អង់គ្លេសៈ ខ្សែបម្រើ Phil Foden បានជួយឲ្យក្រុម Manchester City ត្រឡប់ទៅឈរលើកំពូលតារាងនៃក្របខ័ណ្ឌ Premier League កាលពីថ្ងៃសៅរ៍ ខណៈខ្សែបម្រើវ័យក្មេងរូបនេះបានតែតបាល់បញ្ចូលទីយ៉ាងល្អជួយឲ្យក្រុមនេះឈ្នះក្រុម Spur ១-០ ស្របពេលក្រុម Brighton បានបង្កើនក្ដីរំពឹងរស់របស់ខ្លួនក្រោយប្រកួតស្មើគ្នា ០-០ ជាមួយក្រុម Wolves ក្នុងថ្ងៃជាមួយគ្នានោះដែរ។
គិតត្រឹមលទ្ធផលការប្រកួតកាលពីថ្ងៃសៅរ៍នោះក្រុមរបស់លោក Pep Guardiola មាន ១ ពិន្ទុនាំមុខក្រុម Liverpool ដែលស្ថិតនៅចំណាត់ថ្នាក់ទី ២ ក្របខ័ណ្ឌ Premier League ក្រោយពីកីឡាករ Foden បានតែតបញ្ចូលទីនៅនាទីទី ៥ ធ្វើឲ្យឈ្នះក្រុម Spur ហើយជ័យជម្នះត្រឹម ១-០ នេះ វាក៏ជាការសងសឹកនឹងក្រុម Spur ដែលបានទម្លាក់ក្រុម Man City នៅវគ្គ ៨ ក្រុមចុងក្រោយនៃក្របខ័ណ្ឌ Champions League កាលពីថ្ងៃពុធសប្ដាហ៍មុនផងដែរ។
លោក Guardiola គ្រូបង្វឹកក្រុម Man City បាននិយាយថា៖ «បន្ទាប់ពីបានជួបភាពតានតឹងខ្លាំងក្នុងការប្រកួតកាលពីថ្ងៃពុធគឺយើងអាចនឹងបាត់បង់ពានរង្វាន់ Premier League នៅថ្ងៃនេះ។ ក្នុងនាមជាកីឡាករម្នាក់ខ្ញុំអាចមិនធ្វើបានសម្រេចដូចអ្វីដែលក្រុមរបស់ខ្ញុំបានធ្វើនៅថ្ងៃនេះនោះទេ»។
ក្រុម Liverpool អាចនឹងដណ្ដើមតំបន់កំពូលវិញ បើពួកគេឈ្នះក្រុម Cardiff នៅយប់ថ្ងៃអាទិត្យម្សិលមិញ ប៉ុន្តែក្រុម Man City បានឈ្នះការប្រកួតលីកចំនួន ១០ លើកចុងក្រោយដើម្បីរក្សាជោគវាសនានៃការលើកពានក្នុងដៃរបស់ខ្លួន ព្រោះម្ចាស់ជើងឯកនេះនឹងត្រូវប្រកួតប្រជែងជាមួយក្រុមរបស់លោក Jurgen Klopp។
លោក Guardiola បានបន្ថែមថា៖ «វាសំខាន់ណាស់សម្រាប់ការប្រកួតនៃក្របខ័ណ្ឌ Premier League ហើយយើងដឹងថា យើងមិនអាចធ្លាក់ពិន្ទុនោះទេ។ វាតឹងតែងខ្លាំងណាស់ ព្រោះក្រុម Spur មានឱកាសច្រើនជាងកាលពី ២ ប្រកួតមុន»។
លោកបានបន្តថា៖ «យើងបាននិងកំពុងលេងសម្រាប់ក្របខ័ណ្ឌ Premier League រាល់ពេល ៣ ថ្ងៃម្ដងសម្រាប់រយៈពេល ១០ ខែ ហើយអ្នកអាចមានអារម្មណ៍រងសម្ពាធបំផុត។ ពាននេះកំពុងស្ថិតនៅក្នុងដៃរបស់យើងនៅឡើយ ហើយយើងនឹងពុះពារតស៊ូរហូតដល់ទីបញ្ចប់»។
ជាមួយការរួមចំណែកដ៏សំខាន់របស់ Foden ក្នុងការបង្ហាញខ្លួនរបស់គេជាលើកទី ២ នេះលោក Guardiola ក៏បានអរគុណអ្នកចាំទី Ederson ដែលបានសង្គ្រោះបាល់យ៉ាងល្អជាបន្តបន្ទាប់ ខណៈម្ចាស់ជើងឯកនេះបានបង្ហាញការលេងដ៏អស្ចារ្យមួយនៅកីឡដ្ឋាន Etihad។
លោក Guardiola បានសម្ដែងក្ដីកង្វល់ចំពោះខ្សែបម្រើសញ្ជាតិបែលហ្ស៊ិក Kevin De Bruyne ដែលបានរងរបួសជាថ្មីម្ដងទៀតនៅពេលសម្រាកក្នុងអំឡុងពេលប្រកួតនេះ។ De Bruyne ដែលទើបនឹងជាពីការរងរបួសក្បាលជង្គង់នោះទំនងជាមិនបានចូលលេងនៅក្នុងការប្រកួតនៅពាក់កណ្ដាលសប្ដាហ៍នេះនៅទឹកដីក្រុម Man United ទេ។
លោក Guardiola បាននិយាយថា៖ «យើងនឹងឃើញនៅថ្ងៃស្អែកនេះ ប៉ុន្តែខ្ញុំគិតថាការប្រកួតក្រោយទៀត គាត់នឹងមិនបានចូលលេងទេ»៕ SN