ក្រុងប៉ារីស: ក្រុម Manchester United ពិតជាបានបញ្ចប់ក្នុងចំណាត់ថ្នាក់លេខ ២ នៃក្របខ័ណ្ឌអង់គ្លេស Premier League នៅរដូវកាលនេះពិតប្រាកដមែន ប៉ុន្តែ ក្លិបនេះ ស្ថិតនៅលើកំពូលតារាងបើនិយាយពីតម្លៃសរុបទាំងអស់។ នេះបើយោងទៅតាមរបាយការណ៍មួយពីក្រុមហ៊ុនគណនី KPMG កាលពីថ្ងៃពុធ។
តម្លៃជារួមរបស់ក្រុមបិសាចក្រហមមួយនេះ បានកើនឡើង៥ភាគរយ បើធៀបទៅនឹងឆ្នាំ ២០១៧ ក្រោយពីមានតម្លៃច្រើនជាង ៣,២ ពាន់លានអឺរ៉ូ (ស្មើនឹង ៣,៧៧ ពាន់លានដុល្លារអាមេរិក) ដើម្បីផ្តួលក្លិប Real Madrid ដែលមានតម្លៃ២,៩ពាន់លានអឺរ៉ូ និងក្លិប FC Barcelona ដែលមានតម្លៃជារួម ២,៨ ពាន់លានអឺរ៉ូ។
លោក Jacques Boussuge ប្រធានទីប្រឹក្សាកីឡាក្នុងក្រុមហ៊ុន KPMG បានឲ្យដឹងថា៖ «យើងធ្វើការគណនាទៅលើទ្រព្យសម្បត្តិនៃក្លិបនីមួយៗ ទៅលើថា ពួកគេមានកីឡដ្ឋានផ្ទាល់ខ្លួន តម្លៃនៃកីឡាករ ក៏ដូចជាតម្លៃនៃឈ្មោះ និងកេរិ៍្តឈ្មោះ ជាមួយនឹងកិច្ចសន្យាផ្សាយពាណិជ្ជកម្ម និងកម្រិតនៃការផ្សព្វផ្សាយរបស់ពួកគេនៅលើបណ្តាញសង្គម ឬយ៉ាងណា»។
ក្នុងចំណោមក្លិបចំនួន ៣២ នៅអឺរ៉ុប Bayern Munich បានស្ថិតក្នុងចំណាត់ថ្នាក់លេខ ៤ ជាមួយនឹងតម្លៃ ២,៥៥ ពាន់លានអឺរ៉ូ Juventus ស្ថិតលេខរៀងទី ៩ ក្នុងតម្លៃ ១,៣ ពាន់លានអឺរ៉ូ ស្របពេលដែល Paris Saint-Germain ឈរក្នុងចំណាត់ថ្នាក់លេខ ១១ ដោយមានតម្លៃសរុប ១,១៤ ពាន់លានអឺរ៉ូ៕ IS