.jpg)
លោក Beierlorzer មានទឹកមុខស្រងូតស្រងាត់ ក្រោយក្រុម Mainz ចាញ់ Stuttgart អំឡុងការប្រកួតកាលពីថ្ងៃសៅរ៍។
ក្រុងប៊ែរឡាំង: រដូវកាលនៃក្របខ័ណ្ឌ Bundesliga របស់អាល្លឺម៉ង់ ដែលទើបចាប់ផ្ដើមបាន ១០ ថ្ងៃប៉ុណ្ណោះ បានរកឃើញគ្រូបង្វឹករងគ្រោះទី២ បាត់ហើយកាលពីថ្ងៃចន្ទ ពេលដែលក្រុម Mainz 05 បានបណ្ដេញលោក Achim Beierlorzer នៅ ១ ថ្ងៃ ក្រោយក្រុម Schalke 04 បញ្ចប់តំណែងរបស់លោក David Wagner។
ការសម្រេចរបស់ក្រុម Mainz នេះ បានធ្វើឡើង ដើម្បីសម្រាលស្ថានការណ៍ជ្រួលច្របល់ ដែលឃើញមានកីឡាករបដិសេធមិនទៅហ្វឹកហាត់ ក្រោយខ្សែប្រយុទ្ធ Adam Szalai ត្រូវបានពិន័យ និងត្រូវប្រាប់ឱ្យរកក្រុមថ្មី។ ហេតុការន៍នោះ កើតឡើងក្រោយប្រកួតចាញ់ក្រុមឡើងមកថ្មី VfB Stuttgart ៤-១ នៅផ្ទះខ្លួនឯងកាលពីថ្ងៃសៅរ៍។
ក្រោយមានការបណ្ដេញនេះ ខាងក្លិបបានប្រាប់ថា ជំនួយការគ្រូបង្វឹកលោក Jan-Moritz Lichte នឹងទទួលតួនាទីនេះបណ្ដោះអាសន្ន រហូតដល់មានការជូនដំណឹងថ្មីបន្ថែមទៀតនាពេលក្រោយ។
លោក Beierlorzer វ័យ ៥២ ឆ្នាំ បាននិយាយថា៖ «ខ្ញុំសោកស្ដាយចំពោះការសម្រេចរបស់ក្លិប។ តែទោះជាយ៉ាងណា ខ្ញុំសូមឱ្យក្រុម Mainz 05 និងកូនក្រុមទាំងអស់ជួបនូវសំណាងល្អនាពេលអនាគត»។
លោក Beierlorzer ដែលបានមកកាន់តំណែងនេះ តាំងពីខែវិច្ឆិកា ឆ្នាំ ២០១៩ បាននិយាយថា គាត់យល់ពីសាមគ្គីភាពរបស់កីឡាករចំពោះមិត្តរួមក្រុមរបស់ពួកគេ Szalai តែការបដិសេធមិនចូលហ្វឹកហាត់ គឺជារឿងខុសទាំងស្រុង។
ក្លិបដែលដេញគ្រូបង្វឹកដូចគ្នា ទាំងក្រុម Mainz និង Schalke សុទ្ធតែចាញ់ នៅ ២ ប្រកួតបើកឆាកដំបូង។ ក្រុម Schalke បានចាញ់ក្រុម Werder Bremen ៣-១ កាលពីថ្ងៃសៅរ៍ ក្រោយពីត្រូវក្រុមជើងឯកចាស់ Bayern Munich សំពងយ៉ាងដំណំ ៨-០ ក្នុងការប្រកួតដំបូងនៃរដូវកាលថ្មី៕ AFP/VN
