.jpg)
ខ្សែការពារ Zouma (ស្ដាំ) លោតតែតបាល់បំប៉ោងសំណាញ់ទី នាំឱ្យក្រុម Chelsea នាំមុខ ២-០។ AFP
ឡុងដ៍៖ ក្រុម Manchester City ត្រូវបង្ខំទទួលយកលទ្ធផល ១-១ ជាមួយ Leeds United ពេលខ្សែប្រយុទ្ធ Rodrigo ដាក់ទោសអ្នកចាំទី Ederson ដែលបានបង្កើតកំហុស ខណៈការចំណាយសន្ធឹកសន្ធាប់របស់ក្រុម Chelsea ផ្ដើមចេញផ្លែផ្កា ក្រោយបំបាក់ Crystal Palace ៤-០ អំឡុងការប្រកួតលីកកំពូលអង់គ្លេសកាលពីថ្ងៃសៅរ៍។
ខណៈ Chelsea ចាប់ផ្ដើមប្រសើរឡើង ហើយ Man City ស៊ូ ដើម្បីរកឱ្យឃើញនូវទម្រង់ល្អ ខ្សែបម្រើប្រយុទ្ធ James Rodriguez ឯណោះ បានជួយឱ្យក្រុម Everton ឡើងទៅឈរទីកំពូលតារាងក្របខ័ណ្ឌ Premier League ជាមួយការស៊ុត ២ គ្រាប់ ក្នុងជ័យជម្នះ ៤-២ លើ Brighton។
ក្រុមមេឃខៀវ រងបរាជ័យយ៉ាងអាម៉ាស់កាលពីសប្ដាហ៍កន្លងទៅ ដោយសារ Leicester City ជាមួយលទ្ធផល ៥-២ ហើយក្រុមរបស់លោក Pep Guardiola ដើម្បីដោះស្រាយបញ្ហាតំបន់ការពារបានចំណាយលុយយ៉ាងច្រើនទិញ Ruben Dias របស់ក្រុម Benfica។
ការប្រកួតនៅកីឡដ្ឋាន Elland Road ក្រុមភ្ញៀវ Man City នាំមុខមុន ដោយការស៊ុតពីខ្សែប្រយុទ្ធ Raheem Sterling នៅនាទីទី១៧ តែមិនអាចទាញផលពីការមានប្រៀបដ៏លឿននេះ ដោយការបន្ថែមគ្រាប់បាល់ឱ្យបានច្រើនឡើយ ខណៈ Rodrigo ចំណេញពីកំហុសរបស់ Ederson ជាមួយការបញ្ជូនបាល់ចូលទីនៅនាទីទី៥៩ ធ្វើឱ្យក្រុមម្ចាស់ផ្ទះ Leeds តាមស្មើវិញ។
គ្រូបង្វឹករបស់ក្រុម Man City លោក Pep និយាយថា៖ «ការប្រកួតនោះល្អ។ ពេលក្រុមទាំង ២ លេងបែបប្រយុទ្ធ វាជាការប្រកួតល្អមើល។ យើងធ្វើបានល្អជាងនៅ ៣០ នាទីនៃវគ្គទី១។ សម្រាប់ស្ថានភាព ដែលយើងជួបក្រុមរបស់ខ្ញុំបានបង្ហាញឱ្យឃើញនូវទង្វើដ៏គួរឱ្យសរសើរ។ វាមិនមែនជារឿងស្រួលប៉ុន្មានទេ ក្នុងការលេងទល់ Leeds។ ពួកគេបានបង្ហាញឱ្យឃើញថា តើពួកគេល្អបែបណា?»។
Man City ឈ្នះតែម្ដងគត់ ក្នុងចំណោម ៣ ប្រកួតដំបូងនៅលីកកំពូល ហើយអាចនឹងមានគម្លាតពិន្ទុពីក្រុមជើងឯកចាស់ Liverpool កាន់តែឆ្ងាយ បើក្រុមរបស់ Jurgen Klopp មានលទ្ធផលល្អនៅប្រកួតបន្ទាប់។
ចំណែកលោក Frank Lampard សុំឱ្យគ្រប់គ្នាអត់ធ្មត់ ពេល Chelsea មិនទទួលបានផលពីការចំណាយដល់ទៅ ២២០ លានផោន ($២៨៥ លាន) ហើយសម្ពាធលើក្រុមតោខៀវចាប់មានកាន់តែខ្លាំង ក្រោយបានលទ្ធផលដ៏គួរឲ្យខកចិត្ត ៣-៣ ជាមួយ West Brom និងការធ្លាក់ចេញពី League Cup ដោយសារ Tottenham Hotspur នៅសប្ដាហ៍មុន។
តែស្ថានការណ៍ទំនងស្រាលជាងមុនបន្តិច ក្រោយកីឡាករចំណូលថ្មីទាំង ៥ រូប រួមមាន Edouard Mendy, Ben Chilwell, Thiago Silva, Kai Havertz និង Timo Werner បង្ហាញខ្លួនជុំគ្នាលើកដំបូង នៅ Premier League ហើយរួមចំណែកជួយឱ្យក្រុមទទួលបានលទ្ធផលល្អ ដោយការបំបាក់ក្រុមភ្ញៀវ Crystal ៤-០ នៅប្រកួតទី៤ នេះ។
Chilwell រួមចំណែកយ៉ាងធំ ដោយការជួយរកគ្រាប់បាល់នាំមុខបាននៅនាទីទី៥០ មុនមានគ្រាប់ទី២ ដោយ Kurt Zouma នាទីទី៦៦ ខណៈ Jorginho បន្ថែម ២ គ្រាប់ នាទីទី៧៨ និង ៨២ ដែលសុទ្ធតែបាល់ពិន័យ ១១ ម៉ែត្រទាំងអស់។
រីឯ Everton រកបាន ១២ ពិន្ទុពេញនៅ ៤ ប្រកួតដំបូងនេះ ខណៈ Rodriguez ចាប់រះម្ដងទៀត ក្រោមការដឹកនាំគ្រូបង្វឹកចាស់ Carlo Ancelotti ហើយលើសពីនេះទៀត Dominic Calvert-Lewin ឡើងជើងខ្លាំង ដោយការរកគ្រាប់បាល់បានជានិច្ច ខណៈប្រកួតនេះក៏បាន ១ គ្រាប់ដែរ៕ AFP/VN
