ឌូសសែលដុប៖ កីឡាករ Romelu Lukaku ស៊ុតបញ្ចូលទី ១ គ្រាប់ ពេលក្រុម Inter Milan របស់អ៊ីតាលីឈ្នះក្រុម Bayer Leverkusen ២-១ អំឡុងការប្រកួតក្របខ័ណ្ឌ Europa League វគ្គ ៨ ក្រុម កាលពីថ្ងៃចន្ទ នៅឯក្រុងឌូសសែលដុប (Dusseldorf) ឆ្លងទៅវគ្គពាក់ ១/២ នៃការប្រកួត ដែលត្រូវបានបំប្រួញឲ្យខ្លីជាងមុន និងធ្វើឡើងក្នុងកីឡដ្ឋានទទេស្អាតនាប្រទេសអាល្លឺម៉ង់។
សម្រាប់ការប្រកួតនេះ ក្រុម Inter ដែលជាអតីតម្ចាស់ពានកម្រិតទី ២ របស់តំបន់អឺរ៉ុបនេះ ចំនួន ៣ សម័យកាល មានគ្រាប់បាល់នាំមុខ ដោយខ្សែបម្រើ Nicolo Barella នៅនាទីទី១៥ មុននឹងខ្សែប្រយុទ្ធអន្តរជាតិបែលហ្ស៊ិក Lukaku បន្ថែមគ្រាប់ទី២ នៅ ៦ នាទីបន្ទាប់។
រីឯខាងក្រុមម្ចាស់ប្រទេស Leverkusen ក៏បានកីឡាករ Kai Havertz ជួយកាត់បន្ថយការនាំមុខនោះដែរ នៅនាទីទី ២៥ តែគួរឲ្យស្ដាយ លទ្ធផល ២-១ នេះ បន្តរហូតដល់សំឡេងកញ្ចែចុងក្រោយបន្លឺឡើង ដែលបញ្ជាក់ថា ក្រុមរបស់ Inter របស់លោក Antonio Conte គឺជាក្រុមមានសិទ្ធិទៅវគ្គបន្ត ដោយចាំជួបគូរវាងក្រុមអ៊ុយក្រែន Shakhtar Donetsk និងក្រុម Basel របស់ស្វ៊ីស។
ពាក់ព័ន្ធនឹងកីឡាករ Lukaku ដែលពេលនេះ ក្លាយជាកីឡាករដំបូងគេ អាចស៊ុតបញ្ចូលទីបាន ៩ ប្រកួតជាប់ៗគ្នា នៅ Europa League និងរកបាន ២៩ គ្រាប់ នៅគ្រប់ការប្រកួតទាំងអស់ នារដូវកាលនេះ លោក Conte និយាយថា បើគ្មានការគាំទ្រពីមិត្តរួមក្រុមទេ រូបគេក៏មិនអាចសម្រេចបានដូចនេះឡើយ។
គ្រូបង្វឹកសញ្ជាតិអ៊ីតាលីវ័យ ៥១ ឆ្នាំ និយាយលាយជាមួយសំណើចទៅកាន់ទូរទស្សន៍ Sky Italia ថា៖ «វាជារឿងពិបាក ក្នុងការនិយាយពីទម្រង់លេងរបស់កីឡាករតែ ១ រូប ពេលអ្នកមានក្រុម ១ ដែលមានទម្រង់លេងយ៉ាងអស្ចារ្យ។ Lukaku មានរដូវកាលដ៏ស្រស់បំព្រងដោយបានការគាំទ្រពីក្រុម ដែលកីឡាករនៅគ្រប់តំណែងបានបង្ហាញពីទម្រង់លេងយ៉ាងល្អរបស់ពួកគេដែរ។ យ៉ាងណា ខ្ញុំចូលរួមត្រេកអរជាមួយគេផង ដោយសារគេស័ក្ដិសមទទួលការសរសើរ តែគេត្រូវតែអរគុណក្រុម ដែលជួយឲ្យគេបញ្ចេញសមត្ថភាពផ្ទាល់ខ្លួន»។
ចំណែកការប្រកួត ១ គូទៀត ដែលធ្វើឡើងនៅម៉ោងដំណាលគ្នានាក្រុងកូឡូញ (Cologne) ឯណោះវិញ ក្រុមទៅពីអង់គ្លេស Manchester United ក៏បានឆ្លងទៅវគ្គ ១/២ ដូចគ្នាដែរ គ្រាន់តែថា ទម្រាំបានជ័យជម្នះលើក្រុម FC Copenhagen របស់ប្រទេសដាណឺម៉ាក បាន ត្រូវពឹងលើគ្រាប់បាល់ប៉េណាល់ទីរបស់ខ្សែបម្រើ Bruno Fernandes ក្នុងម៉ោងបន្ថែមពិសេស ១៥ នាទី ២ ដង។
ក្រុម Man United ដែលគ្រប់គ្នាគិតថា នឹងមានប្រៀបជាងហើយក៏មិនពិបាកប៉ុន្មានក្នុងការយកឈ្នះនោះ នៅម៉ោងធម្មតា ៩០ នាទី មិនអាចទម្លុះសំណាញ់ទីបាន សូម្បី ១ គ្រាប់ ហើយមិនតែប៉ុណ្ណោះ ថែមទាំងត្រូវក្រុមគូប្រជែងគ្របនៅដើមវគ្គទី ១ ទៀតផង។
ដោយសារលទ្ធផល ០-០ ការប្រកួតត្រូវថែមម៉ោងពិសេស ហើយបើក្រុមទាំង ២ នៅតែមិនអាចធ្វើអ្វីគ្នាបានទៀត នោះនឹងកាត់ក្ដីដោយការស៊ុតបាល់ប៉េណាល់ទី តែខាងក្រុម Man United មិនចាំបាច់រង់ចាំដល់វគ្គនេះឡើយ ក្រោយខ្សែការពាររបស់ក្រុម Copenhagen កីឡាករ Andreas Bjelland បង្កកំហុសចំពោះកីឡាករ Anthony Martial ដែលជាហេតុនាំឲ្យមានបាល់ពិន័យ ១១ ម៉ែត្រ នៅនាទីទី ៩៣ ខណៈកីឡាករ Fernandes ធ្វើបានយ៉ាងល្អជួយឲ្យក្រុមរបស់លោក Ole Gunnar Solskjaer ឡើងទៅវគ្គ ១/២ ដែលនឹងត្រូវប៉ះក្រុមរួមលីក Wolverhampton Wanderers ឬក៏ក្រុម Sevilla របស់អេស្ប៉ាញ៕ AFP/VN