ក្រុងបាសេឡូណា: នាយករដ្ឋមន្ត្រីប្រទេសអេស្ប៉ាញ លោក Pedro Sanchez បានថ្លែងកាលពីថ្ងៃសៅរ៍ចុងសប្ដាហ៍កន្លងទៅថា ក្របខ័ណ្ឌ La Liga អាចចាប់ផ្ដើមឡើងវិញពីថ្ងៃទី ៨ ខែមិថុនា តទៅ។
លោក Sanchez បានថ្លែងក្នុងសន្និសីទកាសែតថា៖ «ការចាប់ផ្ដើមឡើងវិញនៃការប្រកួតប្រជែងកីឡាអាជីពសំខាន់ៗ ពិសេសក្របខ័ណ្ឌ La Liga នឹងទទួលបានការអនុញ្ញាតឲ្យរៀបចំដំណើរការចាប់ពីថ្ងៃទី ៨ ខែមិថុនា តទៅ»។
នៅមុនហ្នឹងប្រធាន La Liga លោក Javier Tebas បាននិយាយថា កាលបរិច្ឆេទល្អបំផុតសម្រាប់ការចាប់ផ្ដើមឡើងវិញគឺថ្ងៃសុក្រ ទី ១២ ខែមិថុនា ហើយដល់ពេលមានការប្រកាសរបស់លោកនាយករដ្ឋមន្ត្រីបែបនេះ បានន័យថា គម្រោងរបស់លោកប្រធានរូបនេះទទួលបានការអនុញ្ញាតពីសំណាក់រដ្ឋាភិបាលហើយ។
លោក Tebas បានសរសេរនៅលើគណនី Twitter របស់លោកថា៖ «យើងរីករាយណាស់ជាមួយនឹងការសម្រេចនេះ។ វាគឺជាលទ្ធផលដ៏អស្ចារ្យដែលក្លិប កីឡាករ គ្រូបង្វឹក ប្រឹងប្រែងរួមគ្នាធ្វើ។ ប៉ុន្តែទោះបីជាមានការអនុញ្ញាតនេះក៏ដោយ ក៏យើងត្រូវតែដឹងថា រឿងសំខាន់បំផុតគឺធ្វើតាមនីតិវិធីសុខភាព និងយកចិត្តទុកដាក់ដើរតាមគោលការណ៍ណែនាំនានា ពីព្រោះយើងមិនអាចបន្ធូរបន្ថយការការពារខ្លួនរបស់យើងបានជាដាច់ខាត»។
រយៈពេលជាង ២ ខែហើយ ក្រោយការផ្ទុះឡើងនូវជំងឺកូវីដ១៩ ដែលធ្វើឲ្យរដូវកាលបាល់ទាត់នៅអេស្ប៉ាញត្រូវបានផ្អាក ទើបតែពេលនេះឃើញកីឡាករនៃក្លិបនីមួយៗបានចាប់ផ្ដើមហ្វឹកហាត់ជាក្រុមតូចៗឡើងវិញ ដើម្បីត្រៀមខ្លួនតាមដែលអាចសម្រាប់គម្រោងចាប់ផ្ដើមការប្រកួតប្រជែងនៅខែក្រោយ។
មុនពេលរដូវកាលត្រូវបានបញ្ឈប់ ក្រុមអ្នកមានបុណ្យ Barcelona គឺជាក្រុមដែលឈរនៅកំពូលតារាងដោយមាន ៥៨ ពិន្ទុក្រោយការប្រកួតបញ្ចប់ទៅ ២៧ សប្ដាហ៍ ខណៈក្រុមគូប្រជែងស្លាប់រស់អធិរាជស Real Madrid នៅចំណាត់ថ្នាក់ទី ២ តាមពីក្រោយតែ ២ ពិន្ទុប៉ុណ្ណោះ ហើយគម្រោងរបស់ថ្នាក់ដឹកនាំលីកចង់បញ្ចប់ ១១ ប្រកួតដែលនៅសល់ត្រឹមចុងខែកក្កដា។
បើតាមព័ត៌មានរហៀងៗ ការប្រកួតក្នុងជំនួបក្រុមនៅតំបន់ Andalusian ជាមួយគ្នា គឺ Real Betis និង Sevilla ទំនងជាគូដំបូងគេពេលចាប់ផ្ដើមរដូវកាលឡើងវិញនេះ ហើយជាមួយគ្នានេះក្រុមទាំងអស់នឹងប្រឈមជាមួយនឹងពេលវេលាប្រកួតញឹកជាងធម្មតាពោលគឺ ២ ដងក្នុង ១ សប្ដាហ៍ ពាក់កណ្ដាលសប្ដាហ៍ម្ដង និងចុងសប្ដាហ៍ម្ដង ខណៈមនុស្សតែជាង ១៩៧ នាក់ប៉ុណ្ណោះដែលត្រូវបានអនុញ្ញាតឲ្យចូលរួមក្នុងប្រកួតបិទទ្វារនេះ។
បើយោងតាមនីតិវិធីដែលត្រូវបានរៀបចំឡើងដោយ La Liga កីឡាករទាំងអស់ក៏នឹងត្រូវធ្វើតេស្តរកមើលវីរុសកូរ៉ូណា ១ ថ្ងៃមុនការប្រកួត ហើយនឹងត្រូវធ្វើការវាស់កម្ដៅសិន មុននឹងអនុញ្ញាតឲ្យចូលទៅក្នុងកីឡដ្ឋាន។
ពាក់ព័ន្ធនឹងការដំណើរឡើងវិញនេះប្រធានក្រុម Barcelona គឺខ្សែប្រយុទ្ធ Lionel Messi បាននិយាយទៅកាសែត Mundo Deportivo កាលពីដើមខែនេះថា៖ «នៅពេលអ្នកចាកចេញពីផ្ទះ ហានិភ័យក៏មានរួចទៅហើយ។ ដូច្នេះខ្ញុំគិតថា អ្នកមិនអាចគិតពីវាច្រើនពេកទេ ព្រោះបើមិនអ៊ីចឹងទេ អ្នកនឹងមិនចង់ចេញទៅណាទាំងអស់»។
មុនមានសេចក្ដីប្រកាសពីសំណាក់នាយករដ្ឋមន្ត្រីនេះ ក្របខ័ណ្ឌ La Liga បានបង្កើតឲ្យមានកម្មវិធីហ្វឹកហាត់ដែលតម្រូវឲ្យកីឡាករចាប់ផ្ដើមហាត់ក្នុងលក្ខណៈឯកត្តជននៅថ្ងៃទី ៤ ខែឧសភា ហើយបន្ទាប់មកអាចអនុវត្តជាក្រុម ដោយមានគ្នារហូតដល់ ១០ នាក់បានកាលពីសប្ដាហ៍កន្លងទៅ។
ក្របខ័ណ្ឌកំពូលរបស់ប្រទេសអេស្ប៉ាញត្រូវបានប្រកាសផ្អាកកាលពីថ្ងៃទី ១២ ខែមីនា ពោលគឺក្នុងថ្ងៃតែមួយនឹងក្រុម Real Madrid ដែលត្រូវបានដាក់ឲ្យនៅដោយឡែក ក្រោយមានកីឡាករបាល់បោះអាជីពម្នាក់របស់ក្លិបធ្វើតេស្តវិជ្ជមានចំពោះវីរុសនេះ៕ VN