ក្រុងគូឡាឡាំពួ: កីឡាករប្រដាល់ជើងចាស់ Manny Pacquiao បានវិលទៅរកភាពខ្លាំងដូចកាលពីប៉ុន្មានឆ្នាំមុនវិញ ខណៈដែលរូបគេបានផ្តួលម្ចាស់ខ្សែក្រវាត់ WBA គឺកីឡាករ Lucas Matthysse កាលពីថ្ងៃអាទិត្យ ម្សិលមិញ ខណៈដែលវាជាជ័យជម្នះតាមរយៈការវាយដៃគូឲ្យសន្លប់ជាលើកទី ១ របស់កីឡាករហ្វីលីពីនរូបនេះ បើគិតចាប់តាំងពីឆ្នាំ ២០០៩។
Pacquiao បានគ្រប់គ្រងស្ថានភាពនៃការប្រកួតរបស់គេទាំងស្រុង ខណៈដែលរូបគេបានកត់ត្រាជ័យជម្នះជាលើកទី ៦០ របស់គេក្នុងអាជីពប្រកបដោយផ្លែផ្កាចំនួន ២៣ ឆ្នាំ ដែលបច្ចុប្បន្នអាចនឹងបន្តលើសពីវ័យ ៤០ ឆ្នាំរបស់គេនៅខែធ្នូ។
Pacquiao បានវាយឲ្យកីឡាករមានកណ្តាប់ដៃធ្ងន់សញ្ជាតិអាហ្សង់ទីនរូបនេះ ដួលនៅទឹកទី ៣ តាមរយៈការប្រើកណ្តាប់ដៃឆ្វេងដ៏ល្អរបស់គេចំគោលដៅយ៉ាងល្អ ដើម្បីបង្កើតឲ្យមានការអបអរយ៉ាងខ្លាំងនៅលើសង្វៀន Axiata Arena ក្នុងទីក្រុងគូឡាឡាំពួ។
Matthysse វ័យ ៣៥ ឆ្នាំ ដែលមានភាពល្បីល្បាញទៅលើកណ្តាប់ដៃធ្ងន់របស់គេនោះ មិនអាចទប់ទល់ទៅនឹងល្បឿនដ៏រហ័សរបស់ Pacquiao បានឡើយ ហើយរូបគេបានដួលម្តងទៀត នៅក្នុងទឹកទី ៥។
នៅពេលដែលកីឡាករ Pacquiao បានប្រើដៃឆ្វេងវាយចំចង្កាយ៉ាងល្អដើម្បីធ្វើឲ្យកីឡាករអាហ្សង់ទីនរូបនេះ ដួលជាលើកទី ៣ នៅក្នុងទឹកទី ៧ លោកអាជ្ញាកណ្តាល Kenny Bayless បានបញ្ឈប់ការប្រកួត ដើម្បីសង្គ្រោះរូបគេកុំឲ្យរងនូវការវាយបន្ថែមទៀត។
Pacquiao ដែលបានធ្វើឲ្យកំណត់ត្រាឈ្នះរបស់គេកើនដល់ ៦០ លើក ចាញ់ ៧ លើក និងស្មើ ២ លើកនោះ បានឲ្យដឹងថា៖ «ខ្ញុំពិតជាភ្ញាក់ផ្អើលណាស់ដែលខ្ញុំបានវាយឲ្យរូបគេដួលយ៉ាងឆាប់រហ័សបែបនេះ។ ខ្ញុំពិតជាភ្ញាក់ផ្អើល ដែលខ្ញុំបានវាយឲ្យ Matthysse ដួលនៅទឹកទី ៣ ទី ៥ និងទឹកទី ៧»។
បុរសជាសមាជិកព្រឹទ្ធសភារបស់ហ្វីលីពីនរូបនេះបានប្រាប់បន្តថា៖ «វាមានរយៈពេលជាយូរមកហើយចាប់តាំងពីខ្ញុំបានវាយឲ្យដៃគូសន្លប់បែបនេះ។ ខ្ញុំបានចាកចេញពីការចុះខ្សោយកម្លាំង។ យើងបានធ្វើការងារយ៉ាងល្អក្នុងការហ្វឹកហាត់។ យើងមិនបានវាយសម្រុកខ្លាំងឡើយ។ យើងបានគ្រប់គ្រងល្បឿនរបស់យើង និងខ្លួនយើងផ្ទាល់»។
Pacquiao បានបន្ថែមទៀតថា៖ «ខ្ញុំមិនមែននៅក្មេងទៀតឡើយ ហេតុនេះ ខ្ញុំសូមថ្លែងអំណរគុណដល់គ្រូបង្វឹក និងរាល់សមាជិកក្រុមទាំងអស់របស់ខ្ញុំ»៕