុបជាមួយក្រុម Watord ពីថ្ងៃសៅរ៍។ រូបថត AFP
ក្រុងឡុងដ៍៖ គ្រូបង្វឹកក្លិប Liverpool លោក Jurgen Klopp បានខឹងសម្បាយ៉ាងខ្លាំង ចំពោះសំណើសុំមួយដែលអាចធ្វើឲ្យដំណាក់កាលប្រកួតក្នុងពូលក្របខ័ណ្ឌ Champions League ត្រូវប្រែក្លាយជាផ្នែកមួយមាន ៣២ ក្រុម។
ក្លិបជាម្ចាស់ជើងឯកអឺរ៉ុបនេះមានកម្មវិធីប្រកួតជាកញ្ចប់រួចទៅហើយ ដោយក្លិបLiverpool គ្រោងនឹងធ្វើដំណើរទៅប្រទេស កាតា សម្រាប់ការប្រកួត Club World Cup ក្នុងពេលមិនដល់ ២៤ ម៉ោង ក្រោយពីបានឈ្នះក្រុម Watford ២-០ នៅកីឡដ្ឋាន Anfield ពីថ្ងៃសៅរ៍។
ជាការពិតនៅសប្ដាហ៍នេះក្រុម Liverpool មានផែនការប្រកួតចំនួន ២ ជាប់គ្នា ដោយលោក Klopp គ្រោងនឹងដឹកនាំក្រុមយុវជនចូលរួមប្រកួតនៅវគ្គ ៨ ក្រុមចុងក្រោយ ជាមួយក្រុម Aston Villa ក្នុងក្របខ័ណ្ឌ League Cup របស់អង់គ្លេសនៅថ្ងៃអង្គារមុនពេលក្រុមកីឡាករជើងចាស់ធ្វើការប្រកួតនៅទីក្រុងដូហា ប្រទេស កាតា នៅថ្ងៃពុធ។
លោក Klopp មិនសប្បាយចិត្តនឹងផែនការជជែកពីការបង្កើនការប្រកួតនៅក្របខ័ណ្ឌ Champions League នោះទេ ព្រោះវានឹងធ្វើឲ្យក្រុមរបស់គាត់មានផែនការប្រកួតកាន់តែច្រើនថែមទៀត។
លោក Klopp បានប្រាប់ក្រុមអ្នកកាសែតក្រោយពីប្រកួតជាមួយក្រុម Watford ថា ៖ «ថ្ងៃនេះខ្ញុំបានអានកាសែតឃើញក្លិបធំៗមួយចំនួនចង់ឲ្យគេបង្កើនការប្រកួតនៅក្របខ័ណ្ឌ Champions League ហើយខ្ញុំមិនពាក់ព័ន្ធនឹងផែនការនេះ ប៉ុន្តែនោះគឺពិតជារឿងមិនល្អទេ»។
គ្រូបង្វឹករូបនេះបានបន្ថែមថា៖ «ការប្រកួត គឺបែបនេះឯង។ អ្នកទាំងអស់គ្នាចូលចិត្តឃើញយើងរងគ្រោះ តើមែនទេ?»។
គ្រូបង្វឹកសញ្ជាតិអាល្លឺម៉ង់រូបនេះបានបន្ថែមថា៖ «ប្រព័ន្ធផ្សព្វផ្សាយមើលទៅដូចជាមានការព្រួយបារម្ភ ប៉ុន្តែតាមពិតគឺគ្មានអ្នកណាមួយបែបនោះទេ ពីព្រោះយើងនិយាយពីរឿងនេះ ហើយគ្មានអ្នកផ្សេងទៀតហ៊ាននិយាយបែបនេះទេ»។
លោក Klopp បាននិយាយទៀតថា៖ «យើងត្រូវធ្វើអ្វីមួយដែលយើងចង់ធ្វើ និងមានលក្ខណវិជ្ជមាន»។
ក្នុងការប្រកួតពីថ្ងៃសៅរ៍នោះ កីឡាករ Salah រកបាន ២ គ្រាប់តែម្នាក់ឯង ដើម្បីជួយឲ្យក្រុម Liverpool នាំមុខគេដាច់ ១០ ពិន្ទុ ជាមួយជ័យជម្នះទៅលើក្រុម Watford ២-០ ក្រោយពីក្រុម Leicester ឈរនៅលេខ ២ នៃក្របខ័ណ្ឌ Premier League បានត្រឹមស្មើគ្នា ១-១ ជាមួយក្រុម Norwich នៅថ្ងៃនោះដែរ។
លោក Klopp បាននិយាយថា៖ «នៅខែធ្នូ និងជាពិសេសនៅខែមករានោះ អ្នកត្រូវតែបង្ហាញពីភាពមានថាមពលឡើងវិញ ដែលជារឿងសំខាន់បំផុត ហើយយើងបានធ្វើបែបនោះមែន។ យើងត្រូវតែប្រយុទ្ធតាមទម្លាប់ធម្មតាដែលយើងបានឈ្នះកន្លងមកនេះ»។
គ្រូបង្វឹករូបនេះក៏បានជំរុញឲ្យក្រុមអ្នកគាំទ្រក្រុម Liverpool បន្តរីករាយនឹងការធ្វើដំណើររបស់ក្រុមនេះ ក្រោយពីគាត់បានចុះកុងត្រាជាមួយក្រុមហង្សក្រហមនេះរហូតដល់ឆ្នាំ ២០២៤៕
