.jpg)
Pulisic (ឆ្វេង) របស់ Chelsea ប្រជែងជាមួយ Fofana របស់ Leicester អំឡុងការប្រកួតនៅក្របខ័ណ្ឌ Premier League កាលពីថ្ងៃអង្គារ។
ក្រុងឡេសេស្ទ័រ: ក្រុម Leicester City បានរំកិលឡើងទៅឈរទីកំពូលនៃតារាងពិន្ទុក្របខ័ណ្ឌ Premier League អង់គ្លេស ជាមួយនឹងការផ្ដល់ភាពបរាជ័យមួយទៀតដល់ក្រុមតោខៀវ Chelsea ដោយការយកឈ្នះ ២-០ កាលពីយប់ថ្ងៃអង្គារ ដែលលទ្ធផលនោះ បានធ្វើឱ្យលោក Frank Lampard ហត់នឿយកាន់តែខ្លាំងឡើងៗ ក្នុងការរក្សាតំណែងរបស់ខ្លួន នៅទឹកដី Stamford Bridge។
ក្រុមតោខៀវពេលនេះ មានជ័យជម្នះតែ ២ ដងប៉ុណ្ណោះ ក្នុងចំណោមការប្រកួត ៨ លើកចុងក្រោយនៅលីគ ហើយបានធ្លាក់ទៅដល់លេខ ៨ ដោយតាមពីក្រោយក្រុមនៅកំពូលតារាង ៩ ពិន្ទុ។ ក្រុម Chelsea រំពឹងអាចកា្លយជាក្រុមប្រជែងពានបាន ក្រោយចំណាយទឹកប្រាក់ ២០០ លានផោន ($៣០០ លាន) ដើម្បីពង្រឹងក្រុម កាលពីទីផ្សារដោះដូរកីឡាករបើកលើកទី១ នារដូវក្ដៅកន្លងទៅ។
តែជាក្រុម Leicester ដែលកំពុងលេចស្ទុងៗ ក្នុងបង្កើតវីរបុរសរបស់ខ្លួនឡើងវិញ ដូចរដូវកាល ២០១៥-២០៦ ពេលពួកគេបានធ្វើឱ្យពិភពបាល់ទាត់ស្រឡាំងកាំង ដោយការឈ្នះពាន Premier League ខណៈគ្រាប់បាល់របស់ Wilfried Ndidi និង James Maddison ម្នាក់ ១ គ្រាប់ នៅវគ្គទី១ បានបង្ហាញថា ពួកគេសមនឹងទទួលបានជ័យជម្នះពិតមែន។
ខ្សែបម្រើ Maddison បាននិយាយ ក្រោយអាចជួយក្រុមឱ្យឈ្នះថា៖ «វាជាសញ្ញាល្អ ដែលបានឈរនៅទីកំពូល Premier League។ វាជារឿងល្អមួយផ្នែកផ្លូវអារម្មណ៍ ព្រោះពួកយើងពិតជាប្រឹងប្រែងខ្លាំងណាស់។ វាជាការទទួលបានសមិទ្ធផលដ៏អស្ចារ្យ នាពាក់កណ្ដាលផ្លូវនៃរដូវកាល»។
ក្រុមគូប្រជែងក្នុងក្រុងតែ ១ Manchester City និង Manchester United មានឱកាសទៅនៅពីលើក្រុម Leicester ប្រសិនបើពួកគេអាចយកបាន ៣ ពិន្ទុ ពីការប្រកួតនៅយប់ថ្ងៃពុធ។
តែការក្លាយជាជើងឯកលីគកំពូលជាលើកទី២ ក្នុងរយៈពេល ៥ ឆ្នាំ នឹងមិនសូវមានការភ្ញាក់ផ្អើលប៉ុន្មានទេ បើទោះមានគម្លាតផ្នែកហិរញ្ញវត្ថុរវាងក្រុម Leicester និងក្រុមនៅទីកំពូលទាំង ៦ នៃក្របខ័ណ្ឌទី១ នេះក៏ដោយ ខណៈពួកគេ បានធ្វើឱ្យខ្លួនឯងកា្លយជាកម្លាំងមួយ ដែលមិនអាចមើលរំលង តាំងពីលោក Brendan Rodgers ចូលមកដឹកនាំ កាលពីជិត ២ ឆ្នាំកន្លងទៅ។
ពាក់ព័ន្ធនឹងរឿងនេះ Maddison បានបន្តថា៖ «អាចមានក្រុមជាច្រើន ដែលមានលទ្ធភាពចំណាយប្រាក់សន្ធឹកសន្ធាប់ជាងពួកយើង ហើយនាំយកកីឡាករបរទេសប្រកបដោយគុណភាពមករួមក្រុម និងផ្ដល់ប្រាក់ខែខ្ពស់ តែឆន្ទៈ និងសាមគ្គីភាពជាក្រុម នឹងធ្វើឱ្យពួកយើងឡើងកាន់តែខ្ពស់»។
ខ្សែបម្រើសញ្ជាតិអង់គ្លេសវ័យ ២៤ ឆ្នាំ បន្ថែមថា៖ «យើងមិនអាចឡើងទីខ្ពស់ ដោយចៃដន្យនោះឡើយ។ យើងមកដល់ចំណុចនេះ ដោយសារពួកយើងប្រឹងប្រែងខ្លាំងណាស់។ មនុស្សជាច្រើន ទំនងនាំគ្នានិយាយពី Man United, Liverpool, Tottenham Hotspur ឬអ្វីក៏ដោយ ឱ្យពួកគេនិយាយចុះ។ យើងនឹងធ្វើតែការងាររបស់យើងដោយមិនចេញមុខ ហើយសង្ឃឹមថា ដំណាច់រដូវកាល យើងនឹងមានឱកាសនៅទីកំពូល»។
ជាមួយគ្នានេះ លោក Rodgers ត្រូវបានរាយការណ៍ថា គឺជាម្នាក់ក្នុងចំណោមគោលដៅ នាពេលខាងមុខរបស់ក្រុម Chelsea ដែលត្រូវយកមកធ្វើតួនាទីជាគ្រូបង្វឹក បើលោក Lampard ត្រូវបញ្ចប់តំណែង ក្នុងប៉ុន្មានថ្ងៃខាងមុខនេះ៕ AFP/VN
