ក្រុងឡុងដ៍៖ ក្រុមបិសាចក្រហម Manchester United រក្សាចំណាត់ថ្នាក់ទី ១ ក្នុងតារាងក្របខ័ណ្ឌ Premier League អង់គ្លេសបានដដែល ក្រោយអ្នកចាំទី Alisson Becker របស់ក្រុម Liverpool បានធ្វើឱ្យក្រុមទាំង ២ ព្រមទទួលយកលទ្ធផល ០-០ ខណៈក្រុមមេឃខៀវ Manchester City ហក់ឡើងទៅលំដាប់ទី ២ ជាមួយនឹងជ័យជម្នះដ៏ត្រចះត្រចង់ ៤-០ លើក្រុម Crystal Palace កាលពីថ្ងៃអាទិត្យ។
ក្រុម Man United របស់លោក Ole Gunnar Solskjaer បើទោះជាក្រុមភ្ញៀវក៏ពិតមែន តែមានឱកាសល្អៗច្រើនជាង សម្រាប់ការប្រកួតស្ងាត់ជ្រងំដ៏ចម្លែកនេះ រវាងក្រុមគូប្រជែងស្លាប់រស់ ២ នៃកីឡាបាល់ទាត់របស់ប្រទេសអង់គ្លេស។
អ្នកចាំទី Alisson បានជួយស្រោចស្រង់ក្រុមម្ចាស់ផ្ទះពីការស៊ុតដ៏ល្អពីខ្សែបម្រើ ២ រូប របស់ក្រុមភ្ញៀវ គឺ Bruno Fernandes និង Paul Pogba នៅវគ្គទី២ តែទាំង ២ ក្រុម គ្មានក្រុមណាសមនឹងទទួលជ័យជម្នះនោះឡើយ។
ឥឡូវនេះ ក្រុម Man United នាំមុខ ២ ពិន្ទុដាច់លើក្រុមលេខ ២ Man City ដែលមាន ៣៥ ពិន្ទុ ស្មើក្រុមលេខ ៣ Leicester City តែក្រុមរបស់លោក Pep Guardiola នៅសល់ ១ ប្រកួតក្នុងដៃ។ ក្រុមជើងឯកចាស់ Liverpool ធ្លាក់ទៅលេខ ៤ ដោយមាន ៣៤ ពិន្ទុ។
គិតតាំងពីអតីតអ្នកចាត់ការឆ្នើមលោក Alex Ferguson ចូលនិវត្តន៍ក្នុងឆ្នាំ ២០១៣ ក្រុមបិសាចក្រហម ឡើងមកឈរទីកំពូលតារាងលីគជាលើកដំបូង បន្ទាប់ពីចូលឆ្នាំថ្មី ដោយសារឈ្នះដល់ទៅ ៩ លើក ក្នុងចំណោមការប្រកួត ដែលមិនចាញ់សោះ ១២ លើកចុងក្រោយរបស់ខ្លួន។
ការចាកចេញពីទឹកដី Anfield ដោយមានពិន្ទុ គឺជាលទ្ធផលរឹងមាំមួយ ខណៈពួកគេប្រឹងប្រែងឱ្យបានឈ្នះពានជាលើកដំបូង ក្នុងរយៈពេល ៨ ឆ្នាំ តែក្រុម Man United ទំនងជាមានអារម្មណ៍ថា វាជាការខ្ជះខ្ជាយឱកាសក្នុងការដាក់សម្ពាធលើក្រុម Liverpool ដែលកំពុងញាំញីដោយរបួស និងធ្លាក់ទម្រង់លេង។
គ្រូបង្វឹករបស់ក្រុម Man United លោក Solskjaer បាននិយាយថា៖ «វាគឺជាលទ្ធផលល្អ លុះត្រាណាតែយើងឈ្នះការប្រកួតបន្ទាប់។ វាជាឱកាសល្អ ដែលយើងបានបណ្ដោយឱ្យបាត់បង់ជាមួយនឹងចង្វាក់ពេលវេលាល្អៗជាច្រើន ហើយម្យ៉ាងទៀត យើងប្រកួតជាមួយក្រុមខ្លាំងផង»។
អ្នកចាត់ការសញ្ជាតិន័រវែស បន្តថា៖ «ខ្ញុំគិតថា យើងប្រសើរឡើងៗ អំឡុងពេលប្រកួត ហើយនៅចុងបញ្ចប់ កើតមានចង្វាក់ល្អៗ ដែលយើងគួរតែឈ្នះ។ យើងបង្កើតបានឱកាសធំៗ ចំនួន ២ លើក តែអ្នកចាំទីរារាំងបានយ៉ាងអស្ចារ្យ»។
នេះក៏ជាលើកដំបូងផងដែរ ដែលក្រុមគូសត្រូវចាស់ទាំង ២ មានមុខប្រជែងពានលីគកំពូលជាមួយគ្នាតាំងពីឆ្នាំ ២០០៩៕ AFP/VN