.jpg)
ក្រុងប៊ែរឡាំង៖ Robert Lewandowski ស៊ុតបញ្ចូលទីសរុបបាន ១០ គ្រាប់ហើយ នៅក្របខ័ណ្ឌ Bundesliga ក្នុងចំណោម ៥ ប្រកួតដំបូងនៅរដូវកាលនេះ ជាមួយនឹងការធ្វើបានហ៊ែតទ្រីក (ស៊ុតបាន ៣ គ្រាប់) នៅពេលក្រុម Bayern Munich បំបាក់ ក្រុម Eintracht Frankfurt ៥-០ កាលពីថ្ងៃសៅរ៍ ខណៈលទ្ធផលនេះ ហាក់ដូចបញ្ជូនសារគំរាមដល់គូប្រជែងរបស់ក្រុមជើងឯកអឺរ៉ុប ដែលត្រូវប៉ះគ្នានាពេលបន្ទាប់។
កីឡាករ Lewandowski បានប្រាប់ទូរទស្សន៍ Sky ថា៖ «ខ្ញុំសង្ឃឹមថា យើងនឹងបន្តទម្រង់ដ៏ល្អនេះ បានរយៈពេលយូរទៅមុខទៀត ពោលគឺយើងគ្មានបញ្ហាអ្វីទាំងអស់ មិនថាជួបជាមួយក្រុមណាក៏ដោយ។ យើងរមែងចង់បង្ហាញការលេងបាល់ដ៏ល្អបំផុតរបស់យើង ហើយយើងតែងតែចង់មានជ័យជម្នះជានិច្ច»។
ខ្សែប្រយុទ្ធអន្តរជាតិប៉ូឡូញ ទម្លុះសំណាញ់បាន ៩ គ្រាប់ សម្រាប់ការចូលលេង ៣ ប្រកួតចុងក្រោយរបស់ខ្លួន ហើយធ្វើបាន ៣ គ្រាប់ទៀត រង្វង់រយៈពេល ១ ម៉ោង ក្នុងការប្រកួតដែលធ្វើឡើងនៅកីឡដ្ឋាន Allianz Arena។
ក្រុមការពារតំណែងជើងឯក Bayern ស៊ុតបញ្ចូលទីក្រុមគូប្រជែងសរុប ២២ គ្រាប់ ពោលគឺច្រើនជាងក្រុមលេខ ១ RB Leipzig ដែលនៅឈរទីកំពូលតារាងលីគកំពូលអាល្លឺម៉ង់ដដែល ក្រោយឈ្នះក្រុម Hertha Berlin ដែលសល់គ្នា ១០ នាក់ ២-១។
គិតត្រឹមសប្ដាហ៍ទី៥ នេះ ក្រុម Bayern តាមពីក្រោយក្រុមលេខ ១ ចំនួន ១ ពិន្ទុ ដោយមាន ១២ ពិន្ទុ ស្មើក្រុមលេខ ៣ Borussia Dortmund ដែលធ្វើការប្រកួតបន្ទាប់ ហើយឈ្នះក្រុមដែលកំពុងយ៉ាប់យ៊ឺន Schalke 04 ៣-០។
តែយ៉ាងណា អមជាមួយនឹងភាពរីករាយនៃជ័យជម្នះនេះ ក្រុម Bayern ក៏មានដំណឹងអាក្រក់ដូចគ្នាដែរ នោះគឺខ្សែការពារឆ្វេងដ៏រឹងមាំរបស់ក្រុម កីឡាករសញ្ជាតិកាណាដា Alphonso Davies ត្រូវសម្រាកព្យាបាលរហូតដល់ទៅ ៨ សប្ដាហ៍ ដោយសាររបួសកជើងធ្ងន់ធ្ងរ៕ AFP/VN
