ក្រុងឡុងដ៍៖ មិត្តរួមក្រុម Andy Robertson នៅក្លិប Liverpool បាននិយាយថា ខ្សែប្រយុទ្ធ Sadio Mane «ទទួលបានការប្រកួតក្នុងកម្រិតមួយផ្សេងទៀត» ដោយបោះជំហានចេញពីស្រមោលរបស់ខ្សែប្រយុទ្ធ Mohamed Salah ក្លាយជាបុរសដ៏សំខាន់ម្នាក់នៅកីឡដ្ឋាន Anfield។
ជម្រើសជាតិសេណេហ្គាល់រូបនេះបានក្លាយជាតារាបាល់ទាត់ជាមួយកីឡាករ Salah និង Roberto Firmino ជាផ្នែកមួយនៃការឈរនៅជួរខ្សែប្រយុទ្ធរួមគ្នាទាំង ៣ របស់ម្ចាស់ជើងឯកអឺរ៉ុបមួយនេះ។
ប៉ុន្តែនៅឆ្នាំនេះ កីឡាករ Mane កំពុងនាំមុខទទួលខុសត្រូវរបស់ក្លិប Liverpool ខណៈគ្រាប់បាល់របស់រូបគេនៅកីឡដ្ឋាន Selhurst Park កាលពីចុងសប្ដាហ៍ គឺជាគ្រាប់បាល់ទី ១២ នៃរដូវកាលនេះ និងទី ២៩ សម្រាប់ក្លិបនេះនៅក្នុងឆ្នាំនេះផងដែរ។
កីឡាករ Mane បានធ្វើឲ្យខ្សែការពារខ្លាចញញើតចំពោះល្បឿន ការរត់ត្រង់ និងជំនាញរបស់រូបគេ ហើយការរកបានគ្រាប់បាល់របស់រូបគាត់បានបន្ថយបន្ទុកនៅលើស្មារបស់កីឡាករ Salah។
ខ្សែការពារ Robertson នៅក្លិប Liverpool បានសរសើរកីឡាករ Mane ក្រោយពីការរកបានគ្រាប់បាល់របស់រូបគាត់ក្នុងជ័យជម្នះ ២-១ ទៅលើក្រុម Crystal Palace ដែលបានធ្វើឲ្យក្រុមហង្សក្រហមនាំមុខ ៨ ពិន្ទុ ទៅលើក្រុម Leicester ដែលឈរនៅលេខ ២ ក្នុងក្របខ័ណ្ឌ Premier League។
នៅរាត្រីថ្ងៃពុធនេះ កីឡាករ Mane នឹងបង្ហាញឲ្យឃើញពីសមត្ថភាពរបស់ខ្លួនក្នុងការប្រកួតជាមួយក្លិប Napoli ក្នុងក្របខ័ណ្ឌ Champions League ដោយធានានាំជ័យជម្នះឲ្យក្រុម Liverpool ឈរនៅលើកំពូលតារាងនៃក្របខ័ណ្ឌនេះ។
កីឡាករ Robertson បាននិយាយថា៖ «គាត់ជាកីឡាករអស្ចារ្យម្នាក់សូម្បីតែពេលខ្ញុំមកដល់ទីនេះ គាត់ក៏អស្ចារ្យដែរ ប៉ុន្តែគ្រាន់តែមិនទាន់អស្ចារ្យដូចពេលនេះទេពាក់ព័ន្ធនឹងការរកបានគ្រាប់បាល់»។
កីឡាកររូបនេះបានបន្ថែមថា៖ «ឥឡូវនេះគ្រប់ពេលដែលគាត់ស្ថិតនៅចំពោះមុខនៃការរកគ្រាប់បាល់ អ្នកមិនគិតថា គាត់នឹងធ្វើឲ្យខកខានឡើយដូចជាការប្រកួតជាមួយក្លិប Palace អ៊ីចឹង គឺគាត់បានបង្កើតភាពអស្ចារ្យនៅតង់ទី ២ ធ្វើឲ្យយើងមានការភ្ញាក់ផ្អើលចំពោះគាត់មែនទែន»។
កីឡាករ Robertson បានបន្ថែមថា៖ «កីឡាករផ្សេងទៀតស្ថិតនៅលើទីលានប្រកួតដែរ ប៉ុន្តែវាជាឆ្នាំដ៏អស្ចារ្យមួយសម្រាប់គាត់ ហើយគាត់ទទួលបានការប្រកួតក្នុងកម្រិតមួយផ្សេងពីអ្នកទាំងនោះ»។
គួររំឭកថា កីឡាករ Mane បានចូលរួមនឹងក្រុម Liverpool នៅឆ្នាំ ២០១៦ ក្នុងតម្លៃខ្លួន ៣៤ លានផោនប្រហែល ៤៤ លានដុល្លារ គឺរយៈពេល ១ ឆ្នាំមុន ពេលកីឡាករ Salah ទៅដល់ទីនោះ ប៉ុន្តែកីឡាករអេហ្ស៊ីបរូបនេះបានក្លាយជាកីឡាករអស្ចារ្យភ្លាមៗនៅកីឡដ្ឋាន Anfield ដោយរកបាន ៤៤ គ្រាប់ ក្នុងការប្រកួតទាំងអស់នៅក្នុងរដូវកាលប្រកួតគួរកត់សម្គាល់មួយនៅឆ្នាំ ២០១៧-២០១៨។
កាលពីរដូវកាលមុន កីឡាករទាំង ២ នេះ បានទទួលពានរង្វាន់ស្បែកជើងមាសរួមគ្នានៃក្របខ័ណ្ឌ Premier League ជាមួយកីឡាករ Pierre-Emerick Aubameyang នៅក្លិប Arsenal ដោយសារខ្សែប្រយុទ្ធទាំង ៣ រូបនេះ រកបាន ២២ គ្រាប់ដូចគ្នា។
ហើយកីឡាករ Salah បានជួយមិត្តរួមក្រុមរបស់ខ្លួនសម្រាប់កីឡាករអាហ្វ្រិករូបនេះទទួលបានពានរង្វាន់ប្រចាំឆ្នាំក្នុងរយៈពេល ២ រដូវកាល កន្លងមកនេះផងដែរ។
កីឡាករទាំង ២ រូបនេះ បានជាប់ឈ្មោះម្ដងទៀតទទួលបានពានរង្វាន់ប្រចាំឆ្នាំនេះ ហើយកីឡាករ Mane ដែលបានជួយឲ្យជម្រើសជាតិរបស់សេណេហ្គាល់បានមានឱកាសឡើងដល់វគ្គផ្ដាច់ព្រ័ត្រនៅក្នុងព្រឹត្តិការណ៍អាហ្វ្រិក Cup of Nations នៅឆ្នាំ ២០១៩ នេះ ត្រូវបានចាត់ទុកជាកីឡាករឆ្នើមមួយរូបដែលទទួលបានពានរង្វាន់ស្បែកជើងមាស Ballon d''Or ផងដែរ៕ AFP/SN