ក្រុងម៉ា្រឌីដ៖ ក្របខ័ណ្ឌកំពូលរបស់ប្រទេស អេស្ប៉ាញ La Liga បាននិយាយពីថ្ងៃអាទិត្យថា ក្របខ័ណ្ឌនេះបានផ្ដួចផ្ដើមនីតិវិធីទោសព្រហ្មទណ្ឌប្រឆាំងក្រុមអ្នកគាំទ្រណាដែលត្រូវបានគេនិយាយថា បានបៀតបៀនជាតិសាសន៍ចំពោះកីឡាករ Inaki Williams នៅក្លិប Athletic Bilbao ក្នុងការប្រកួតនៅទឹកដីក្រុម Espanyol កាលពីចុងសប្ដាហ៍មុន។
កីឡាករ Williams បាននិយាយថា រូបគាត់គឺជាជនរងគ្រោះដោយសារការរើសអើងជាតិសាសន៍នៅក្នុងអំឡុងពេលប្រកួតស្មើគ្នា ១-១ របស់ក្លិប Bilbao នៅកីឡដ្ឋាន RCDE កាលពីថ្ងៃសៅរ៍។
របាយការណ៍របស់ក្របខ័ណ្ឌនេះបាននិយាយថា៖ «La Liga សូមធ្វើការច្រានចោល និងថ្កោលទោសយ៉ាងខ្លាំងក្លារបស់ខ្លួនពាក់ព័ន្ធនឹងហេតុការណ៍ដែលបានកើតឡើង កាលពីថ្ងៃម្សិលមិញ»។
របាយការណ៍ដដែលនេះបានបន្ថែមថា៖ «យើងដឹងថា វិធានការណ៍ដែលបានអនុវត្តក្នុងរយៈពេលប៉ុន្មានឆ្នាំថ្មីៗនេះមានភាពល្អប្រសើរ ប៉ុន្តែនៅពេលពួកគេបានមើលឃើញការធ្លាក់ចុះនូវការប្រមាថហិង្សា និងអាកប្បកិរិយាទាំងនៅក្នុង និងក្រៅកីឡដ្ឋានបាល់ទាត់ ពួកគេនៅតែរងគ្រោះដោយសារទង្វើនេះដដែល។ នេះបើយោងតាមភ័ស្ដុតាងកាលពីម្សិលមិញ»។
សេចក្តីថ្លែងការណ៍នេះបានបន្ថែមថា៖ «La Liga បានផ្តួចផ្តើមនីតិវិធីមួយ ដើម្បីកំណត់អត្តសញ្ញាណអ្នកគាំទ្រដែលបានប្រមាថកីឡាករ Inaki Williams ក្នុងគោលបំណងផ្តួចផ្តើមនីតិវិធីព្រហ្មទណ្ឌសម្រាប់ទោសឧក្រិដ្ឋកម្មស្អប់ខ្ពើម»។
ក្របខ័ណ្ឌ La Liga បាននិយាយថា ក្របខ័ណ្ឌនេះក៏នឹងអនុវត្តការពិនិត្យមើលឡើងវិញនូវការលក់សំបុត្រ និងរាយការណ៍ពីឥរិយាបថបែបហិង្សា ប្រកាន់ពូជសាសន៍ និងស្អប់ខ្ពើមប្រាប់ទៅ គណៈកម្មការប្រឆាំងអំពើហិង្សា ដើម្បីឱ្យអ្នកគាំទ្រដែលពាក់ព័ន្ធអាចត្រូវបានដាក់ទណ្ឌកម្មតាមរយៈការហាមឃាត់មិនឲ្យចូលទៅក្នុងកីឡដ្ឋានបាល់ទាត់»។
ស្ថាប័ន RFEF ក៏បានថ្កោលទោសទៅលើការស្រែករើសអើងជាតិសាសន៍ចំពោះកីឡាករ Williams នេះផងដែរ។
ស្ថាប័ន RFEF បាននិយាយថា៖ «RFEF បានចាត់ទុកឥវិយាបថរើសអើងដែលបង្កឡើងកាលពីថ្ងៃម្សិលមិញនៅកីឡដ្ឋានរបស់ក្លិប RCD Espanyol ដោយមនុស្សមួយចំនួនតូចដែលគាំទ្រក្រុម RCD Espanyol នោះថា គឺមិនពាក់ព័ន្ធនឹងអ្នកចូលទស្សនាទាំងអស់នោះទេ និងពិតជាគួរឲ្យសោកស្ដាយយ៉ាងខ្លាំង»។
ទន្ទឹមនោះដែរ អាជ្ញាកណ្ដាល លោក Jose Sanchez មិនបាននិយាយអ្វីពាក់ព័ន្ធនឹងការរើសអើងជាតិសាសន៍នេះទេ។
ការប្រកួតក៏បានបន្តផងដែរ គឺខុសពីការប្រកួតពីខែធ្នូ ដែលពេលនោះការប្រកួតកម្រិតទី ២ នៅប្រទេស អេស្ប៉ាញ រវាងក្រុម Rayo Vallecano និងក្រុម Albacete ត្រូវបានផ្អាកដោយមានការព្រមព្រៀងពីក្រុមទាំង ២ និងក្របខ័ណ្ឌ La Liga។
អ្នកគាំទ្រក្លិប Rayo មួយចំនួនបានស្រែកថា «Zozulya គឺជាណាហ្ស៊ី» នៅតង់ទី ១ ចំពោះខ្សែប្រយុទ្ធអ៊ុយក្រែន Roman Zozulya នៅក្លិប Albacete ដែលពីមុនធ្លាប់លេងនៅក្រុម Rayo ផងដែរ។
របាយការណ៍របស់ស្ថាប័ន RFEF បានបន្ថែមថា៖ «ក្នុងអំឡុងពេលប្រកួតនោះ គឺគ្មានអាជ្ញាកណ្ដាលឬជំនួយការណាមួយបានសង្កេតឃើញមានបញ្ហាពាក់ព័ន្ធនឹងទង្វើនេះទេ»។
ស្ថាប័ននេះបានបន្ថែមទៀតថា៖ «ដើម្បីឲ្យស្របតាមវិធានការណាមួយនោះ ជាដំបូងគឺត្រូវដឹងច្បាស់ពីអ្វីដែលបានកើតឡើង ហើយនេះគឺមិនមែនជាករណីនោះទេ»៕ AFP/SN