ភ្នំពេញ៖ ស្ថាបនិកបង្កើតពានបាល់ទាត់ពាក់កណ្តាលអាជីព Keller Williams Cambodia League (KW Cambodia League) លោកឧកញ៉ាបណ្ឌិត គីម ហ៊ាង បានបង្ហើបថា KW Cambodia League រដូវកាល ឆ្នាំ ២០២១ នឹងមានការប្រកួតកាន់តែធំ និងពិសេសជាងឆ្នាំណាៗទាំងអស់ ហើយរង្វាន់អាចនឹងកើនលើសពី ១ ម៉ឺនដុល្លារ។
នៅក្នុងពិធីបិទការប្រកួតពាន KW Cambodia League 2020 នៅកីឡដ្ឋាន KMH កាលពីព្រលប់ថ្ងៃអាទិត្យ លោកបណ្ឌិតបានចាត់ទុកការជម្នះការលំបាកនៃវិបត្តិជំងឺកូវីដ ១៩ ដើម្បីបញ្ចប់ការប្រកួតនៅរដូវកាលនេះថា ជាការបង្ហាញផ្លូវទៅដល់ក្រុមហ៊ុនឯកជន និងអ្នកមានទ្រព្យឱ្យងាកមកចូលរួមជួយវិស័យបាល់ទាត់នៅស្រុកខ្មែរ។
ប្រធានក្រុមហ៊ុនអចលនទ្រព្យ KW Cambodia លោកបណ្ឌិត គីម ហ៊ាង បានថ្លែងថា៖ «ឆ្នាំ ២០២០ នេះជារដូវកាលទី៩ ដែលយើងបានរៀបចំឱ្យមានការប្រកួតពានរង្វាន់នេះ ហើយក៏ជាឆ្នាំដែលពិបាកបំផុត ព្រោះមានវិបត្តិជំងឺកូវីដ ១៩ ដោយយើងត្រូវពន្យារការប្រកួតជិត ៤ ខែ ប៉ុន្តែយើងបានតស៊ូរហូតដល់ចប់ គឺយើងបានបំពេញកាតព្វកិច្ច និងការងារដោយជោគជ័យ ហើយជាមោទនភាពមួយ ដែលយើងក្នុងនាមជាក្រុមហ៊ុនឯកជនដំបូងគេនៅស្រុកខ្មែរបានចំណាយធនធានផ្ទាល់ខ្លួនក្នុងការបង្កើតពានបាល់ទាត់ក្នុងរយៈពេល ៩ ឆ្នាំមកនេះ»។
លោកបានបន្តថា៖ «ក្នុងនាមជាថ្នាក់ដឹកនាំ KW Cambodia ខ្ញុំមានជំនឿចិត្តថា អ្វីដែលយើងបានធ្វើនេះ គឺជាផ្លូវដ៏ត្រឹមត្រូវមួយ ហើយវាអាចជាការបង្ហាញផ្លូវមួយទៅដល់ក្រុមហ៊ុនឯកជនផ្សេងៗទៀត ដែលមានសមត្ថភាពឱ្យងាកមកជួយវិស័យបាល់ទាត់ដែរ ព្រោះនៅស្រុកយើងមិនខ្វះអ្នកមានសមត្ថភាព និងមិនខ្វះក្រុមហ៊ុនធំៗនោះទេ អ៊ីចឹងពួកគាត់អាចចូលរួមអភិវឌ្ឍបាល់ទាត់តាមស្ថានភាពជាក់ស្តែង»។
តាមរយៈការប្រកួតប្រជែងពានរង្វាន់ KW Cambodia League 2020 នេះ ក្រុមចំណូលថ្មី TN Kandal FC បានក្លាយជាម្ចាស់ជើងឯក (ពានធំ) អមជាមួយប្រាក់រង្វាន់ចំនួន ១ ម៉ឺនដុល្លារ ឬ ៤០ លានរៀល។ រីឯក្រុម Khmer United បានយកឈ្នះក្រុម Avatar ២-១ ក្នុងការប្រកួតផ្តាច់ព្រ័ត្រ កាលពីល្ងាចថ្ងៃអាទិត្យនោះ ដើម្បីឈ្នះពានតូច KW Cambodia Cup 2020 អមដោយប្រាក់រង្វាន់ ២០ លានរៀល ហើយ Avatar បានប្រាក់ ១០ លានរៀល។
ចំណែកអតីតក្រុមម្ចាស់ជើងឯកឆ្នាំចាស់ ISI DSC FC បានត្រឹមលេខ ៣ ក្រោយពេលពួកគេឈ្នះក្រុម Riel Phnom Penh ៤-១ ហើយលទ្ធផលនេះ បានធ្វើឱ្យ ISI បានប្រាក់ ៥ លានរៀលរៀល ខណៈក្រុម Riel បាន ៣ លានរៀល ឯក្រុមតាំងគោក បានជាប់ជាក្រុមមានវិន័យល្អ ដោយបាន ២ លានរៀល ហើយអ្នកចាំទី យឿង សុផានិត របស់ Khmer United បានជាប់ឈ្មោះជាអ្នកចាំទីល្អ ហើយខ្សែប្រយុទ្ធ រ៉ាហ្វីអ៊ែល ក្វាតូ បានឈ្នះពានជាអ្នកទាត់បញ្ចូលទីច្រើនជាងគេ ដោយអ្នកទាំង ២ នេះ ទទួលបានប្រាក់រង្វាន់ ១ លានរៀលដូចគ្នា។
ចំពោះគម្រោងការប្រកួតនៅរដូវកាលក្រោយ លោកបណ្ឌិត គីម ហ៊ាង បាននិយាយថា៖ «រដូវកាល ឆ្នាំ ២០២១ គឺជាគម្រប់ ១០ ឆ្នាំ ដែលយើងបានបង្កើតឱ្យមានពានរង្វាន់នេះឡើង អ៊ីចឹងយើងនឹងធ្វើអ្វីដែលពិសេស ដែលយើងមិនធ្លាប់បានធ្វើសម្រាប់រយៈពេល ៩ ឆ្នាំកន្លងមកនេះ ហើយអ្វីដែលពិសេសនេះ ខ្ញុំសូមរក្សាទុកសិន គឺចាំដល់ពេលយើងប្រកាសពីការចាប់ផ្តើមរដូវកាល ឆ្នាំ ២០២១ នៅក្នុងខែកុម្ភៈ នោះបងប្អូននឹងបានដឹងថា ពីភាពពិសេសរបស់ពានរង្វាន់ KW Cambodia League ប្រចាំនៅស្រុកខ្មែរ»។
ទោះជាយ៉ាងណាអគ្គនាយកក្រុមហ៊ុន ខ្មែរ រៀលអ៊ីស្ទេត លោក គីម ហ៊ាង បានបង្ហើបថា សម្រាប់ការប្រកួតរដូវកាល ឆ្នាំ ២០២១ នឹងសម្រិតសម្រាំងយកតែក្រុមខ្លាំងៗ កម្រិតពាក់កណ្តាលអាជីពឱ្យចូលរួម ហើយប្រាក់រង្វាន់អាចនឹងកើនលើសពី ១ ម៉ឺនដុល្លារ ឯការចំណាយក៏នឹងមានការកើនឡើងដែរ ខណៈឆ្នាំនេះក្រុមហ៊ុន KW Cambodia បានចំណាយចូល ៣៧ ០០០ ដុល្លារ សម្រាប់ការរៀបចំពានពាក់កណ្តាលអាជីពមួយនេះ៕