.jpg)
ក្រុងប៉េកាំង៖ ម្ចាស់មេដាយមាសអូឡាំពិក ២ សម័យកាលរបស់ប្រទេសចិន កីឡាករ Lin Dan ដែលត្រូវបានគេអះអាងថា ជាកីឡាករដ៏ឆ្នើមម្នាក់ក្នុងកំណត់ត្រាកីឡាវាយសីនោះ បានប្រកាសចូលនិវត្តន៍ហើយ កាលពីចុងសប្ដាហ៍កន្លងទៅ នៅក្នុងវ័យ ៣៦ ឆ្នាំ។
មានន័យថា កីឡាករ Dan ដែលជាម្ចាស់មេដាយមាសនៅព្រឹត្តិការណ៍កីឡាអូឡាំពិកក្រុងប៉េកាំង ឆ្នាំ ២០០៨ និងឡុងដ៍ឆ្នាំ ២០១២ នឹងមិនបានប្រកួតប្រជែងកីឡាអូឡាំពិកនៅទីក្រុងតូក្យូឆ្នាំ ២០២០ ដែលត្រូវលើកទៅធ្វើនៅរដូវក្តៅក្រោយវិញ ដោយសារការផ្ទុះឡើងនូវវីរុសកូរ៉ូណានោះទេ។
ចុងបញ្ចប់នៃអាជីពដ៏រុងរឿងរបស់កីឡាករ Dan កើតឡើងតែជាង ១ ឆ្នាំប៉ុណ្ណោះ ក្រោយការចូលនិវត្តន៍របស់គូប្រជែងដ៏ខ្លាំង និងជាមិត្តភក្តិដ៏ល្អរបស់គេ គឺកីឡាករ Lee Chong Wei របស់ម៉ាឡេស៊ី។
កីឡាករ Dan ដែលបញ្ចប់ដោយការឈ្នះជាលក្ខណៈឯកត្តជន ៦៦៦ ដង និងមេដាយជាច្រើននោះ គឺជាអ្នកខ្លាំងក្នុងកីឡានេះ ជាង ១ ទសវត្សរ៍ហើយ ទើបតែបានថមថយប៉ុន្មានឆ្នាំចុងក្រោយនេះទេ ដោយសារតែកម្លាំងរាងកាយបានធ្លាក់ចុះ។
«គ្រួសារ គ្រូបង្វឹក មិត្តរួមអាជីព និងអ្នកគាំទ្រទាំងអស់របស់ខ្ញុំបានធ្វើដំណើរជាមួយខ្ញុំទាំងពេលខ្ញុំឡើងដល់កម្រិតកំពូល និងធ្លាក់ទាបបំផុត។ ខ្ញុំប្រឹងប្រែងណាស់ ដើម្បីឈ្នះ ហើយខ្ញុំលះបង់គ្រប់យ៉ាង ដើម្បីកីឡាដែលខ្ញុំស្រឡាញ់នេះ»។ នេះជាអ្វី ដែល Dan សរសេរផូស្តនៅលើគណនី Weibo ដែលជាបណ្ដាញសង្គមមានលក្ខណៈដូចនឹង Twitter។
ក្រៅពីមេដាយមាសអូឡាំពិកទាំង ២ កីឡាករ Dan ក៏ជាជើងឯកពិភពលោក ៥ សម័យកាល និងជាអតីតអ្នកមានចំណាត់ថ្នាក់លេខ ១ ពិភពលោកដ៏យូរផងដែរ៕ AFP/VN
