.jpg)
ក្រុមអ្នកគាំទ្រនាំគ្នាមកផ្ដល់កម្លាំងចិត្តនៅក្រៅគ្លីនិក ដោយកាន់បដា ដែលមានមុខរបស់លោក Maradona និងសរសេរថា «ស៊ូៗ Diego»។ រូបថត AFP
ប៊ុយណូស៊ែ៖ អតីតវីរបុរសបាល់ទាត់របស់ក្រុមជម្រើសជាតិអាហ្សង់ទីន Diego Maradona វះកាត់ឈាមកកក្នុងខួរក្បាលដោយជោគជ័យនៅគ្លីនិកជំនាញឯកជនមួយ នាក្រុងប៊ុយណូស៊ែ កាលពីថ្ងៃអង្ការ។ នេះបើតាមការឱ្យដឹងពីគ្រូពេទ្យផ្ទាល់ខ្លួនរបស់គាត់។
លោកគ្រូពេទ្យ Leopoldo Luque និយាយនៅក្រៅគ្លីនិកឯកជននាក្រុងប៊ុយណូស៊ែថា៖ «យើងសម្រេចជោគជ័យទាំងស្រុងក្នុងការយកឈាមកកហ្នឹងចេញ។ Diego (Maradona) ស៊ូជាមួយការវះកាត់នេះ បានល្អណាស់»។
លោក Luque បន្តថា៖ «វាកំពុងស្ថិតក្នុងការគ្រប់គ្រងយ៉ាងកៀក ដោយសារមានការហូរឈាមតិចតួច។ គាត់នឹងនៅតែស្ថិតក្រោមការតាមដានដោយយកចិត្តទុកដាក់»។
អតីតជយលាភី World Cup ត្រូវបញ្ជូនទៅមន្ទីរពេទ្យនៅថ្ងៃចន្ទ ក្នុងក្រុង La Plata កន្លែងដែលគាត់ធ្វើជាគ្រូបង្វឹកក្រុម Gimnasia របស់លីគកំពូលអាហ្សង់ទីន ដើម្បីត្រួតពិនិត្យសុខភាព ក្រោយមានអារម្មណ៍មិនសូវស្រួល។
ពេលស្គែនត្រួតសុខភាពនោះ ក៏ឃើញថា គាត់មានឈាមកកក្នុងខួរក្បាល ហើយកាលពីថ្ងៃអង្គារ ត្រូវបានបញ្ជូនទៅកាន់គ្លីនិកជំនាញ ដែលនៅតំបន់ភាគខាងជើងនៃរដ្ឋធានី។
នៅមុនហ្នឹង Maradona វ័យ ៦០ ឆ្នាំ មានសុខភាពខ្សោយដោយធ្លាប់គាំងបេះដូង ២ ដង និងមានរលាកថ្លើមផងដែរ។
មានក្រុមអ្នកគាំទ្រ នាំគ្នាមកផ្ដល់កម្លាំងចិត្តនៅក្រៅគ្លីនិក ដោយកាន់បដា ដែលមានមុខរបស់លោក Maradona និងសរសេរថា «ស៊ូៗ Diego»។
អ្នកគាំទ្រ ១ រូប Oscar Medina ប្រាប់ AFP ថា៖ «ខ្ញុំមកទីនេះជាមួយប្រពន្ធខ្ញុំ ដើម្បីផ្ដល់កម្លាំងចិត្តដល់កីឡាករល្អបំផុតគ្រប់ពេល។ គាត់មានបញ្ហាសុខភាពជាថ្មីម្ដងទៀត តែគាត់មានប្រព័ន្ធការពាររាងកាយ ដើម្បីជួយឱ្យសុខភាពល្អប្រសើរឡើងវិញ ដោយមានជំនួយផ្នែកកម្លាំងចិត្តពីគ្រប់គ្នា»៕ AFP/VN
