.jpg)
កីឡាករ Lee វាយកូនបាល់ក្នុងការប្រកួតនៅ Wimbledon Championship ឆ្នាំ ២០១៣។ រូបថត AFP
ក្រុងវ៉ាស៊ីនតោនៈ កីឡាករវាយកូនបាល់ Lee Duck-hee បានក្លាយជាកីឡាករគថ្លង់ជាលើកដំបូងដែលបានឈ្នះការប្រកួតសមាគមវិជ្ជាជីវៈវាយកូនបាល់ (ATP) ពីថ្ងៃចន្ទដោយបានឈ្នះសិតជាប់ៗគ្នាទៅលើកីឡាករ Henri Laaksonen ក្នុងទីក្រុង Winston-Salem រដ្ឋកាលីហ្វ័រនីញ៉ានៅសហរដ្ឋអាមេរិក។
កីឡាករកូរ៉េខាងត្បូងអាយុ ២១ រូបនេះ បាននិយាយក្រោយពីការប្រកួតឈ្នះ ២ សិត ៧-៦ (៧/៤) និង ៦-១ នេះថា៖ «មានមនុស្សជាច្រើនបានសើចចំអកចំពោះពិការភាពរបស់ខ្ញុំ ព្រោះមានគេប្រាប់ខ្ញុំថា ខ្ញុំមិនគួរលេងកីឡានេះទេ»។
កីឡាករ Lee បាននិយាយថា៖ «វាពិតជាពិបាកមែនទែន ប៉ុន្តែមិត្តភក្តិ និងគ្រួសាររបស់ខ្ញុំជំរុញឲ្យខ្ញុំចូលរួមការប្រកួតនេះ ហើយខ្ញុំចង់បង្ហាញគ្រប់គ្នាឲ្យឃើញថា ខ្ញុំអាចធ្វើបាន»។
កីឡាកររូបនេះបានបន្តថា៖ «ខ្ញុំសូមផ្ញើសារទៅកាន់មនុស្សទូទៅថា គេគួរតែលើកទឹកចិត្តចំពោះជនដែលមានពិការភាពព្រោះប្រសិនបើអ្នកខិតខំ អ្នកនឹងអាចធ្វើអ្វីបានទាំងអស់»។
កីឡាករ Lee ដែលជាប់ចំណាត់ថ្នាក់ទី ២១២ ក្នុងពិភពលោកនោះ ពេលនេះបានជាប់ចំណាត់ថ្នាក់ទី១៥ និងបានឈ្នះពានរង្វាន់ ATP ដ៏អស្ចារ្យបំផុតរបស់រូបគេដោយជាប់ចំណាត់ថ្នាក់ទី ១៣០ ក្នុងពិភពលោកនៅឆ្នាំ ២០១៧។
កីឡាកររូបនេះបានសារភាពថា ពិការភាពនេះអាចធ្វើឲ្យរូបគេជួបបញ្ហាខកចិត្តខ្លះៗនៅលើទីលានប្រកួត ព្រោះរូបគាត់មិនអាចឮការហៅ ឬការប្រាប់ពីពិន្ទុដោយពឹងតែលើភាសាកាយវិការតែប៉ុណ្ណោះ។
នៅក្នុងសន្និសីទកាសែតក្រោយពីការប្រកួតកាលពីថ្ងៃចន្ទនោះ គូដណ្ដឹងរបស់គេបានចូលទៅក្នុងទីលាន ដើម្បីជួយបកប្រែភាសាកូរ៉េ។
វាជាការបញ្ចប់នៃការប្រកួតពេញមួយថ្ងៃសម្រាប់កីឡាករ Lee ដោយទទួលបាន ២ ពិន្ទុ ពីជ័យជម្នះនេះនៅពេលព្យុះភ្លៀងបានបក់បោកឆ្លងកាត់កន្លែងប្រកួតនោះ។
នៅពេលរូបគេនិងកីឡាករស្វ៊ីស Laaksonen បានត្រឡប់ទៅប្រកួតវិញក្រោយពីផ្អាកការប្រកួតប្រហែល ៥ ម៉ោង ហើយកីឡាកររូបនេះបានទទួលជ័យជម្នះដែលរូបគេមិនរំពឹងថានឹងទទួលបានបែបនេះទាល់តែសោះ។
កីឡាករ Lee ដែលបានឡើងដល់វគ្គផ្ដាច់ព្រ័ត្រនៃការប្រកួត Challenger Tour ក្នុងក្របខ័ណ្ឌ ATP ជាលើកដំបូងក្នុងរយៈពេលជិត ៣ ឆ្នាំនេះ បាននិយាយថា៖ «ខ្ញុំបានគិតថា ខ្ញុំត្រូវតែលេងឲ្យបានល្អបំផុត និងព្យាយាមផ្ដោតលើការប្រកួតនេះ ហើយទីបំផុតខ្ញុំបានឈ្នះការប្រកួតនេះមែន»។
កីឡាករ Lee នឹងត្រូវជួបកីឡាករប៉ូឡូញជាប់ចំណាត់ថ្នាក់ទី៣ Hubert Hurkacz ដែលជាប់ចំណាត់ថ្នាក់ទី៤០ ក្នុងពិភពលោកនៅជុំទី២។
កីឡាករគថ្លង់រូបនេះបានបន្ថែមទៀតថា៖ «ខ្ញុំនឹងទៅចូលរួមការប្រកួតជាមួយទម្រង់លេងដដែលនេះ ហើយខ្ញុំនឹងខំប្រឹងប្រែងឲ្យអស់ពីសមត្ថភាពដើម្បីបង្ហាញឲ្យគេឃើញអ្វីនឹងកើតឡើង»៕ AFP/SN
