ឡុងដ៍៖ ក្រុម Manchester City ប្រកាសពីការទិញបានខ្សែការពារកណ្តាលអន្តរជាតិព័រទុយហ្គាល់ Ruben Dias ពីក្រុម Benfica ដោយមានកិច្ចសន្យារយៈពេល ៦ ឆ្នាំ កាលពីថ្ងៃអង្គារ ដោយសង្ឃឹមថា នឹងអាចដោះស្រាយបញ្ហាភាពខ្វះចន្លោះតំបន់ខាងក្រោម ដែលក្រុមរបស់លោក Pep Guardiola ជួបជាង ១ ឆ្នាំកន្លងមក។
ក្រុមនៅព័រទុយហ្គាល់ Benfica កាលពីថ្ងៃអាទិត្យបានបញ្ជាក់ថា ពួកគេឈានដល់កិច្ចព្រមព្រៀងលក់កីឡាករ Dias ក្នុងតម្លៃ ៦៨ លានអឺរ៉ូ ($៧៩ លាន) បូករួមនឹងប្រាក់រង្វាន់ ៣,៦ លានអឺរ៉ូ (ប្រមាណ $៤ លាន) បន្ថែមទៀត ហើយបានផ្ទេរយកកីឡាករ Nicolas Otamendi ត្រឡប់វិញ ក្នុងតម្លៃ ១៥ លានអឺរ៉ូ (ប្រមាណ $១៧ លាន)។
ក្នុងសេចក្ដីប្រកាសរបស់ Man City កីឡាករ Dias ដែលមានវត្តមានជាមួយក្រុមជម្រើសជាតិ ១៩ លើក ប្រាប់ថា៖ «ការមានឱកាសចូលរួមជាមួយក្លិបដូច Manchester City គឺជាឱកាសដ៏វិសេសវិសាលបំផុតសម្រាប់ខ្ញុំ ហើយជាក្លិប ១ ដែលពិបាកនឹងបដិសេធសំណើណាស់»។
កីឡាករវ័យ ២៣ ឆ្នាំ បន្តថា៖ «ភាពជោគជ័យរបស់ពួកគេ គឺច្បាស់ណាស់គ្មានអ្វីត្រូវឆ្ងល់ឡើយ។ ពួកគេ គឺជាក្រុមលេចធ្លោ នៅប្រទេសអង់គ្លេស ក្នុងរយៈពេលប៉ុន្មានឆ្នាំចុងក្រោយនេះ ដោយការលេងស្ទីលបែបប្រយុទ្ធ ដែលខ្ញុំមានអារម្មណ៍ថា ស័ក្ដិសមនឹងការលេងផ្ទាល់ខ្លួនរបស់ខ្ញុំ»។
Dias នៅប្រាប់ទៀតថា៖ «វាពិតជាមានក្ដីរំភើបខ្លាំងណាស់ ដែលបានក្លាយចំណែក ១ ក្នុងក្រុមលំដាប់កំពូលបែបនេះ និងដែលបានលេងក្រោមការដឹកនាំរបស់គ្រូបង្វឹកកម្រិតពិភពលោក ដូចលោក Pep Guardiola ព្រោះគាត់មានប្រវត្តិល្អខាងអភិវឌ្ឍសមត្ថភាពកីឡាករក្មេងៗ។ ខ្ញុំជឿថា ខ្ញុំអាចរីកចម្រើននៅទីនេះ ដែលឆន្ទៈរបស់ក្លិប ស៊ី (ស្រប) គ្នាជាមួយខ្ញុំ ហើយខ្ញុំនឹងផ្ដល់គ្រប់យ៉ាងដែលខ្ញុំមាន ដើម្បីជួយក្លិបជោគជ័យ និងឈ្នះពានរង្វាន់ផ្សេងៗ»៕ AFP/VN