ក្រុងព័រទីម៉ៅ៖ Lewis Hamilton បានបង្កើតនូវស្ថិតិថ្មីសម្រាប់កីឡាប្រណាំងរថយន្តអាជីព Formula One (F1) កាលពីថ្ងៃអាទិត្យ ពេលរូបគេដណ្ដើមបានជ័យជម្នះជាលើកទី ៩២ នៅឯកម្មវិធី Portuguese Grand Prix ដើម្បីវ៉ាដាច់អតីតអ្នកប្រណាំងដ៏ឆ្នើម Michael Schumacher ក្នុងបញ្ជីកំណត់ត្រារបស់កីឡានេះ។
ជ័យជម្នះនេះធ្វើឱ្យអត្តពលិកសញ្ជាតិអង់គ្លេសមានចំនួន ១ ដងលើសកំណត់ត្រារយៈពេល ១៤ ឆ្នាំ របស់ Schumacher ដែលធ្លាប់ទៅឈរលើវេទិកាអ្នកលេខ ១ រហូតដល់ទៅ ៩១ លើក ក្រោយពីធ្វើការប្រណាំង F1 ដែលពោរពេញដោយការច្រាសច្រាល់លើកដំបូង នៅឯទីលាន Algarve International Circuit នាប្រទេសព័រទុយហ្គាល់។
ក្រោយឱបគ្នាយ៉ាងយូរជាមួយឪពុករបស់ខ្លួន Anthony ដោយមានម្ដាយចុង Linda នៅក្បែរដែលបានមកធ្វើសាក្សីនូវការសម្រេចសមិទ្ធផលដ៏អស្ចារ្យនេះ Hamilton បាននិយាយលើកតម្កើងក្រុម Mercedes របស់ខ្លួនដោយបរិយាយយ៉ាងច្រើន មុននឹងឡើងទៅឈរលើវេទិកាជយលាភីជាមួយមិត្តរួមក្រុម Valtteri Bottas។
Hamilton និយាយថា៖ «ខ្ញុំជំពាក់ក្រុមនេះ និងមនុស្សនៅក្នុងក្រុមនេះច្រើនណាស់។ សម្រាប់លទ្ធផលការងារដ៏អស្ចារ្យរបស់ពួកគេ គឺពួកគេតែងតែជម្នះឧបសគ្គធំៗបានជានិច្ច។ ពិតជាកិត្តិយសណាស់ ដែលបានធ្វើការជាមួយពួកគេ ព្រោះថាការរួមការងារជាមួយពួកគេ គឺកម្លាំងជំរុញចិត្តដ៏ប្រសើរបំផុត»។
សម្រាប់ការប្រណាំងដែលមានទាំងអស់ ៦៦ ជុំនេះ ម្ចាស់ជើងឯកពិភពលោក ៦ សម័យកាល Hamilton បានទៅដល់ទីព្រ័ត្រមុនកីឡាករផ្សេងៗជាមួយនឹងថិរវេលា ១:២៩:៥៦.៨២៨ ម៉ោង ពោលគឺមុនមិត្តរួមក្រុម Bottas ចំនួន ២៥.៥៩២ វិនាទី និងមុនកីឡាករ Max Verstappen របស់ក្រុមគូប្រជែង Red Bull ចំនួន ៣៤.៥០៨ វិនាទី។
ក្រោយបញ្ចប់ដំណាក់កាលទី១២ ក្នុងចំណោមការប្រណាំងទាំង ១៧ លើក ប្រចាំរដូវកាលនេះ Hamilton វ័យ ៣៥ ឆ្នាំ មានពិន្ទុសរុប ២៥៦ ពិន្ទុ ឈរលើគេក្នុងតារាង ខណៈអ្នកលេខ ២ Bottas មាន ១៧៩ ពិន្ទុ ហើយអ្នកឈរទី ៣ Verstappen មាន ១៦២ ពិន្ទុ។
បើ Hamilton ជាជើងឯកពិភពលោក រដូវកាលនេះ នោះរូបគេនឹងស្មើកំណត់ត្រាចំនួន ៧ ដង របស់ Schumacher មួយទៀត ខណៈជ័យជម្នះនេះបានបន្ថែមតួលេខក្នុងបញ្ចីកំណត់ត្រាដែលមិនធ្លាប់មានរបស់គេ ដោយគិតទាំងពេលនេះ ដណ្ដើមទីតាំងជួរមុខពេលចាប់ផ្ដើមបានចំនួន ៩៧ លើក បញ្ចប់ការប្រណាំងដោយការឈរលើវេទិកាជយលាភី ១៦១ ដង និងបញ្ចប់ការប្រណាំងដោយមានពិន្ទុ ៤៥ ទីលានបន្តបន្ទាប់គ្នា៕ AFP/VN