.jpg)
Mahrez ធ្វើការអបអរ ក្រោយស៊ុតបញ្ចូលទីឱ្យក្រុមអាល់ហ្សេរី អំឡុងការប្រកួត នាពេលកន្លងមក។
ក្រុងចូហាននីសប៊ឺក: ខ្សែបម្រើស្លាប Riyad Mahrez របស់ក្រុមមេឃខៀវ Manchester City បានរួមចំណែកស៊ុតបាន ១ គ្រាប់ដែរ ពេលក្រុមជម្រើសជាតិអាល់ហ្សេរី ប្រកួតស្មើជាមួយហ្ស៊ីមបាវ៉េ ២-២ កាលពីថ្ងៃចន្ទ ហើយលទ្ធផលនេះ បានធ្វើឱ្យក្រុមជើងឯកចាស់ ក្លាយជាប្រទេសទី ៣ ដែលកក់កៅអី ១ សម្រាប់ព្រឹត្តិការណ៍ Africa Cup of Nations 2021។
ក្រុមកាមេរ៉ូន ជាប់ជាស្វ័យប្រវត្តិ ក្នុងនាមជាម្ចាស់ផ្ទះរៀបចំកម្មវិធីនេះ ខណៈក្រុមសេណេហ្គាល់ ធានាបាននូវកន្លែង ១ ដែរ កាលពីថ្ងៃអាទិត្យ ជាមួយនឹងជ័យជម្នះលើក្រុមហ្គីណេប៊ីស្សូ ដោយសារ ១ គ្រាប់របស់ខ្សែប្រយុទ្ធឆ្នើម Sadio Mane ដែលប្រកបអាជីពជាមួយក្រុមហង្សក្រហម Liverpool។
សម្រាប់ការប្រកួតនេះ កីឡាករ Andy Delort និងប្រធានក្រុម Mahrez បានរួមគ្នាស៊ុតបញ្ចូលទីម្នាក់ ១ គ្រាប់ ដោយមានគម្លាតតែ ៤ នាទី ឱ្យក្រុមដែលមានរហស្សនាម «Desert Foxes» (ចចកវាលខ្សាច់) នាំមុខ ២-០ បណ្ដោះអាសន្ន មុននឹង Knowledge Musona និង Prince Dube របស់ក្រុមគូបដិបក្ខ ធ្វើបានសម្រេចម្នាក់ ១ គ្រាប់ដូចគ្នាជួយឱ្យស្មើ ២-២ វិញ ហើយវាជាលទ្ធផលផ្លូវការតែម្ដង។
ដូច្នេះលទ្ធផលត្រឹម ១ ពិន្ទុនេះ ក៏គ្រប់គ្រាន់ឱ្យក្រុមអេហ្ស៊ីប ដែលធ្លាប់ឈ្នះពានប្រចាំទ្វីបអាហ្វ្រិកនេះ បាន ២ ដង អាចទៅបង្ហាញមុខនៅវគ្គចែកពូល ក្នុងឆ្នាំ ២០២១ បានហើយ បើទោះនៅសល់ប្រកួតវគ្គជម្រុះនេះ ២ លើកទៀតក៏ដោយ ព្រោះថាពេលនេះ កំពុងនៅលេខ ១ ក្នុងពូល H ក្រោយបញ្ចប់ប្រកួតទី ៤ នេះ ដោយមាន ១០ ពិន្ទុ។
នេះមានន័យថា បើទោះចាញ់ ២ ប្រកួតចុងក្រោយ ក៏អេហ្ស៊ីប យ៉ាងហោចណាស់ បញ្ចប់នៅចំណាត់ថ្នាក់ទី ២ ដែរ ដោយសារក្រុមលេខ ២ ហ្ស៊ីមបាវ៉េ មានតែ ៥ ពិន្ទុ ខណៈក្រុមលេខ ៣ បុតស្វាណា និងក្រុមបាតតារាងហ្សំប៊ី មាន ៤ ពិន្ទុ និង ៣ ពិន្ទុ៕ AFP/VN
