ក្រុង Auxerre: ក្រុម Lyon បានយកឈ្នះក្រុម Paris Saint-Germain (PSG) ៤-៣ ក្នុងវគ្គប៉េណាល់ទីកាត់ក្ដី ដើម្បីលើកពាន French Cup ផ្នែកនារី ជាកំណត់ត្រាលើកទី ៩ កាលពីថ្ងៃអាទិត្យម្សិលមិញ ដែលមិនដល់ ៣ សប្ដាហ៍ មុនការប្រកួតប្រជែងក្របខ័ណ្ឌ Champions League វគ្គ ៨ ក្រុមចុងក្រោយ ចាប់ផ្ដើម។
Lyon ដែលជាក្រុមម្ចាស់ជើងឯកចាស់នៅតំបន់អឺរ៉ុប បានបញ្ចប់លទ្ធផល ០-០ ក្នុងការប្រកួត នៅម៉ោងធម្មតា មុនពេលអ្នកចាំទី Sarah Bouhaddi ក្លាយជាវីរនារី ដោយការសង្គ្រោះបាល់ពីការស៊ុតរបស់កីឡាការិនី Lea Khelifi។
ក្រោយជួយក្រុមឲ្យលើកពានរង្វាន់នេះ កីឡាការិនី Bouhaddi បាននិយាយប្រាប់ទូរទស្សន៍នៅបារាំងថា៖ «វាជាការប្រកួតដ៏លំបាកមួយ ក្រោយកើតមានវិបត្តិសុខភាព។ មិនមែនតែក្រុមយើងទេ តែក្រុមគូប្រជែងក៏ដូចគ្នា។ ខ្ញុំបានហ្វឹកយ៉ាងខ្លាំង ក្នុងការសង្គ្រោះបាល់ប៉េណាល់ទី ហើយទីបំផុត វាក៏បានផលមែន នៅយប់នេះ ដែលវាជាសមិទ្ធផលដ៏ល្អបំផុត»។
យ៉ាងណា សម្រាប់ការប្រកួតនេះ ក៏ត្រូវបានផ្អាក ១០នាទីដែរ នៅវគ្គទី ១ ដោយសារភ្លៀង និងខ្យល់ខ្លាំងបណ្ដាលឲ្យដាច់ភ្លើង ក្នុងកីឡដ្ឋាន ដែលមានអ្នកគាំទ្រចំនួនប្រមាណ ៥ ០០០ នាក់ នាក្រុង Auxerre នេះ។
ក្រោយបញ្ចប់ការប្រកួតប្រជែងក្នុងស្រុកនេះ ក្រុមទាំងនារី ២ នេះ នឹងបន្តដំណើរទៅធ្វើយុទ្ធនាការនៅ Champions League វគ្គ ៨ ក្រុមចុងក្រោយ ដែលនឹងរៀបចំនៅប្រទេសអេស្ប៉ាញ ដោយក្រុម Lyon ត្រូវប្រឈមជាមួយក្រុម Bayern Munich របស់អាល្លឺម៉ង់ នៅថ្ងៃទី ២២ ខែសីហា នាក្រុងប៊ីលបាវ ខណៈក្រុម PSG ប្រកួតជាមួយក្រុមទៅពីអង់គ្លេស Arsenal នៅក្រុង San Sebastian នៅថ្ងៃជាមួយគ្នា។ ក្រុមរបស់បារាំងទាំងនេះ អាចជួបគ្នាម្ដងទៀត ក្នុងវគ្គពាក់កណ្ដាលផ្ដាច់ព្រ័ត្រ៕ AFP/VN