ប៉ារីស៖ Diogo Jota ស៊ុត ៣ គ្រាប់យ៉ាងអស្ចារ្យក្នុងជ័យជម្នះដែលក្រុម Liverpool បំបាក់ម្ចាស់ផ្ទះ Atalanta ៥-០ អំឡុងការប្រកួតនៅ Champions League កាលពីយប់ថ្ងៃអង្គារ ស្របពេលដែលម្ចាស់ជើងឯកចាស់ Bayern Munich ទម្លុះសំណាញ់ទីដល់ទៅ ៦ គ្រាប់។
ខ្សែប្រយុទ្ធ Jota មកចូលរួមជាមួយ Liverpool ដោយចេញពី Wolverhampton Wanderers ក្នុងខែកញ្ញា ហើយប្រើពេលបន្តិចប៉ុណ្ណោះ ដើម្បីបានជោគជ័យជាមួយក្រុមថ្មី ដោយការរកបាន ៧ គ្រាប់ ក្នុងចំណោមការចូលលេង ៥ ប្រកួតដំបូង។
ការប្រកួតទល់នឹងក្រុម Atalanta ដែលរដូវកាលមុន ឡើងដល់វគ្គ ៨ ក្រុម Jota ត្រូវបានបញ្ចូលឈ្មោះក្នុងចំណោម ១១ នាក់ដំបូង នៅតំណែងរបស់ Roberto Firmino ហើយត្រឹម ១៦ នាទីប៉ុណ្ណោះ បានទម្លុះសំណាញ់ទីឱ្យក្រុមនាំមុខ។
មុនចប់វគ្គទី ១ ប្រមាណ ១៣ នាទី កីឡាករវ័យ ២៣ ឆ្នាំ បន្ថែមការនាំមុខ ១ គ្រាប់ទៀត មុននឹងធ្វើបានហ៊ែតទ្រីក (ស៊ុត ៣ គ្រាប់) នៅវគ្គទី២ ដែលកើតឡើង បន្ទាប់ពីការស៊ុតបញ្ចូលទីម្នាក់ ១ គ្រាប់របស់ដៃគូប្រយុទ្ធស្លាបឆ្វេងស្ដាំគឺ Mohamed Salah និង Sadio Mane។
Jota និយាយប្រាប់ទូរទស្សន៍ BT Sport ថា៖ «ខ្ញុំកំពុងលេងឱ្យក្រុមដ៏ល្អបំផុត ក្នុងអាជីពរបស់ខ្ញុំ។ ខ្ញុំមិនដឹងថា តើវាជាពេលវេលាដ៏ល្អបំផុតនៃអាជីពរបស់ខ្ញុំឬយ៉ាងណានោះទេ តែនៅចំពោះមុខ នាពេលនេះ ការស៊ុតបញ្ចូលទី គឺជាវិធីលេងបាល់ទាត់របស់ខ្ញុំ»។
ដោយដណ្ដើមបាន ៩ ពិន្ទុពេញ ក្នុងចំណោមប្រកួតទាំង ៣ លើក Liverpool ធ្វើដំណើរយ៉ាងរលូន ដោយឈរលេខ ១ ក្នុងពូល D ជាមួយនឹងការនាំមុខ ៥ ពិន្ទុ លើ Ajax និង Atalanta ដែលមានពិន្ទុស្មើគ្នា។
ជាមួយគ្នានេះ ក្រុមជើងឯកចាស់ Bayern ឥឡូវនេះ បានបន្លាយកំណត់ត្រាការឈ្នះរហូតដល់ ១៤ ដង ជាប់ៗគ្នា នៅ Champions League នេះ ក្រោយធ្វើដំណើរទៅលត់ម្ចាស់ផ្ទះ Salzburg ៦-២ សម្រាប់ការប្រកួតនៅអូទ្រីស។
ខ្សែប្រយុទ្ធ Mergim Berisha ជួយឱ្យ Salzburg នាំមុខមុនត្រឹម ៤ នាទីប៉ុណ្ណោះ តែត្រូវក្រុមភ្ញៀវតាមស្មើ ដោយការស៊ុតបាល់ពិន័យ ១១ ម៉ែត្រ បានសម្រេចរបស់ខ្សែប្រយុទ្ធ Robert Lewandowski ហើយមុនចប់វគ្គទី១ Rasmus Kristensen ធ្វើចូលទីខ្លួនឯង ឱ្យ Bayern ត្រឡប់មកនាំមុខបណ្ដោះអាសន្នវិញ ២-១។
វគ្គទី២ Masaya Okugawa ជួយម្ចាស់ផ្ទះស្មើវិញ តែ Jerome Boateng តែតឱ្យ Bayern នាំមុខម្ដងទៀត ហើយ Leroy Sane បន្ថែមគ្រាប់ទី៤ ខណៈ Lewandowski រកឃើញគ្រាប់ទី២ ដោយក្បាល មុន Lucas Hernandez បង្ហើយគ្រាប់ទី៦ ចុងក្រោយ។
Boateng បាននិយាយប្រាប់ទូរទស្សន៍ Sky ខ្លីៗថា៖ «យើងមិនដែលបោះបង់ឡើយ ពោលគឺចំពោះអ្វីដែលធ្វើឱ្យពួកយើងចលាចល ឬរញ៉េរញ៉ៃ»។
ក្រុម Bayern កំពុងឈរនៅលេខ ១ ជាមួយនឹង ៩ ពិន្ទុ ក្នុងពូល A ដោយនាំមុខដាច់ ៥ ពិន្ទុលើក្រុមនៅលេខ ២ Atletico Madrid៕ AFP/VN