ក្រុងឡុងដ៍៖ ក្លិប Man City បានឃ្លាតឆ្ងាយពីក្លិប Liverpool ១ ជំហានទៀតនៅក្របខ័ណ្ឌ Premier League ពីថ្ងៃសៅរ៍ទោះជាទទួលបានជ័យជម្នះទៅលើក្រុម Chelsea ក៏ដោយ ខណៈលោក Jose Mourinho បានបញ្ចប់បរាជ័យក្រៅទឹកដីរបស់ក្លិប Tottenham ជាលើកដំបូងក្នុងការដឹកនាំរបស់គាត់។
ក្លិប Leicester បានឈ្នះក្រុម Brighton ដើម្បីឈរនៅលេខ ២ នៅក្នុងក្របខ័ណ្ឌ Premier League តាមពីក្រោយក្រុមរបស់លោក Jurgen Klopp ៨ ពិន្ទុ ប៉ុន្តែបាននាំមុខក្លិប Man City ១ ពិន្ទុ ខណៈក្លិប Arsenal បានត្រឹមស្មើគ្នាជាមួយក្រុម Southampton ២-២។
ក្រុម Liverpool របស់លោក Klopp បានឈ្នះក្លិប Crystal Palace ២-១ ដើម្បីបន្តឈរនៅលើកំពូលតារាង និងនាំមុខក្រុម Man City ដែលជាម្ចាស់ជើងឯកក្របខ័ណ្ឌនេះ ដែលបានឈ្នះក្រុម Chelsea ២-១។
ក្នុងការប្រកួតរបស់ក្លិប Man City កីឡាករ N''Golo Kante រកបាន ១ គ្រាប់បើកឆាក សម្រាប់ក្រុម Chelsea នៅនាទីទី ២១ ប៉ុន្តែកីឡាករ Kevin De Bruyne រកបាន ១ គ្រាប់ ឲ្យក្រុមម្ចាស់ផ្ទះ Man City វិញនៅនាទីទី ២៩ មុនពេលកីឡាករ Riyad Mahrez បន្ថែម ១ គ្រាប់ទៀត ដើម្បីជួយឲ្យក្រុមម្ចាស់ផ្ទះឈ្នះ ២-១។
លោក Pep Guardiola គ្រូបង្វឹកក្រុម Man City បានប្រាប់ Sky Sports ថា៖ «វាជាការប្រកួតសំខាន់មួយជាមួយក្រុមល្អបំផុតមួយ។ ក្លិប Chelsea មានប្រវត្តិខ្លាំងរយៈពេល ២០ ឆ្នាំមកហើយ។ នៅពេលពួកគេសម្រុកទៅមុខក្នុងឱកាសល្អនោះ យើងរកបានគ្រាប់បាល់តាមរយៈកីឡាករ Kevin De Bruyne ហើយយើងបាត់បង់ឱកាសជាច្រើន»។
នៅពេលមុននោះដែរ កីឡាករ Roberto Firmino បានជួយឲ្យក្រុមរបស់លោក Klopp ឈ្នះក្រុមម្ចាស់ផ្ទះ Crystal ក្រោយពីកីឡាករ Mane បានបើកឆាក ១ គ្រាប់ នាំមុខក្រុមម្ចាស់ផ្ទះបន្ទាប់មកពីកីឡាករ Wilfried Zaha រកបាន ១ គ្រាប់វិញ ដើម្បីលុបចោលការនាំមុខរបស់ក្រុមភ្ញៀវនោះវិញ។
ក្លិប Liverpool ម្ចាស់ជើងឯកអឺរ៉ុបដែលកំពុងតាមលើកពានក្នុងស្រុកជាលើកដំបូងរយៈពេល ៣០ ឆ្នាំនោះបានប្រកួតឈ្នះ ១២ លើកក្នុងចំណោម ១៣ លើកនៃក្របខ័ណ្ឌ Premier League នៅរដូវកាលនេះ និងមិនធ្លាប់ចាញ់សោះក្នុងការប្រកួតលីក ៣០ លើកចុងក្រោយនេះ។
លោក Klopp បាននិយាយថា៖ «យើងមិននៅទីនោះដើម្បីបង្ហាញថា យើងបានបង្កើតភាពអស្ចារ្យនៃបាល់ទាត់នោះទេ ប៉ុន្តែវាជាការងារដែលយើងត្រូវធ្វើដើម្បីទទួលបានលទ្ធផលល្អ»។
គ្រូបង្វឹករូបនេះបានបន្ថែមថា៖ «ខ្ញុំគ្មានបញ្ហាទេចំពោះទម្រង់លេងរបស់យើងនៅថ្ងៃនេះ។ អ្នកគ្រាន់តែត្រូវប្រាកដច្បាស់ថាអ្នកបានត្រៀមខ្លួនជាស្រេច ដើម្បីប្រយុទ្ធសម្រាប់លទ្ធផលល្អ ហើយយើងធ្វើបាននៅពេលចាប់ផ្ដើមនាទីដំបូង»។
ទន្ទឹមនោះដែរ កីឡាករ Son Heung-min, Lucas Moura និង Harry Kane រកបានម្នាក់ ១ គ្រាប់ ជួយឲ្យលោក Mourinho គ្រូបង្វឹកថ្មីរបស់ក្លិប Tottenham ជោគជ័យលើកដំបូងក្នុងការដឹកនាំរបស់គាត់ក្នុងរយៈពេលប៉ុន្មានថ្ងៃ ក្រោយពីដឹកនាំជំនួសលោក Mauricio Pochettino ដែលត្រូវបានបណ្ដេញចេញថ្មីៗនេះ។
ជ័យជម្នះក្នុងការប្រកួតលីកក្រៅទឹកដីជាលើកដំបូងរបស់ក្លិប Spurs តាំងពីខែមករានេះនឹងធ្វើឲ្យលោក Mourinho រួចផុតមន្ទិលសង្ស័យពីក្រុមអ្នកគាំទ្រដែលបានក្រៀមក្រំចិត្តចំពោះលោក Pochettino ក្នុងរយៈពេលជិត ៦ ខែ ក្រោយពីបានជួយឲ្យក្លិបនេះបានឡើងដល់វគ្គផ្ដាច់ព្រ័ត្រជាលើកដំបូងនៃក្របខ័ណ្ឌ Champions League។
លោក Mourinho បាននិយាយថា៖ «ជ័យជម្នះនេះពិតជាសំខាន់ខ្លាំងណាស់ ព្រោះយើងខានបានឃើញស្នាមញញឹមរយៈពេល ១១ ខែមកនេះ ប៉ុន្តែសម្រេចហើយ»៕ AFP/SN