.jpg)
Tielemans សម្ដែងអារម្មណ៍រីករាយ ក្រោយស៊ុតបញ្ចូលទីឱ្យក្រុម Leicester នាំមុខ Leeds ២-០។ AFP
ក្រុងឡុងដ៍៖ ក្រុម Leicester City ហក់ឡើងទៅលំដាប់ទី២ ក្នុងតារាងក្របខ័ណ្ឌ Premier League ដោយការយកឈ្នះយ៉ាងត្រចះត្រចង់លើក្រុមម្ចាស់ផ្ទះ Leeds United ៤-១ ខណៈ Fulham ទីបំផុតរកឃើញជ័យជម្នះលើកដំបូងនៃរដូវកាល ក្រោយឈ្នះ West Bromwich Albion ២-០ នៅផ្ទះខ្លួនឯងកាលពីថ្ងៃចន្ទ។
ក្រុម Leicester របស់លោក Brendan Rodgers ឥឡូវនេះ តាមក្រុមលេខ ១ Liverpool តែ ១ ពិន្ទុប៉ុណ្ណោះ បន្ទាប់ពីឈ្នះ ៥ ដង ក្នុងចំណោម ៧ ប្រកួតនៃរដូវកាលរបស់ក្របខ័ណ្ឌកំពូល ដែលនេះជាការទទួលបានលទ្ធផលបែបហ្នឹងលើកដំបូង ក្នុងប្រវត្តិសាស្ត្ររបស់ពួកគេ។
ខ្សែបម្រើ ២ រូប គឺ Harvey Barnes និង Youri Tielemans ជួយឱ្យក្រុមភ្ញៀវនាំមុខ ២-០ មុន នៅវគ្គទី១ សម្រាប់ការប្រកួតនៅឯកីឡដ្ឋាន Elland Road តែ Stuart Dallas កាត់បន្ថយមកត្រឹម ១ គ្រាប់ មុននឹង Jamie Vardy ធ្វើបានសម្រេចគ្រាប់ទី ៨ រដូវកាលនេះ ឱ្យក្រុមនាំមុខ ២ គ្រាប់វិញ។
ក្នុងម៉ោងបន្ថែមបង្គ្រប់ ពោលគឺនាទីទី៩០+១ Tielemans ដដែល មានឱកាសស៊ុតបាល់ប៉េណាល់ទី ហើយធ្វើបានសម្រេចគ្រាប់ទី២ របស់ខ្លួន ក្នុងប្រកួតនេះ ក៏ដូចជាគ្រាប់ជ័យជម្នះចុងក្រោយសម្រាប់ក្រុមផងដែរ។
ក្រោយពីខកចិត្តចំពោះការបាត់កៅអីសម្រាប់ទៅលេងនៅ Champions League រដូវកាលមុន ពេលនេះ Leicester បានបង្ហាញឱ្យឃើញថា ពួកគេមានលទ្ធភាពគ្រប់គ្រាន់ក្នុងការប្រជែងតំណែងក្រុមកំពូលទាំង ៤ (Top4) ហើយបើទោះបីមើលទៅជារឿងដែលពិបាកនឹងទៅរួច តែពួកគេបានបំបាក់ក្រុមខ្លាំងដូច Manchester City រួចហើយ ៥-២។
គ្រូបង្វឹកលោក Rodgers សរសើរក្រុមថា៖ «យើងមានបច្ចេកទេសលេងល្អមែនទែន។ យើងលេងដោយគុណភាព ពេលមានឱកាសម្ដងៗ។ ខ្ញុំគិតថា យើងធ្វើបានយ៉ាងល្អអស្ចារ្យ សម្រាប់ក្រុមទាំងមូលតែម្ដង។ ក្រុមនេះ មានភាពប៉ិនប្រសប់មិនគួរឱ្យជឿ ដោយមានកីឡាករវ័យក្មេងជាច្រើន ដែលពោរពេញដោយមហិច្ឆតា។ វាទើបតែដើមរដូវទេ ហើយការប្រកួត នៅវែងឆ្ងាយទៀត តែយើងពិតជាធ្វើបានល្អណាស់»។
ចំណែកគ្រូបង្វឹកក្រុម Leeds លោក Marcelo Bielsa បាន និយាយថា៖ «នៅ ៣០ នាទីដំបូង យើងការពារមិនបានល្អហើយយើងមិនបានបង្កភាពគ្រោះថ្នាក់គ្រប់គ្រាន់ចំពោះគូបដិបក្ខ។ នោះគឺជាការទទួលខុសត្រូវមួយ របស់គ្រូបង្វឹក»។
សម្រាប់ការប្រកួត ១ គូទៀត នៅឯកីឡដ្ឋាន Craven Cottage ឯណោះវិញ ក្រុមម្ចាស់ផ្ទះ Fulham គេចផុតពីការចាប់ផ្ដើមដ៏អាក្រក់របស់ខ្លួននៃរដូវកាលមួយតាំងពីឆ្នាំ ១៩៥១ មក ក្រោយអាចដណ្ដើមបាន ៣ ពិន្ទុពីក្រុម West Brom ដែលលទ្ធផលនេះ បានមកដោយសារគ្រាប់បាល់ម្នាក់ ១ គ្រាប់របស់កីឡាករ Bobby Decordova-Reid និង Ola Aina នៅវគ្គទី១។
ក្រុមដែលដឹកនាំដោយលោក Scott Parker ល្មមបញ្ចប់ការប្រកួត ៦ លើក ដោយអត់ឈ្នះសោះបានហើយ ពោលគឺការអូសបន្លាយពេលវេលាដ៏ខ្មៅងងឹត ក្នុងនោះរួមទាំងបរាជ័យ ៥ ដងរបស់ខ្លួនតាំងពីបានឡើងពីលីគលំដាប់ទី២ Championship រដូវកាលមុន។
ក្រុម Fulham ចាញ់រហូតក្នុងចំណោម ៣ ប្រកួតមុននេះ នៅផ្ទះខ្លួនឯងតែជ័យជម្នះលើកទី១ ជួយឱ្យក្រុមនៅភាគខាងជើងនៃក្រុងឡុងដ៍ ឡើងផុតពីតំបន់គ្រោះថ្នាក់ ដោយទម្លាក់ West Brom មកជំនួសវិញ។
លោក Parker បាននិយាយក្រោយការប្រកួតបញ្ចប់ទៅថា៖ «យើងដឹងថា ប្រកួតនេះ មានសារៈសំខាន់យ៉ាងដូចម្ដេច។ ខ្ញុំរីករាយ ដែលយើងទទួលបានលទ្ធផលនេះ។ យើងលេងបានល្អណាស់។ បរាជ័យអាចនឹងកើតមាន តែវាមិនអាចជាន់ពន្លិចពួកយើងបានឡើយ ហើយការមានជោគជ័យ បង្កើនទំនុកចិត្តដល់ពួកយើង»៕ AFP/VN
